Kalay kiangkap thinphangnak a pektu Leimin tidawlpi

Home » Thlirnak » Kalay kiangkap thinphangnak a pektu Leimin tidawlpi

By vcth on March 2, 2016.

 

Leimin tidawl

Kan dung kum 2015 fur cu Kawlram hmun kipah tilain le leimin harsatnak kan tong. Hi vanduai ah hmun dang thawn bang aw loin harsatnak phunkhat cu Hakhalay, Tuikhing Zing khua le a kiangkap thilcang a si. August 28 zaan ah Hakhalay saklam Nat Maung tiva, a mahte dawl aw mi (landslide dam) a min ruangah ciar bek tilian in an khua le lo ram pawl a silh thluh thu zate theih a si.

Kalaymyo kiang ih um Yarzacu tidawl pi ih ti hna a simi Tui Milui tiva ah Landslide Dam a um tiah Tonzang peng Hangcin khawmi pawl hnen ihsin theih a si. Asinan hi thu hi ziangtluk in a dik, ziangtluk ih t’ihnung a um ti theih a rak si lo. Hi tiih mipi an titi celcelnak le mifim hrekkhat ih satellite ih hmuhnak ruangah 2016 kum thok lam ah Kalay kiangkap mino pawlkom a simi Upper Chindwin Youth Network le leikhur lam thiamnak neitu pawl in zingzoinak an nei.

Hi Landslide Dam cu Tonzang peng Hangcin khua in peng 8 hlat ah a um. Yarzacu tidawl in cu peng 20 a hlat. Yarzacu tidawl cu sea level 660 a sang ih hi leimin tidawl cu sea level 4400 tluk a sannak hmun ah a um.

Hlethlai tu pawl ih an zoh caan cu ruah kang hnu thlatang ah a siih ti mallai fang a si. Ti mallai a sinan tili a kau lam cu 100.44 acres a si. Tidai a um zat volume cu 12,581 acre a si. Yarzacu tidawl cu a kaulam 980 acre a siih ti a um zat cu 54,000 tluk a si. Hi leimin tidawl cu Yarzacu tidawl hnakin let 5 a fate kan ti thei.

Hi leimin tidawl cang dingin a khamtu leivor hi cin 3 million hrawng a si. Tidawl a tlang cu pi 100 hrawng a kau ih a san lam ah a thlanglam a hram in cu pi 1000 tluk a sang. Hi leivor ah lungno, leilung le lungcang tiin phun 3 an tel.

Lei a min ti fam cu kut ih dawlmi vek a silo. A tanglam ih thingkung pawl a nen cih ruangah maw, leilung a zup vivo ruangah maw tidawl a tlanglam in ti a zun mi a um ih Tui Miluai va cu a kel in a luang, hi tidawl ruangah ti a kang hleice cuang lo.

Yarzacu hi a thuklam pi 165 a si, nan tui kum fur ah ciarbet in pi 10 a silh ih pi 155 a thuk ah a cang. Curuangah Yarzacu a kel hnakin a fete sinsin ah a cang kan ti thei.

Leikhur lam zoh thiamtu U Muang Maung Than in Landslide Dam pawl hi 70% cu thla 6 ihsin kum 1 karlak ah an min tiah a ti.

2016 fur ahcun hi tidawlpi ti a khat ding. Tu hnakin ti a tam sinsin ding. Cuvekin Yarzacu tidawl tla ti a tam ding. 2015 ti tam lai ahcun ti a khatnak cing pi 1 lawng a duh. Hi tidawlpi min pang sehla cu pi 4400 sang in tidai tam tak, cak tak in a luang ding. Yarzacu dam a thleng hlan ah a kaingkap hmuahhmuah a hrut siat thluh dingih cutin Yarzacu dam ah a lut ding. Yarzacu dam hrangih thil cang thei cu 1. Dam dawlmi a cim thei, ziang ah tile ti tha a cak zet ding ruangah. Dam tlang a bauh ah cu tilain ti men lawng siloin a cak zetmi ti tha in inn le lo pawl a fen hlo thluh ding. 2. Dam a hlo thei, ciarbet in a silh hlo thluh dingih dam sungih tidai cu voikhat laim ah a liam dingih a kaingkap ti a lain ding.

Dam2

Ziangtin humhim aw thei daan a um pei?

Kalay kiangkap mipi 500,000 tluk um umnak humhim dingin caan a um tuk lo. 2016 fur hlan ah hi piahtana cu pahtlang rori a t’ul. Culole a tlai tuk pang ding.

Leikhur lam ih mi thiam pawl in hi tidawlpi thawn pehpar aw in humhim aw thei daan phun 3 a um tiah an ti, cu pawl tla cu:

  1. Ti a mal lai ah Leimin tidawlpi dynamite thawn phuah in tidawl a tlang bauh ding.
  2. Tidawl pi in ti laungnak thaten tuah dingih tili ih tidai pawl tiva sungah luang ter ding.
  3. Ti leimin tidawl bauh pang sehla tiin Yarzacu dam tla ralrinnak lak cia ding. Dam sungah ti tamtuk khal lo in ret cia ding.

Pakhatnak le pahnihnak tuah thei sehla cu a tha bik, ziangah tile tidawl a min hlan in humhim a siih hna-ngam a um bik. Asinan tuahsauk taktak ding in cu sumpai tampi a cem ding. Sumpai tampi a cem hman ah tuah tengteng dingmi thil a si, ziangah tile mi thawng tampi nunnak humhimnak ding hrangah a si. Tu tiang ahcun cozah lam in a takin ziang an tuah ti hmu ding cu a um hrih lo.

Na ruahnak