Khui Hmun le Ram Tiangso?

Home » Cahram » Khui Hmun le Ram Tiangso?

By vcth on February 7, 2011.

Tlangsang le hmunrawn an pehzomawknak hmun, ramri te ah a duhdaw aw le a ngaina aw zetmi unau hnihte khua an rak to dah.

Ṭumkhat cu, a nauta deuh pa in a upa ih ngasio hlan in tiva ah nga a vung sio. Simzawng ahcun a ngate  kaihmi a u va hlawm phah cun a ngasionak hlanmi cu a pekir sal.

Ṭumkhat lehcu, a upa sawn pa in a anau hnenah rawl suannak ah ti’n belpi a va hlang. Anau pa khal cun siangzet in a rak hlan mai. Caan a hung rei cuahco nan, upa sawnpa cun a belpi hlanmi pe kirsal ti a nei nawn ta lo. Nikhat cu a nauta deuh pa cun a u hnenah a belpi la ding cun a vung dil. Upa sawnpa cu a ai a thok, a thinheng ciamco. A naupa ih bel cu pe kir mai lo in a rak to ciamco. Cuticun, a duhdaw aw derhdo zetmi cui unau hnihte karlak ahcun hmuhthaimawlonak le rualremawklonak tiang a rung thleng. Khawkhat le hmunkhat te ih rak um tlang ringring mi, an pahnih ih lungkimnak thawn ramri tiang an rak ṭhen aw. Nauta deuh pa cun a sannak hmun tlangpar lam panin amah te khawsa dingin a upa cu a rak tlansan. Upa sawn pa khal cun a niamnak hmun hmunrawn lam panin amah te khawsa dingin a naupa cu a rak tlansan ve.

Tlangsaang le hmunrawn ti’n ramri an rak ṭhenawk ruangah nauta deuhpa a simi kan pu “Chin” ih cithlah, kan nih chinpawl cu tui sunni tiang tlangsang parih kan umnak a si ih upa sawn pa a simi kan pu ih uu (an pu) “Kawl” ih cithlah an nih, kawlpawl cu tui sunni tiang hmunrawn ih an umnak a si ti’n mirang ca ih nganmi Kawl Thuanthu Roling (Myanmar Folk Tales) cabu sungah ka rak siar dah.

Kan pu Chin ih cithlah, nang le kei kan sanah teh?

1947-48 kumih kan pu Vom Tu Mawng te le an pu General Aung San te pawlih rualremnak le zalennak an rak neih tlangmi kha tuisunah in laksak in, in pekir sal maw? Mirang pawl ramsung an luh ih rampi an lon laiah kan ralrelthiamnak kan rak pe. Japan pawl dawisuah an si lai khalah kan huaisennak kan rak pe. Rampi huap in bangranten zalennak ngah theinak ding khalah kan tluangtlamnak le rinumnak pawl kan rak pe. Ramsung ralbuai lai khalah kan rinumnak, huaisennak le ralhatnak pawl a phunphun in kan rak pe.

Cupawlcu in pekir sal maw?

Kan pu “Chin” bangin kan mai ta, kan mai covo la dingin kan va dil sal maw?

In rak to maw? An thinheng ciamco maw? In hmuthiam in, in rualrem maw?

Asile,

Asilole,

Khui hmun le khui ram tiangso kan tlansan hrihding?

Ziangtik tiangso……..?

………………………?

Hivial in ka tawp mai ding! Ngan pehzom vivo sehla ka cafung le cahnah hi ka buarsiat thluh pang ding..

Thuanthu roling timi hi phuahcop hlirte kan ti mai kem?

Salai Ayete (Vankau)

Na ruahnak

One Response to Khui Hmun le Ram Tiangso?