KIA le Kawl Ralkap thuhla mal lai

Home » Thlirnak » KIA le Kawl Ralkap thuhla mal lai

By vcth on October 22, 2016.

kia

Ziangruangah tui ni tiang kahawk nak a suak?

1947 Panglong lungkimnak Daanhrampi cu a pingpeng in a feh ruangah tlangpar mi a si ta piang in ramthu khel lam in siseh, hriamhrei in siseh a pialter tu Kawl Cozah cu kan rak do thok.

1961 ah Shan ram Tawngkyi khawpi ah 1947 daanhrampi nungter sal ding le Federal daan in hruai aw dingah Tlangpar mi pawl ko khawm aw in thurel sal a si nan U Nu cozah leh ralkap in Federal cu ramthen tthek awknak a si aw tin an duh lo ih hlei ah U Nu in ram pumpi biaknak cu Buddist a si ding tin thu a run suah cih tikah thlangparmi khrihtian a si ta piang cun kan do ih a hleice in Kachin pawl in nasaten an do ih KIO ti mi an din cih.

1988-1995 ah Kawl ralkap cozah in tlangpar hriamkai pawl daihnak tuah uh si tin a sawm khawm hai ih KIO tel in pawlkom 21 thawn remdaihnak an rak tuah, hi tawk ah KIO pawl cu casung rori ah hminkhen an tuah ih Kawlram pi daantuah a si len KIO tel ding ti leh KIO ralkap umnak hmun pi 11 pe in lungkimnak an rak tuah.

2008 daanhrampi Kawl ralkap in a run tuah tikah KIO a sawm nawn lo. Kawl ralkap in an thukham an pahbal riai. Cuhlei ah KIA ralkap pawl kawl ralkap sungih canter ding le ramri hgnaktu dingah Kawl ralkap in KIO pawl cu a fial sal tikah an lakah remawk lonak nasaten a suak ih Kawl ralkap pawl cu a rak thu kham cia mi KIO Sakhan hmun 11 ah a tomtom in an lut, cuticun kum 17 sung daihnak thukham anrak tuah mi cu 2009 kum ah an siat bal ta.

2010 hrilawknak ah KIO in thinsau cuh in an mah lak ih upa pakhat hlirawknak lut dingin an tim tuah nan Kawl ralkap in an rak siang lo, KIO leh Kachin mipi ih an tih bikmi le an duh lo bik mi, second pakhat sungih Myitkyina khawpi hloral ter thei tu, Myitsung tidawl pi cu Kawl ralkap in a hun tuah deuhdeuh, KIO, KIA ralbawi pakhat Kawl ralkap in an kai ih a kut an tan, meisa ah an em ih a ruak in KIA pawl an kuat cin cun KIA pawl cu a sat ih an sa hiamhiam ih a ling in an ling thlang ih cuticun meiling vam pi cu a sunzan sur in tui ni tiang a um.

June 9, 2011 in meivampi zian leh cerek cu Kachin ramsung ah sunzan in vanruah sur in a sur dumdo. Tuini tiang meisa alh a hluai vut vo lai, zo in a mit thei ding? Kan Pathian lawngin a mit thei ding . Ziangruangah meisa a alh? 1. Ramkhel ruangah, 2.Pursum leilawnnak, pumcawmnak ruangah, 3.leikhur sungsuak ruangah, a si bik.

Thlacam ding pawl, 1.Kachin mipi thlaphang pawl hrang, 2.KIA, KIO pawl hrang, 3.Kachin ramsung um kan unau Khristian pawlhrang, 4.Ralzam inn le lo neilo pawl hrang 5.Dai leh rem ten Kachin ram a um thei salnak ding hrang.

Note, Hminsin, Ngan peh vivo lai ding.
By Kenneth Lian

Na ruahnak