Keimah Le Falam

Home » Cahram » Keimah Le Falam

By vcth on July 4, 2013.

Falam” timi hi ka hrangah ziangtluk in sullam a nei? Aih cubang a thupi lo! Falam cu Falam rori a si mai. Keimah Falam rori a si mai. Kan pupa pawlih laihri phumnak Falam. Kan pupa pawl rak ṭhangliannak Falam. Leidoral an rak donak Falam. Miphun pi phunkhat semtirnak Falam. Ka neih sun khua. Kei mai ta rori. Pathian ih in pekmi Falam. Cithlahtu pi le pu hnen ih ka comi ka ro neihsiah. Mirang, Tuluk, Kala, Kawl pawl ih khua si lo kei mai khua Falam. Kei mai khua rori. Ka neihsun Falam, i neitu khal Falam.

“Falam” a hmin sal le kawh ka va khop thei lo ve. A mawi, a thlum lawng si lo in hna a ngam ter. Hi hnak ih hmin mawi, hmin ṭha ka thei dah ngelcel maw? “Falam” vun ti duak men hin ka hrangah a famkim. Zumnak, sinak, ruahnak le sunmang phunkim i pek. Falam cu ka theology, ka philosophy khal Falam.

Falam

Khaw dang khaw mawi, khaw ṭhaṭha leitlun ih siarcawk lo lak ah “Falam” a si ve mai. Tahan-Kalay ah Falam a um lo, Mandalay-Yangon khal ah Falam a um lo, India, Japan, Korea, Australia, Norway, Denmark, Germany, England, Canada le US khal ah Falam a um lo. Falam cu Chinland lawngah a um. Tuihlan kum tampi liamhnu Shan Tlaangtluanpi a suah tir lai ah Chinram cu nelrawn lawng a rak si lai an ti hmanah culai khal ah Falam cu Falam a rak si ko ding. Tuihnu khal ah san mureng in Falam a si zel ding. Falam lawng hi ka tii, ka leilung le thli khal Falam.

“Falam” ka hrangah sunglawi in duh a nung tuk aw. Ziangtiklai caan khal ah ka lung a hmui ter. Ka tha a tho ter. Ka lung muril tiang i luah khat thluh. Ka hmin khal Falam ka ti aw mai ding. Pathian thlawsuah dong in fapa te ka neih leh le Salai Falam, Mg Falam, U Falam, Mr. Falam tin a hmin ka sak ding. Fanu ka neih khalle cu thotho: Mai Falam, Ma Falam, Daw Falam, Miss. Falam ka ti thotho ding. An van a va ṭha ding ve. Cutluk hmin mawi cu!. A thi theimi milai hmin men ah “Falam” ka ti le a remthiam ngai ding maw? Falam lawng hi ka identity, ka passport khal Falam.

Farthawk, Balai, Pathangkhan le Cinmual, Vankau, Dawrhlun, Cambari le Lampaa tin Falam a thuam aw. A kiangkap ah a fale khaw tampi thawn Falam a uang aw. Lailun, Rihli, Zianghmuh le Buannel pawl thawn a ceimawi aw. Phunhnam cipciar zet le ṭong phunkim thawn  a ṭang hlum ah in tlangleng ter. Zalen takin danglam in siang. Kawhhran phunkim Falam ah din in awih .Rualremlonak a hmuh le Falam a hni siamsi. A suk a so, nisuah nitlak tiang Falam suahsan in tlanhloh thluh in siang. Falam lawng hi ka democracy, ka unity si ding khal Falam.

Falam ih in pekmi theology le philosophy thawn khawvel ideology lakah ka hmaihngal ngam. Falam ih ka inmi tii le ka hawpmi thli thianghlim ruangah mi harhdam pakhat ka si ve. Falam ih in pekmi ka identity le passport thawn leitlun khawkip le ramkip ka fangsuak ve ngam. Falam ih ka democracy hmangin unity neih thei ka zuam ding. Falam cu ka research, ka development khal Falam thotho.

Salai Ayete (Vankau)

Na ruahnak

2 Responses to Keimah Le Falam

  1. James Mang   January 31, 2011 at 1:55 am

    Salai Ayete na thiam tuk,,,

    thu pakhat te i ruat ter, ziang si tile,

    ka passport parah,,,Falam timi (place of Birth) a rak um ve,,,

    I kai tho rori,,,

  2. ST Beuh   January 31, 2011 at 2:54 pm

    Ka rual Salai Ayete

    Na Ca ngan siar a nuam tuk .Chin Land ih Cathiam suak tam nak Bik nak Falam ti tla a tul ding a bang . Bording School tla a tam si .

    Hang Hnah Hang rah tam zet nak falam.

    Tuhnu khalah Na cangan mi siar rak Bawh tu Ding

    Na rual ST Beuh