Kei Cu Kei Ka Si – Part II

Home » Cahram » Kei Cu Kei Ka Si – Part II

By vcth on May 30, 2010.

BA (Thang) Salai,

Berlin ih a tang mi ka nu ngaingai kha ka mang ringring.  Ka rak um dahnak Berlin kha tu cu Nisuahnak lam Berlin (East-Berlin) tin an rak ko. Ka kum (20) ah East Berlin kha harzet in ka va thleng thei. Kan rak um dahnak inn ah, inn thar tumpi pakhat an sak.

Vanthatnak ah, ka nu a theitu mi pakhat thawn kan tong aw ngel cel. Cumi pa in, ‘Berlin khawpi cu a siat nan, na nu cu a nung lai. Nehhnu lawngah hmun dangah a ṭhawn aw’ in ti. Ziangkhal lole, ka nu a nung lai ti ka thei-ih ka lungawi nasa.

Ca ka rak thiamih, scolarship pawl tla ol ten ka rak ngah. Goettingen University ah Biology thawn tlawng ka rak kai. Ka kum khatnakah in cawmtu ka pa a thi. Ka pa ngaingai thi cu ka cing lo nan in cawmtu ka pa ih thih cu ka riahsia nasa.

Tlawng ka ṭheh ih, kan khua ih tlawngah Bio lecturer, tlawng saya ka ṭuan. Nupi tla ka ṭhit ih, duhnung um zet mi fanu te pakhat tla ka nei.

Ralpi sungah mi hlo an tam zet ruangah German ah a hlo mi pawl hrangah TV program pakhat a um. Cui program cu Missing Person Program an ti. Zaantin ten i hringtu ka nu thuhla information ka thei pangah tiah cui channel cu ka zoh ringring. Rinlopin zaankhat zaanah cui program ah ka nu kha ka rak hmu. Ka nu cu a tar phah zo nan, ka hminsin lai. Ka cing ringring lai ko.

Ka Nu hmin tla a dik. Ka nu hi a dam lo nasa. A thihhlan te ah a fapa a hmu ta duh tin a doctor pa in a ti. Cui thu ka thei veten, ka nu hnen ka feh cih. Ka nu thawn netabik kan ton aw kha kum 8 ka si. A tu kum (28) ka si zo ih, ka nu in i hminsin nawn lo. Cross, Bawi Jesuh ṭhi te, Bapitism cahnah te kha ka hmuh, ka nauhak lai thu pawl ka sim hnu ah, ka nu in a fa ka si ngaingai tin in ti.

Kan ṭhen aw sung tik cu caan kum (20) sung thu kha ka sim ih, ṭhaten a ngai. Nazi pawl parah ka hmuh daan kha a thei duh sawn a bang. Nazi pawl kha ka hua zet tin ka nu kha ka sim.

Pathian na zum maw tin ka nu’n in sut ih kan zate Pathian kan zum zia, zarhtin Biakinn kan feh thu, ka fanu te tla a suak ve te Baptism a nei cih ti thu pawl ka sim. Ka Nu in cu “Ka fa, mi ṭha pakhat na si maw?” tiah in sut lala.

Mi ṭha pakhat si thei ding cu, ka zuam ringring ko ka rak ti. Ka nu in lungkimzet hmel thawn, “Ka fa, ka lo rinsan tuk zo, thla ka rak cam mi a kim zo” tin in ti.

Ka thei thiam lo. A hlan ah in hlon ih, tu lawngah ziangruangah MI THA pakhat na si maw ti a thei duh. Ziangruangah in thlan ter tin ka nu kha ka sut. Ka Nu in “ Ka fa, kei hi na nu ngaingai ka si lo vekin, na pa tla na pa ngaingai a rak si lo”

Ka nu ih a ṭong mi ka thei tikah ka mangbang nasa. Ziangruangah…….? “Sile, ka nu le ka pa ngaingai zo an si?” “Ka fa, nangcu, nu le pa nei lo mi na si. Minung Cells kha copy tuah ih minung a cang mi na si.”

Ka mangbang tuk. Biology ah ka zirh dah mi cu Butlak cloning tuah thei ti asinan minung kha copy tuah thei timi cu ka rak thei dah lo. “Ka fa nang cu Hitler ih cells thawn copy tuah mi na si. Thisa pehtlaihnak lamin kan zoh asile nang hi Hitler pakhat na si ve” in ti.

