Kiang le Kap Ruangah Thleng Theih Asilo

Home » Cahram » Kiang le Kap Ruangah Thleng Theih Asilo

By vcth on November 3, 2013.

Plato-and-socrates

B.A (Thang), Salai

Socrates cu nupi a nei hlanah a rual le pawl thawn inn-khaan fate te sungah an um tlang. Khaan fate zet nan, Socrates cu nitin lungawi te in a rak nung. A rualpa pakhat in “hitluk minung hman to le ding ṭhiṭha thei lo mi khaan fate te sungah ziang tin lungawi ten na um thei?” tin a sut.

“Rual le pawl thawn um tlang tikah.. mah duh caan ah kan thuruahnak le, kan thinlung sung um mi pawl kan hlawm aw thei. Himi hi in nuam ter tu pawl an si lo ding sawm?” tin Socrates in a sawn.
Cuhnu ah a rual le pawl cu nupi an nei ih cui inn ihsin an suak thluh. Cui inn khaan fate te sungah cun Socrates pakhat lawng a tang. Asinan, a hlan vekin nitin lungawi zet hmel thawn a nung rero ko.

“Mah te lawng um pi nei lo in na um nan, ziang tin na lungawi thei?” tin a rualpi pawl in an sut lala. “Cabu pawl tampi ka nei. Cabu pakhat hi ka hrangah saza pakhat asi. Hitluk saza tampi thawn um tlang ih an sim mi pawl ruat in zir rero mi cu ka nuam aw rori” tin Socrates in a sim sal.

Kum rei lo ah Socrates tla nupi a nei ve. Nupi nei hnuah innpi pakhat ah an ṭhawn aw. An inn hi dot 7 lai asiih, tangtabik dot ah an um. Tangtabik dot ti cu a bal bik, hna tla a set bik, humhimnak tla a um lo bik mi asi, cu bet hlei ah inn par lam ih hnawm pawl tla a rak thlak ṭheu.
Cuihmunah Socrates cu lungawi ten a nung rero kha a rualpa in a hmuh tikah “Hivek khaan ah ziang tin lungawi ten na um thei?” tin a sut lala.

“Tangtabik khaan ah um cu a remcang tuk si. Lut ve ten inn si cih. Thilri pawl tla thiar a ol. Rual le pawl an ra le tla in hawl ol. Dotkhat hnu dotkhat va kai ih sut rero a ṭul nawn lo. Ka lungawi bik mi cu inn hmaiah pangpar pawl le hanghnah hnagrah pawl ka cing thei mi tla an si” tiah a ti.

Tangtabik khaan ah kumkhat hrawng an um hnuah a par tabik si mi dot (7)nak ah an ṭhawn aw lala. Ziangahtile, mi thar a rak thawn mi innsungsangah putar pakhat a tel ih inn par sile a hrangah a kai a har ih Socrates te sawn an ṭhawn aw.
A par tabik ah a um ve lala ko nan, Socrates cu lungawi zet in a nung rero ko.
A rualpa in “ziang ruangah lungawi te na um thei thotho?” tin a sut lala.

“A par tabik dot ih um hi a ṭha si. Nitin lilawn tum/kai ṭul ringring ih damnak hrangah tla a ṭha. Exercise pakhat asi. Nitleu ṭhaten ka ngah ih ca siar tikah mit na nawn lo. Sun tla zaan tla ziang thawngvang a um lo. In rak ti hnaihnok tu um lo pi” tin a ti sal.

Cui a rualpa cu Socrates ih tlawngta Plato a ton tikah “ Na saza Socrates cu a um nak hmun pawl a ṭha lo, rem lo zet nan a lungawi thei ringring ti” tin a ti tikah……

Plato in “Thu Ngaingai in minung pawl ih kan nun le kan um daan (mood) thuṭhen cetnak a tuah sak tu cu Kiang le Kap, Kim veel silo. An mah ih an thinlung sawn asi” tin a sawn.

Na ruahnak

4 Responses to Kiang le Kap Ruangah Thleng Theih Asilo

  1. Anonymous   January 15, 2010 at 8:47 pm

    A tha zet na ngan mi.

  2. suinei   January 16, 2010 at 9:53 am

    Zir ding tha ngai ngai si.

  3. Anonymous   January 16, 2010 at 5:37 pm

    Na thiam thei tuk aw ! mi nung nun nak ah kha mi nun nak nei ve cio seh la a nuam tak ding ti! na thiam tuk cawn tlak bak si

  4. Kai Te   January 18, 2010 at 7:54 am

    A tha tuk…
    Ni tin nun ah Socrates ih nun dan vekin
    a tha zawng lawng2 ih zoh thiam mi sithei vesehla duh ava um ve.