Ka Nun Thleng Tertu Max

Home » Cahram » Ka Nun Thleng Tertu Max

By vcth on June 17, 2013.

Francis Cung Bik

A tikcucaan cu ralpi II lai a si. Mi farah tuk ka rak silo, duh tawk nung, ei in thei dinhmun ka si. Inn kil tu ah German Shepherd/Alsatian ui cang pakhat ka nei. A hmin cu Max a si. Ka duhdawt zet vekin, in duhdawt zet ve. Duhdawt ti men lawng siloin ka parah a rin um zet.

German Shepherd

Ralpi II cun kan khua Berlin cu lak ding um lo in a siat ṭheh. Ka inn le lo tla lak ding a um nawn lo. Rawl khengkhat hrangah caan tampi mi thawn kan hau aw, kan too aw. Ralpi ruangah keimah lawng zonzai siloin mi hmuahhmuah tla an zonzai, cu vekin ka Max tla cu a zonzai ve nasa. Rawl ṭhiṭha in a ei ngah dah lo. Ka zangfah zet nan ziang ti ṭha. Cutin Max cu ka kil khawi thei nawn lo. Ka tan san. Netabik ka hmuh tiangah cu a thi hrih lo nan a ṭawl zet. A hnak ruh tla a lang ṭheh zo. Rei hlan ah a thi cing ding ti ka zum.

Cutin ka nunnak cu sikpiat, beidong in, fir le rukru in ka cawm aw. Ka ruk ngah sun ten zu ka in, nuam ka cen. A cem in a thar in ka ruk sal. Cutin tikcucaan cu kum 6 lenglo a rak liam.

Voikhat cu milain zet inn ah Rukru ding in ka pok. Zaan ṭim a si. Sangkate in ka lut. Sui le Ngun tampi ka ngah. Ka suak lam ah tla zo hman in in thei lo. Nan sangkate tang ah an ui cang tumpi a to ka hmu. Ka ṭih ka thinphang. Ka zoh, i zoh. Ziang ah in bo lo ti ka mangbang. Cutin nuam teten ka feh, nuam teten in thlun ve. A mei a zap. Hnauh aw te thawn pacang pa a ṭap. An ui cang cu keimah mifir pa lungawi zet in in hmuk. Cutin ka umnak Lilawn tang ah in thlun. Kei tla ka ṭap. Mi sual mi santlailo ka sinan Max hrangah cun a pakhatnak ka rak si lai. (Vanṭhatnak ah Max cu ka tansan hnu ah Milain pakhat in a rak sar ih a rak cawm.)

Rintalk a si zet mi Max in ka nun in thleng. Kei tla hi ti ruk le fir ih um, zu ri sa bah ringring ih um hi a dikmi a silo ti i ruat ter. Cutincun, ti ka bual, ka sam ka hriat, khuasung ah fir ding siloin hnaṭuan hawl ding in ka pok, ka Max thawn.

Ps: Zarhpi sun Pastor pa Sermon mi thuṭhimnak a pe mi a si, remcang daan ih ngan sal mi a si.

Na ruahnak