A Nu cun, “Ralpi II hlanah, Hitler in amah ih cells kha copy ding a duh. Goettingen University ih Bio professor pa in, butlak ihsin copy tuah thei timi a rak hmu suak. Cui Professor pa cu Hitler in a cells kha copy (Cloning) a tuah ter. A aungmin, hluhsauh lo le thah ding a si. Curuangah cui Professor pa tla cu a zuam ve nasa. Netabikah a hluh suah ih kei hi a zohkhen tu dingah in hril’ tiah a sim.

Htiler in, ralkap hretkhet kha keimah kilkhawi tu ding ah kan inn kiangah a ret. Ziangmi biaknak hman biak lo ding tiah a ti. Curuangah ka nu in Biakinn in hruai ngam lo mi si.

Asinan, ka nu leh ka pa cun a thupte in baptism in lak ter. Ka pa sihdan (front line) a feh hlanah ka nu hnen a cah ta mi cu, ‘keimah kha mi ṭha pakhat si ding leh, Hitler ih cang ter duhmi vek cang lo ding kha rak zuam ter aw’ ti a si.

Kan inn hmai-ih um ringring um palik pawl, inn kiltu pawl an um nawn lo tikah ka nu in Nazi pawl ih thlam (kutsung) ihsin luak dingin in thlan ter. Kei kha Hitler ih copy ka si timi a theitu mi hretkhet an um. Curuangah ka nu thawn kan um tlang le, ka hrangah ṭihnung um ruangah in thlan ter mi si. Ka thuhla pawl cu ka nu hnenah an sut ringring theu. Nan zohman in thu fiangfai an thei thei lo. Cui thu le hla a rak thei tu pawl an tar vivo ih an thi thluh thlang. Ziang hmuahhmuah a rem cang thlang ti ka nu in a ṭhencet hnuah hitin in tong ngamnak a si.

Sibawipa in, ‘ka nu ih natnak cu roh zet, nangmah a lo hngak mi si. Atu a lo tong zo, a rei tuk nawn lo ding. Rak hngak ko aw,’ in ti. Cuhnu ah tha a um lo mi aw te thawn “ ka fa, ziang tik hman ah MOSTACHE (Mostache ti a san cu hmurhmul ti a si, an ti duhsan cu Hitler ih hmurhmul lole Hitler ti sawh duhnak hmin sin pakhat a si. Hitler vek in hmurhmul ret hlah) ret hlah aw” in ti. Cumi hnuah ka nu cu nauhniang te bangin a it that. A thosal nawn lo. Ziangtik hmanah a thosal nawn lo.

Ka nu ih ruakvuinak thuhla thaten ka tuahtheh hnuah Gottingen University ih professor pa ka va tong. Thuhla tampi ka sut. Anih tla in Hitler in lo theilo ih a fial thu, cuhnuah keimah ka cang suak dan thu, thuhla a phunphun in sim. Kei tla in leilung pi ka hmuhdan, ka thurauh pawl Hitler thawn a bang aw daan, Hitler ih a tumtahmi, a duhzawng minung pakhat ka rak si lo zia ka sim ve.

Professor pa in Hitler ih DNA ka nei lai. Nangmah ih DNA le Hitler DNA kan test ding. Cuhnu lawng ah thuhla fiang kan thei ding tin in ti. Ka duh lo. Test ṭul lo. A result kan thei khal le man a nei lo zia ka sim. Kei cu Hitler ka si lo. Kei cu Kei ka si. Hitler ih thinlung sungah huatnak lawnglawng a um. Ka thinlung sungah cuvek um lo. Kei cu duhdawtnak thawn a khat mi le duhdawtu unau, upa, ṭhian rual tampi a nei mi pa ka si. Leitlun remdaihnak a duhtu, miphun le miphun, biaknak le biaknak karlak ih rualremnak a hawltu kan si. Hitler in ziang tik hmanah cu vek thinlung a nei dah lo. Curungah………

Kei cu kei ka si………. Kei cu kei ka si………….. kei cu kei ka si.

Original writer.. Lee Chia Tung (Taiwanese)

Na ruahnak

One Response to Kei Cu Kei Ka Si – Part II

  1. Pakhatpa   June 2, 2010 at 7:50 pm

    Siar a nuamzet ih ka thinlung i kuai nasa, hivek siarding ṭhaṭha a ngantu, a tawlreltu nan zate parah ka lungawi.