Ka Rak Theih Dah Mi Sayakyi Zung Luai

Home » Cahram » Ka Rak Theih Dah Mi Sayakyi Zung Luai

By vcth on January 16, 2010.

Francis Cung Bik

Tuzing ka email ka check cu ka siar peih lo zet mi mail pakhat ka rak hmu, cucu “Pu Zung Luai in mual in liam san,” ti a si.

Falam ih suak le ṭhanglian cu ka si ko nan Sayakyi Zung Luai thawn hmaiton ih thurel tlangnak, thunuam ruah aw khawmnak tik cu caan ṭha ka rak ngah dah lo. Kei Cambary veng, a nih Cinmual veng ih um a siih ruangah maw, kan kum a rak thlau aw deuh ih ruangah maw cu thei hlah! A hmin belte ka rak theinak a rei zet.

2004 ah Vancung Thaihlio in Falam mino pawl ih kan theih a ṭul mi niangnganzii thu, ram thuhla tin Seminar nei kan rak tum. Cui seminar ah thusimtu ah zo a ṭha pei ti rual le pawl thawn kan ruat khawm. ‘Sayakyi Zung Luai” kan sawm le a ṭha ding tin rualpi pawl in ruahnak in pe. Kei tla sawmnak ca fate keng in Sayakyi Zung Luai ih inn lam ah ka pan. An inn ka thleng, inn sangka cu ka king, “rak lut aw” tin in rak ti. Tohkheng parah Putar pakhat thuthangca a siar rero mi ka hmu. Kei tla hihi Sayakyi Zung Luai a si ti ka thei, keimah le keimah hmel theih awnak ka tuah, cu le Vancung Thaihlio thuhla ka sim, thuthang cazual kan suah mi tla ka pe. Cule ka rat sannak ka sim. Hni siamsi in, lungawi sopar ten in rak cohlang.

Kan seminar cu New Vision Boarding School ah kan rak tuah. Sayakyi cu tik cu caan hman zetin a rak thleng. Cun thuhla phunphun cu in rak ruah. “Kan ram hrangah a dik mi Federalism lawngin a harhdam mi uk aw daan a suah pi ding ih a zum thu, cui a dik mi federalism cu NLD ih kaih hruainak in kan ngah thei ding ti ruahsannak a neih thu, Falam NLD ih hotu a ṭuannak san cu a peih tuk ruangah siloin hotu um lo ruangah kum upa a sinan keimah tal in ka hoha lole zohman in hih hna an ṭuan lo ding tiah tlawmngainak thawn a ṭuan thu, a inn ah MI pawl le palik bawi pawl an rak ra lai ih a kawk hngai ciamco thu, a fa le hrekkhat in niangnganzii in cawl aw la sia kan lo thah ding an ti nan “nan sia thah ka hei lo” tiih a ti thu, Kan Chin ram khawlipi Falam ihsin Hakha an ṭhawn laiah amah le a tlawngta pawl in lamzin phit tahrat in sandahpiah an tum nan Falam upa pawl in cu ti cu a ṭha lo kan mah upa pawl in kan tawlrel ding tiih an rak ti mi a ring ruangah tu ni tiang kan ngah sal thei nawn lo mi kan khawlipi a thawn aw thu, cu tiih upa pawl ih an rak ti mi a lung; lunglo in rak tuah ding ka sinan tiin amah le amah thiam lo a co aw thu pawl le thu nuam dangdang tla in ruah.

Vancung Thaihlio cu pawlkom fa te kan siih thusimtu tla ziang laksawng pek ding kan rak nei lo, amah thusimtu ih kan sawm mi Sayakyi Zung Luai sawn in VCTH cangvaihnak ah peisa 3,000 in rak ṭanpi.

Sayakyi Zung Luai cu tlawng Sayakyi tla a rak si, cuhlei ah niangnganzii (NLD) ih hotu tla asiih a tifetfet ding, upa pawl hnen lawngah thuruahron a paih ding tin ka rak ruat, nan ka ruat vek a rak silo. Pawlkom a nuam, mino pawl hnen ah thusim, thuruah a peih zet, cu pawl ruangah Cinmual lam ka feh tinten an inn ah ka leng phah ringring. An inn ka leng tinten an nu ( ka pi Zung Cer nu) in suncaw thaw te in tim zal sak ringring.

An inn ka len tikah U Nu sanlai ih ‘ramkulh biaknak kan duh lo’ tiih sandah an piah lai ih an ca tar mi (puanthan thawn tuah mi banner) tla a kil khawi lai ih cu mi tla cu in hmuh. Kan Chinram pursum leilawnnak ah Wine in hi international export tiang kan tuah thei ding ti a zum thu tla in ruah. Inn sungkhaan ah a lut ih a theipi wine tuah mi cu palang tum ngaingai in a rak keng. Cule khuat fate te ah in thlet sak ih in in ter. Cun Chess na lek maw tin in sut ih kei tla Chess lek ka thiam thu ka sim. Cule a Chess board a lak ih Chess kan lek. Cumi ni cu a neh in ka tlung.

Tik cu caan tawk fang a rei in Ṭiahdai ah pastor ka ṭuan. Sayakyi Zung Luai cu Falam ka um lai vekin ka leng man nawn lo. Cun, Chiang Mai ka ra zik ah voikhat ka leng ta. Cunah ah a voihnihnak Chess kan lek sal. Cumi ni cu a sung in ka tlung. Neta kan ṭong aw tikah a voithumnak, final kan lek ding tin in ti, asinan cui tik cu caan cu a rak um thiam nawn lo.

Tlai mearmo tiang, tarkun tiang ram duhdawt in ram hrang hna a ṭuantu, mino pawl hnen ah ruahnak hlawm in thazang a pe ringring tu, kan Chin ram ih deirel arsi kan lo upat, na ṭuan mi pawl le na ralṭhatnak pawl cu nonawn pawl hrangah kan thazang a si. Leitlun sandeng tiang na hmin a dai dah lo ding, nonawn pawlin na thu sim le rel kan khop dah lo ding.

Falam Pi

Na ruahnak