Ka Zir Ding Hmuah Phunhrek Lai Ihsin

Home » Cahram » Ka Zir Ding Hmuah Phunhrek Lai Ihsin

By vcth on July 27, 2013.


Salai No Hmung

Nuncan, umtlan khuasakdaan ziangtin kan um ding. Ziang kan tuah ding. Ziang vek si a ṭul ti pawl thawn pehpar aw in ka thei ṭul mi ih tamsawn cu phunhrek ka kai lai in ka rak zir ṭheh zo.

Fimthiamnak cu phunsang tlawng timi tlang zim par lawngah a um mi a silo. Tualleng tlawng ih kan leknak lei vuk lakah a rak um zo. Cunah in tampi ka rak zir, ka rak thei. Ziangvek thil fate a si khal ah zaten hlawm awk ding. A dik lo mi thil tuah lo ding. Mi thawi lo ding. Mi bum lo ding. Kan lak (hman) mi thil, a umnak (laknak hmun) ah ret sal ding.

Mai darh mi hnawm mahten khawm sal ding. Mah tuah mawhmi ngaidam(thiam) dil sal ding. Rawl ei hlanah kut khoh ding. Ca malte tal siar ding. Thu malte tal ruat ding. Zuk suai ding. Hla sak ding. Lam ding. Lek ding. Hnaṭuan ding. A zaten nitin in mal tete tal tuah ding.

Cun…..
Sun ah ṭhangkhat it ding. A leng suak tikah rual le pawl thawn kut kai aw ding. Ralring ten lamzin kaan ding.
Leilungpi sungih mangbangza thil pawl zoh thiam tum ding.

Thlaici khi zoh hnik aw. A hram cu lei lamah a feh ih a kung cu van lamah a kai. Ziang ruang ah si pei? Zo hman in an thei lo. Kan nih khal thlaici vek mangbang za kan si.

Cun kan vok pawl, kan ar pawl, kan Uico, innzuat sumhnam pawl, cule kan cin thlaici pawl khal nikhat khatah an thi leh ding. Kan nih khal cu ṭhiamṭhiam.

Cuhnuah hmaisabik na zir cabu le ṭongfang ruat sal aw. Cui sungih a thu pi bik mi ṭong fang “Look”, “zoh aw”

Na tulsam mi hmuahhmuah cu cui cabu sungah: duhdawtnak, lainatnak, kiangkap kilkhawinak, ram le miphun duhnak, rualremnak le bangrannak pawl.

Ruat hnik aw….
Leilung parah kan nih minung pawl pumpuar ten sun tin maih puan ciar sin in ṭhangkhat it thei ringring sehla, kan leilungpi hi tu hnakin remnak a tam deuh ding.

Culole kan umnak ciar ah “maih hman mi thil a mah umnak ah ret sal, maih darhmi hnawn mah te’n rut sal ding ti mi lungput nei fingfing sehla” leilungpi ziang thuk a mawi ding.

Cun… ruat sal hnik aw…. leng kan suak caan te ah pakhat le pakhat kut kai aw in hruai aw ringring thei sehla kan zaten hrangah ziang thluk a nuam pei aw……

Tualleng Tlawng

Ref: Robert Fulghum ih All I Really Needed To Know I learned In Kindergarten

Na ruahnak