Ka Hngilh Thei Lomi Zaankhat Zaan

Home » Cahram » Ka Hngilh Thei Lomi Zaankhat Zaan

By vcth on May 27, 2010.

B.A (Thang), Salai

Ka tlangval pek te hrawngah a si. Ka pa thawn circus puai hrangah ticket lei ding kan bawh rero. Kan hmaiah innsungsang pakhat tla an tansi ve. Cui innsungsang te cu ka zoh hngai ih ka lung in ti riam nasa. Nauhak lawnglawng pa 8 an si. An zate kum 12 tang lawnglawng an si hmel. Anmah ka zoh veten milian an silo timi hi thei a theih. An angki pawl tla a tha lem lo. Nan, thiangfai te in an hruk.

Cui nauhak pawlih an nun ka zoh ih an pitling hmel nasa. Nu le Pa dungah a phirphirin, tadih-in an ding. Asinan an ka in cu tuzaan an zoh ding mi Circus sungih copoh pu pawl, ramsa fim pawl ih thu le a dangdang thu pawl kha an rel rero.

Hih nauhak pawl hi voikhat hman Circus puai an zoh dah lo hmang. Tuzaan cu an hrangih hminsintlak zaan si ding hmel a bang. An nu tla cu an pa ih kut kai in a hngak ve nasa.

Innsang pa bik in tla uangaw zet hmel thawn a nupi lam hni in a zoh phah, dung lam ih fa le pawl khal ti siamsi mithmai thawn zoh phah in a ding rero. A tlangpi thu in an zaten lungtur le hiarhalnak thawn cui circus puai cu an hngak rero ti a lang.

Ticket zuar tu nu in, “ticket paziat nan duh?” tiah a sut. Pa bik in, “ nauhak hrang ticket pariat leh upa hrang pahnih kan duh, cumi lawngah kan zate zoh thei ding” tin lung tho zetin a sim.

Ticket zuartu nu in an cem zat, ziangzet an ciah ti kha a rak sim. Cutikah a nu pi cu a lau ih a pasal ih kut fekten a rak kai mi kha thlah tahrat in a lu cu a kunih a pitmi a tanglam ih zial kha a zoh. An Pa bik tla a lau ve nasa, ka theisual si pangpei maw tiah, “Ziang zet e?” tin voikhat a sut sal. Ticket zuar nu in a man cu sim sal.

An Pa bik ih a rak ken mi lole a neihsun peisa a daih lo si hmang. Tu vek caanah a dunglam um nauhak pawl kha peisa a daih loih tuzaan cu kan zoh thei hrih lo ding ti kha a simsuak thei lo. Dunglam ih um fale pawl kha a zoh ih ziang sim ding thei loin a rak ding rero.

Cumi thuhla a zoh rero tu ka pa in a korzal sungih a nei mi dollor 20 kha a suah ih zial parah a thak. (Kan pa fa tla milian kan si lo, ei thei fang fang kan si ve) Cumi hnuah ka pa in peisa kha a sar sal ih, an Pa bik ih liang kha a kai ih, “ka raul mi tu peisa na thlau mi ka sar ngah,” tiah a pe.

Ka pa ziang a tuah ti, cu pa cun thaten a thei. Zohnen hmanah tla kutdawh in dil mi tla si lo. Asinan tuvek ṭultuk caanah pacang pakhat ih a fa le pawl hmai-ih ningzak le thinnuam lo ih a um ding kha a rak bawm si cu.

Ka pa pek mi peisa kha a lak ih ka pa ih kut kha ti diardo ten cibai a buk phah in lungawi thu a sim. “Ka lungawi, Ka Lungawi tuk lawmmam. Keimah le ka innsungsang hrangah a man a nei tuk lawmmam, a sim le a rel daan ding tla ka thiam lo ee” tiih mithli hal phahin a rak sim.

Cuhnuah ka pa le kei tla bus cawlhhmun lamah kan pan sal in kan thlung sal. Cumi zaan cu Circus puai kan rak zoh ngah lo.

Asinan………………………….

……………………………….

…………………………………………

Ronmi: Dan Clark ih The Circus

Na ruahnak