Ka Nui’ Phunsang tlawng

Home » Cahram » Ka Nui’ Phunsang tlawng

By vcth on July 25, 2013.

Kan tlawng cazirkhan sungah tlawngta dang hnakin ka hmat a mal bik ringring. Ka nuapa khal cu thotho. Kan unau hnih ten ca kan thiam lo. Phunhrek ihsin phunli kan thlen tiang ziangtik hmanah ca kan rak thiam dah lo.

Asan cu, zantin deuh thaw in kan unau hnih ten ca zoh loin TV hmai-ah kan can kan rak cemter ringring. Ka nu in, in rak dawn dah lo. Ka pa in mual in laimsan zo hnu, venghnen mineinungpawl hnenih puansawp le kiangkap thianfai hnaṭuan ah buai-in kan tlawng cazir khal in rak ngaihsak man dah lo. Cuticun, ka nuapa thawn venghnen nauhak hmuahhmuah lak khalah tlawngta cathiam lo kan rak si ringring.

Nikhat cu, simzawng ah hnaṭuan bang zetin inn a thlen le veten ka nu in, “Tuizan ihsin thawkin TV nan zoh nawn hrimhrim lo ding, tlawngca lawng siloin, zarhkhat ah a malbik cabu pahnih tal zarh tinten nan siar ringring ding, cule nan siarmi sungin nan duhzawng tete nan hmuh le, cabu sungah nan ngamkhum dingih zarhtin ka man tinten ka lo ceksal ringring ding, nan thei maw” ti’n cabu siar ding pe phah cun in rak ti.

Kan bei a dong cuahco. Har kan rak ti fualfo ko. Venghnen nauhak an lek, an aukio rero lai-ah kannih unau cu paihlo zet cingin ka nu ṭih ruangah ca kan siar ṭento ṭheu. Culawng cu duhtawk mai loin, khawsungih cabu dawr ah in hruai; mai duhzawng fingfing in hril ter. Tingaihnak thei lo cun, ramnung phunphun zukmawi cuang mi cabu ukkhat ka vun hril sin. Huamlo zet cing cun cahmai pakhat hnu pakhat ka vun kau sin. Ka zoh. Ka siar. A rak famkim tuk! TV zuknung sung hnak hmanin ramsa phunkim ih pianhmang le tlanlendan fiangfai tukin ka hmusuak. Cutin, thingthei-thlairah thu ngan mi cabu ka vun siar sal lala. Mangbangza, a rak maktuk! Cabu sungah thil ziangkim hi a rak um thluh a si lo maw? Kan theih lo le hmuh dah lo mi thil ziangkim hi cabu sungah ngankhum in an rak um famkim thluh a si lo maw?

Cuisicun, TV zuknung zoh ding hman paih nawn loin casiar ta rori in ka can ka hmangliam thiam ve. Pianphung nun (Natural Life) thawn kan nai-aw sinsin. Ka nui hnenih kan apsalmi kan hminsinnak cabu khal a nini in a tam sinsin. In porh, in lawm a lungawi thei zet. Hnipuan mawimawi in leih. Venghnen nauhak rualpi pawl thawn leh khal in awih. TV le zuknung dangdang khal zoh in on sal. Hmanseh, tlawngca tuah le casiar tilo dang cu a huam in kan huam nawn lo lawlaw. Ka nu man awl canih cabu dawr in fehpi ding can tlukih kan hngahhlap mi, ni dang a um nawn lo rori hi a si mai.

Tuisun ahcun ka naupa hi kan ram hrangah rinsantlak Engineer pakhat a si ve zoih, kei khal khawvel hmun tintian fangsuak rero in leitlun si le vai lam thurelkhawmnak le zato (sizung) hmun tampi ah mithupi, sibawi hminthang pakhat ka rung si ve ta.

Ka nui’ phunsangtlawng ka rak kai lai, phunhra ka rak zir lai-ih ka theihngah mi pakhat te cu ka nu hi, kan hminsinnak cabu ceksal thei ding khopin, ca ṭhiṭha in a rak siar thiam lo ti hi a si. Asinan, tuisun ahcun anih khal a fale pawl hnaṭuan kan neih thei hnu, diploma pakhat a zir ve ih harhdam zetin hnaṭuan kaihmi nei ve nutling pakhat a si ve zo.

Hminsin: Ben Carson nganmi, Paging Mr. Carson sungta a remdan in ngansal mi a si.

Salai Ayete (Vankau)

Na ruahnak