Khua Lian Kam vs Mg Nanda

Home » Thlirnak » Khua Lian Kam vs Mg Nanda

By vcth on May 2, 2017.

Tulai Online ah a hot zetmi thu pakhat cu puaisa Khua Lian Kam in Japan ram ih mi a thlah mi pawl a bum ti thu a si.

Puaisa Khua Lian Kam in Japan ram ah Chinmi minung 15 a thlah hngai. Cui a thlahmi pawl cu hnatuan an ngah lo a silen peisa ka lo khirh sal ding tiah lungkimnak sachuk an nei.

Khua Lian Kam ih thlahmi minung 15 sungin minung 8 cu facebook account hmin Mg. Nanda timi pa hnen ah an thlengih Khua Lian Kam hnen ih an rak pekmi peisa ting 80 ngah sal an duh.

A hrekkhat cu amah Khua Lian Kam hnen ah an tang ih Khua Lian Kam ih Working Visa tuah sak ding an beisei tiah zum an si.

Khua Lian Kam ih peisa a kuan le thuhla a cem

Puaisa Khua Lian Kam in Mg. Nanda hnen ih ummi pawl hnen ah peisa a kuan a si ahcun thuhla a cem ding. Mg Nanda te lam tla in ziang ciamco an nor bet ding zum a um lo.

Tazacuai aw sehla

Mg Nanda le Khua Lian Kam tazacuai aw sehla zo in a neh pei. Japan ram ah taza an cuai ah sehla, Mg Nanda hrang ahcun zianghman sung ding a neilo ti theih a si. Ziangah tile a nih cu third party in harsatuar pawl a bawm ti dinhmun a si. Sumpai a cem laimmi a sung ti lo sung ding ciamco a nei lo. Nan Khua Lian Kam hrang ahcun a sung ahcun thawngtlak thei dinhmun a si ding. Mg Nanda in tetti ah milai 8 a nei, cuhlei ah an rak lungkimnak sachuk pawl tla a nei fawm.

Khua Lian Kam in a thlahmi pawl phatsan in “hnatuan dingin ka thlah lo, visit in ka fehpi mi an si,” ti sehla, Kawlram ih Sachuk an rak tuahmi pawl kha Japan ram thuthennak zung hrangah a thupi pei maw?

Salai Lung Thli Tum vs Chin Journal

Chin Online Media, Hakha tong hmang media, ih a cakbik pahnih a simi Salai Lung Thli Tum le Chin Journal hi an thu fehpit daan a bang aw lo.

Salai Lung Thli Tum nih cun Khua Lian Kam hi mibum a si tiah nasa zetin a phom, nan The Chin Journal nih cun Khua Lian Kam lam an dik deuh vekin an rak ngan. Neta deuh an post mi ahcun “Hi thu ah Mg Nanda ih simmi lawnglawng a dik ah kan lak lo vekin Khua Lian Kam ih simmi lawnglawng a dikin kan lak ve cuanglo,” tiah an ti.

Khua Lian Kam ih vansiatnak

Laimi puaisa tampi hi a tongmi le an tuahmi a deng aw lemlo. Tuanvo kan lo ding ti vek an ti khal le a taktak ahcun tuanvo an lak lem lo. Asinan mahte talbuai in talbuai vivo a siih a remcang dan a rak um. A remcang lo pawl cu an vansia tiah rak ti a si. Cucu Khua Lian Kam lawng silo in puaisa dangdang tla an si ko.

Khua Lian Kam ih a vansiatnak cu Social media ih thilti theinak ruangah harsatuarmi pawl le Mg Nanda ih au-aw cu mi tampi in an thei.

A fehtu pawl teh mawh kan phurh ve pei maw?

Khua Lian Kam in Working Visa ka lo tuah sak ding ti a si. Visit Visa in feh hnu ah Japan ram ah working visa ih thleng leh ding a si. A fehtu pawl in cui Khua Lian Kam ih thu parah pumhlum zumin an feh. Chinmi tampi hi kan harsa ruangah ziang hmauhhmauh parah kan thap aw ngam. Malaysia lam ih feh hrekkhat ih in simmi tla cu vok le ar vekih phur in Malasia thlen a si (tangzin ih feh hrekkhat pawl). Ttihnung a um, Rist a um ti thei na cingin kan pah, kan nor. Cui risk kan lakmi ih a rahsuahmi cu hlawhtlinnak lawnglawng a silo, harsatnak tombor tla a tel. Thei na cing, thei na cing in kan nor ve ko.

Puaisa pawl ralrin an thiam a ttul

Daanlo (illegal) ih ramdang thlah aw hi Chinmi hrangah cu daan sung thil vek a si. Nan cozah lam hrang ahcun Human Trafficking ti a si, ttihnung a um zet.

Tthimnak ah Puaisa pakhat in daanlo in mi a thlah, asinan a mi thlahmi an tluanglo. Hnatuan tla an ngah lo, maw an hnatuan a har zetih a thlahmi pawl an lung a kim lo. Cui a thlahmi innsang maw, anmah thlah tuarmi pawl in cozah hnen ah an report ahcun cui puaisa cu Human Trafficking thawn tlak thei a si.

Kan dung nai te ah Chaungkhuah khawmi nupa te cu Tuluk ram ih mi an thlahmi an tlaung lo ih cui thlahmi sungsang pawl in palik hnen ah an report ih kai an tuar. Curuangah Puaisa pawl tla daan thawn milh aw in mi thlah ding a thupi zet, culo ahcun nasa zetin an tuar thei ve.

 

 

Na ruahnak