Ka Lo Thlawhhma A Sawt Theilonak

Home » Cahram » Ka Lo Thlawhhma A Sawt Theilonak

By vcth on November 7, 2010.

Francis Cung Bik

Tuisan ah ziang tluk rei hna kan ṭuan ti hnak in kan ṭuan mi ziang tluk a sawtpawt, man a nei ti a thu pi sawn. Mi pakhat kum ziat a nung ti hnak in ziang a tuah, a ṭuan suak ti hi thupi deuh ih ruah a si. Cutin kum 1 a kim thlang mi kan VCTH teh ziang a bang ti ka ruat phah. Duh vekin cu thlawhhma a sawt lo in ka hmu. Mi dang ih in faksel hlan ah keimah ten ka faksel aw mei ding.

Kan dung zarh ah Chinland Guardian ih an assistant editor Van Biak Thang thawn thu nuam rel tlangnak caan ka ngah. Media lam veve ti cu kan experience tete le ruahsannak tete pawl kan hlawm aw. Kei tla in tu ih Chinland Guardian dinhmun hi diriam a si maw ti vek pawl ka sut phah vivo. Duh vek cu a silo tin a rel.

Kan chin media pawl duh vekin kan tha a cak theilonak cu Media ih hnaṭuan tu kan zaten hlawh-lang (part-time) ih ṭuan lawnglawng deuh kan si. Nikhat ah pumcawmnak hrangah nazi 8 maw 10 maw hnaṭuan zo hnu-ah thabang nawn ih ṭuan thok a si. Cutin vekih ṭuan rero cu thlawhhma cu a sawt duh lo nasa. Cak lonak ih ral khat cu cahnak a si. Kan thu feh daan ah cu Chin Media pawl ziangtin kan cak thei ding ti cu hlawhleng (full-time) nikhat ah nazi 8 or 10 ṭuan ringring thei sehla cu kan ṭhangso ko ding.

Chiang Mai ih um ka si bang in Chiang Mai ih um Kawlram Media Group ih hnaṭuan tu rualpi tete ka nei phah, Irrawaddy, Mizzama tvp… An nih cu an pi cang zet. Kan Chin Media pawl thawn cu tahṭhim ding a um lo. Zung pi cang zet, hnaṭuantu staff tam zet, reporter tam zet thawn hna an ṭuan. Nikhat ni ah kan Chin Media pawl hi vek cang thei ve sehla ti saduh ka thah.

Kan Falam Media mal lai kan thirhnik pei. Kan Falam Media lak ih lengtu tambik le larbik a si mi Chinworld.info, ChinlandToday.if pawl an si. Tuanvo neitu pawl in man lo na cung in thazang suah in an tuan rero.  Full-time in ṭuan thei sinsin hngai sehla ziang tluk in a cak sinsin ding. Full-time ti kan ti ve ten sumpai ti a rak ṭul. Kan unau Hakha lam pawl ih an media cak bik pahnih hi Chinland Guardian le Khonungtum a si. Chinland Guardian cu Chin Human Right Organization a hngohsan ih Khonungtum cu CNF a hngoh san. Thil um tu daan zoh mawi zet a si. Kan nih Falam pawl hi vansiat maw kan ti ding, zapi huap thei mi pawlkom kan nei lo. Ramsung ah cu Baptist thawn a pehpar mi pawlkom cu a um men ko ding nan Secular thawn pehpar aw in cu a um lo in ka thei. Cutin hngohsan mi pawlkom a um ah cu kan media hnaṭuannak tla hlawhleng (full-time) in a si thei ding.

A tlunlam ih ka ngan mi pawl hi keimah bulpak ih ruahnak le hmuhnak a si. A dik lo tla si men thei, nan a sual tuk ding cu ka zum lo. Kan thlawhhma a sawt sinsin thei ding tiih ka ruahmi mallai an si.

Na ruahnak