Khaw din le Siat (Bualpi)

Home » Thlirnak » Khaw din le Siat (Bualpi)

By vcth on September 10, 2016.

bualpi

By Pu No Than Kap

Chinram ah, hlanlai pupa san ah, duhnak hmun kip ah, khua an din thei. Hnamdang Mirang ih in uk hnu 1896 ihsin “Chin Hills Regulation” timi Dan thar an tuah ih khaw din dan Art. 19, 20 ah ngan a si.

Art. 19 ah, Superintendent (Pengpi Uktu) remtinak tel loin khaw thar din a theih lo, ti a si. Superintendent in a siannak tel loih din mi cu a siatsak thei. ASINAN, Art. 20 ah, Dan kalh ih din mi si hmansehla, khua an balsak asile khaw dintu cemral mi hrang ah, “zangnadawmnak (compensation)” sumsaw Cozah in a pe ding, ti a si. Dan lo ih din mi khua an siat mi cu sumsaw in Cozah in an bawm taktak.

Bualpi khaw din thu ah, Falam pengpi Uktu DC in a pawmpi hnuah, Chinram Cozah hnenah a tul mi sim in khua mipi ih tul mi Electric, Tidai, Zirnak tlawng, tvk., pek ih bawm lam loin, khaw pumpin balsak thluh a si. Ziangruangah? Cutin Cozah in a bawm lonak san cu Tuthing hual (forest reserve) sungah Cozah siannak um loin din a si ruangah ti a si.

Ruat tlak pakhat cu: Ramsung hmun hrekkhat le Sagaing ramthen e.g, Homalyn peng sungih Suikhur laipawl ih thlamte an sak ih khua cang lanta le Chin khua hrekkhat cu, Dan vek ih din an si lo nan, Dan sungah lut dingin Cozah in bawm an siih khaw mipi hrangah tlawng le harhdamnak hrang tiang Cozah in pek an si.

Chin cu zungnaruat thiam miphun kan sizia, kan palhnak khal ah runawk ih humhalhawk kan thiamzia langter ding ah, Chinram Cozah khalin an innpi tiang hloh Bualpi mipi rethei le vansang mangbangpawl hnenah, bawmnak an pek zum a si. Khua khal dinsaksal a si ko ding.

Ziangahtile, Chinram Cozah cu a lubik tiangin Chin pacang an si ruangah, “Dan cu Dan a si” tiin, cabupi vek rorin feh ringring hnakin, Chinram mipi tulsamnak zoh in “Dan lo cu Dan ih cang ding in tuah” asilole “Dan cu rem tul rem ding” tin khawkhang thiam an si ko ding.

Hminsin: hi thlirnak cahram cu Pu No Than Kap in a facebook ih a nganmi VCTH in kan lak sin mi a si.

Na ruahnak