Khuavel Daan Thawn Kekar Tlangnak

Home » Cahram » Khuavel Daan Thawn Kekar Tlangnak

By vcth on February 4, 2010.

B.A (Thang), Salai

Camp sungah um mi ka si vekin zianghman ṭuan ding ka nei lo ih, ka caan tampi cu internet ah a cem. Rual le pawl in Online pu, Online Security Guard na si tin in capoh ṭheu. Ka rual nu pakhat in a leng tla suak in laansuat phahphah aw, na thluak va kholh aw tin in ti. Camp officer nu in tla Europe ram a dai tiin, mah khan lawng ah um ringring hlah uh. A leng ah laansuat ringring uh tin in cah/sim ṭheu ih, tuzing cu laansuat ka tum. Ka suak zik te ah internet ihsin nikhua thuthan (weather forecast) ka zoh ih a lengah -11 ti asi. Ka ruat sal ka suak lo le ṭha sawn men ding tin. Nan, netabikah ka suak ko ding tin thu ka ṭhen cet. Angki leh Bawugbi hlum thawn boots thawn, Lukhuh ṭhaten ka khum ih ka rak suak. A dai nasa. Bawngbii zaal sungah kut ret phah in ka feh rero. Keimah vek in laansuat rero mi pawl tla an um phah.

Ka feh phah ah thu ka ruat phah rero…….

*****************

Leilungthlun khawitawk ram um hman sehla minung kan si ah cun minung cinri timi te a rak um. Thailand ka um lai ah Thai pawl in kawlram mi pawl in zohniam. Western lam kan ra ah cun an minung tum sang thawn in zoh ve te auto in zohniam cih ual tin ka ruat ih, melte ka rak hni. Kawlram sungah tla kawl pawl in tlangparmi pawl kha tam le mel in an zohniam ve. Laimi sungah tla…….

Himi hi minung ih kan thinlung ruangah le kiang le kap ih sersiam ruangah cinri timi a rak suak. Mmm.. minung ih cinri (standard) kha thu a ṭhen sak tu pakhat um lai…. Cumi cu thuletnak (response) timi asi!!!!!!

Leilungthlun pi ah kan feh tikah thil cang suak mi pawl parah ziangtin kan cohlang ih ziangtin ka let sal ti hi thil thupi zet asi. A ṭha mi thuhla pawl thawn kan tongawk tikah kan nuam zet. A ṭha lo mi thuhla thawn kan tongawk tikah kan duh lo, kan thin nuam lo….

Si!!!!!, ka ruat ngah mi pawl numbet thawn ka ngan hnik ding.
Leilungthlun ah um mi kan siih, khawvel daan, khawvel thil cang mi pawl thawn kan tongawk rori ding.
Khawvel daan pawl cu kum thlei dang um lo in (upa, nauhak ti um loin) kan tong rori ding.
A tlang pi thu ah cun, thil ṭha thawn kan tongawk le kan lungawi ih, ṭha lo thawn kan tongawk tikah cun kan rehsia
Kan duh mi thil pawl kan tong tikah kan hlawp thlo zet nan duhlo mi thil pawl kha kan co tikah ṭha duainak ah in thlak ṭheu.
Thil fate pawl tla fate vekin kan ṭih, tum mi sinsin cu.. kan lau tuk lawlaw.
Vancung ram asilo ih, duh mi le duh lo mi cu a um ringring ding mi thil asi.
Kan ṭih mi a tam sinsin le kan tuartheinak thazang a mal sinsin. Cui ṭihnak ihsin a rak suak mi result cu thil sual le sungnak lam lawng a suak thlang.
Khawvel daan kha singkhaw (challenge) tuah ding silo. Challenge timi cu… ṭih timi ihsin a rak suak mi thil pakhat a si.
Khawvel daan hmai ah khukbil ding tla asi lo, khukbil cu sung tinak asi.
Khawvel daan cu that theih lo mi thuhla pi pakhat asi.
Khawvel daan cu kan minung sinak thawn a ben aw cih mi thil pakhat asi.

*****************

Khawvel daan tin kan sim ringring ṭheu mi hmuhtonnak (experience) hi rin lo pin le thup le ruk in kan hnen ah khuavang le mithla vekih ra mi asilo. Keimah thawn khualtlawng thlang mi rualpi (partner) asi. Cumi te kha.. kan thinlung ihsin thei suak le lan cohlang asi le kan thinlung le kan thluak ihsin a kel leh in a zongsang leh ding. A sa le a dai khat le khat sawng aw in kan thinlung le kan thluak ah kan tuh lut a ṭul asi.

Khawvel daan kha RAL vek in kan ruat asile…… nitin ral na do ringring a ṭul. Nitin na nunnak kha na ral donak hmun asi ding ih a cem dahlo mi le a cawl dahlo mi do awknak sungah na um ringring ding.
A ngaingai ih na do ṭul mi hi..khawvel daan timi asilo.
“Nunnak cu ral donak” timi tongkam hi a leng ih a ummi RAL thawn kan do mi asilo.
Nangmah le nangmah, keimah le keimah thawn kan do mi asi.
Na thinlung sungih …… siatnak lam le tungdinnak
Nathinlung sungih………. A thim le tleu, dum le rang
Khawvel daan cu kan ral asilo. Cuvek in a hnenah pumhlum ap aw in pawlkom ding thil tla asi ve lo. Khawvel daan timi culeitlun daan pakhat asi ve men. Amah kha Ral tin le Rualpi tiih a tuah rero tu cu nangmah asi ko. Khawvel daan timi cu… amah te a um rero mi Natural thil pakhat asi.

Cumi Natural asi mi khawvel daan kha nangmah in asi tin phuangsuak ding pakhat lawng a um. Cucu khawvel daan timi hi…..nangmah thawn khual tlawngpi pakhat asi ti asi. Cumi na khual tlawng pi ih sia le ṭha, thlum le al thuṭhen cetnak petu cu nangmah lawng na si. Khawvel daan a tum le suk a sang le niam tuah thei tu cu nangmah na si. Khawvel daan ih a aw Volume a ring le dim a rem theitu cu nangmah rori lawng asi ko.
*****************

Vak phah rero in hmai lam ka zoh. Hmailam hlatpi a thleng mi minung tam pi an um. Ka dung lam ka thlir, keimah vekin laansuat rero tu pawl tampi an um ve ko. Ka keh ka vorh ka zoh, pangpar dum ah, hramhring parah, tili kap ah tha bang in a cawl sung tu pawl tla ka hmu. A hrek khat cu exercise a phunphun an tuah phah. A hnu deuh mi pawl cu ka lan hngai vekin a cak deuhmi pawl nih cu in lan ve. A hrek khat cu an hni an khek phah, a hrek cu ṭong lo remrem in an si.
Ka rual……
Ra ve aw…..
Ke kar tlang uhsi (laan kan suat tlang pei uh)

Duhsak nak thawn………..
………………………………..
………………………………….

Na ruahnak