Ka Pu Sung Maw Leng

Home » Cahram » Ka Pu Sung Maw Leng

By vcth on December 15, 2013.

Caan tampi ah Chin miphun timi hi Vietnam, China, Laos, India, Nagaland, Minipur, Assum le Kawlram, Chinduin tiva tluan, Irrawaddy nitlanak lam um mi tamtak tla Chinmi an si, an suahsemnak kan zingzoi asile cu sauhsemnak a bang aw mi kan si tin thuk le kau zet in a ruattu an um. Cuti thuk le kau zetih zingzoinak cu fimthiamnak, thuanthu zingzoitu pawl le academic lam hrangah cu thil thupi zet a si ding nan tuni-ah kei ih Chinmi tiih ka hmuitin duhmi sawn cu mah le mah Chinmi tiih a cohlang aw tu pawl, Chinram ih pu luruh le laihri phum tu pawl sawn a si. Curuangah Chin ti ka tarlang tikah thuk le kau tuk lo in mizaran pawl ih kan thluak sungih a um mi Chin kha ka ti duh mi si ko.

Sung Maw Leng

Chinmi pawl hi 1990 hnu in kan ṭekdarh aw nasa. Ziangruangah ti a san hawl sehla a thuhla a tam zet ko ding ka zum. Caan tampi ah siipuazii, cawmawnak tlak lo, san a ṭha lo raungah kan ti ringring ṭheu nan cucu a dik thluh lo men thei. Hmun dang ram dang ih a fehtu pawl kan zoh tikah farah zonzai hnakin khausung dinhmun ih neinung, duhtawk ih nung thei, ei le in ding hrang hlawhsam lo tu pawl tla an tam. Mi tampi cu a tleuvar deuh mi hmailam an hawl, a hrekkhat cu fimthiamnak, hrekkhat cun sum le pai cuticun thuhla a phunphun, dinhmun a phunphun ruangah kan Chinmi pawl tla cu leitlun khuaza ramkip ah; USA, Canada, Europe ramkip, Australia, Korea, Japan, Malaysia, Thailand, India le Philippines tiin ram cangkang, a thangso mi ram lole kan hnak ih a ṭha deuh mi ram pawl ah cu kan ṭhekdawh aw.

Cui dinhmunih ralkhat ah kan Chinmi tampi cu kei mah Chinram, Laitlang ih ka um lo ahcun zo in so kan suahsemnak ram a kilkawi ding tiin khua le ram duhdawtnak cu alh hluah hlo in mi ziangvek ih an tlan, vai khal ah kei cu tlan hlah tin fek eueu ih a tangtu tla cu mi tampi an si ve.

Tu fangah mi in Chinmi pawlih nan thazang, power hi khawinah a um tin in sut sehla, khawiah a um ti sim ding hi Salai Tuan Ling Thang ih Ka awlok na ti song a ti bangin awlok songza zet cu a si; Hakha, Falam, Yangon, USA, Australia, Europe ram, Malay lamah maw, maw ziang pawlkom, organization ah ha a um? Kan cahnak kan thazang?

Chinmi pawl kan dinhmun hi tualsung le tualleng tin hmunhnih in ṭhen sehla ṭhen theih dinhmun a si. Cuih dinhmun pahnih kar lakih kan pehzomnak hri a nget lo a si ahcun thil poimawh zet a suahpi leh men ding.

Chinram timi um hlah sehla Chinmi kan siman (value) a um lo ding, a um le hmanah tuvek in mi hmai ah hmaihngal ten a um thei lo mi din hmun kan si men ding. Cuvek in Falam khau, Falam peng um hlah sehla Falam mi ka sinak ih man a um lo ding. Suahsemnak kan ram cu man in neih tertu a si.

Cu vek ṭhiamṭhiam in ramlengih kan hawl mi fimthiamnak, sumsaw, neihsiah, ṭhansonak pawl tla cu in semsuahtu kan ram a humhimnak le leitlun ram tampi lak ih uar a um mi, a ṭhangso mi ram, ramṭhen a si theinak dingah si hramseh. Sung le leng kap hnih in; tualsung um unau pawl khal in tualleng ih a phunphun ruangih caan a hmangmi pawl hrangah tlaza camnak thawn ṭanpi in, cuvek ṭhiamṭhiam in tualleng um unau pawl khal in suahsemnak ram, Chin nunphung, dun le daan cing mang ringring in kan ramhrangah tlakrawh belkhat le vutnel kut hum khat te ka si hmanah ti thinlungput thawn……………………

Ka Pu Sung maw leng!

Francis Cung Bik

PS: Oct 19, 2009 ih rak ngan mi

Na ruahnak

One Response to Ka Pu Sung Maw Leng