Kiosa Lal Fapa ih Fimzirnak

Home » Cahram » Kiosa Lal Fapa ih Fimzirnak

By vcth on June 12, 2013.

Khuahlan laiah Kiosa siangpahrang pakhat a um. Cui siangpahrang pa cu a kum a upa vivo thlang. A siangpahrang sinak sawngtu ding hrangah a bei a dong. Ziangah tile fate a nei thei lo. A tar zawngah Abraham bangin fapa duh um tak pakhat a nei. Cui a fapa te cu a duhdawt zet. Fimthiamnak famkim ngah ter a duh. A tha a cak zet mi Vuipi hnenah fimthaimnak a zir ter zik. Asinan a ruat sal ih Vuipi cu a tha a cak, ral tawng a thiam nan thluak ih hnaṭuannak lamah a tlasam deuh in a hmu. Curuangah fimnak famkim a neitu ramsa kha a hawl. Ramsa lakih fim bik tiih an ruah mi cu Sumbuk a si. Curuangah a fapa duh tak cu Sumbuk hnenih fimthiamnak zir ter dingah a lung a kim.

Kiosa Lal Fapa

Kiosa lal fapa te cu a kum a kim fimthiamnak zir a cut in a pa in Sumbuk hnenah cun fimthiamnak a zir ter. Siangpahrang fa cingcing, Kiosa lal fa cu a teimak nasa. Cawlh caan hmanah cawl loin a ca lawnglawng a zoh. Sayakyi Sumbuk tla cun a tithei tawkin a theih mi fimthiamnak hmuahhmuah cu a zirh. “Ziangtikin thla a tang thok, Ziangtik ah Buu tuah le a rem cang, ziang tivekin rawl hawl daan” ti pawl a thiam tawkin an zirh aw nasa.

Tikcu le caan a liam vivo. Ni in a zarh, a zarh in thla, a thla in kum cuti cun fimthaimnak cu a zir suak. Sumbuk tla cun fimthiamnak famkim a ngah zo a si tinakah ca tlap te a ken. A pa kiosa siangpahrang pa cu a lungawi tukah a mitthli hman a tla. Cutin inn lamzin ah an pa fa in an thlung. An tlun zin ahcun kum 10 sung an ton aw lo karlak ih an ngai aw zia, ziang vek hmuhtonnak an nei ti pawl an hlawm aw khawm.

Kiosa Siangpahrang pa cun a tlangsuak upa pawl a ko khawm ih khua le ram ṭhansonak hrang thurel khawmnak an nei. Khua le ram hrangah thuhla ṭhaṭha an rel. Tlangsuak upa pawl cun fimthiamnak famkim thawn a rak tlung thar mi Lal fapa ih ruahnak ngai an duh. ‘Lal fapa, nang hi fimthiamnak famkim zirtu na si, Khua le ram hrangah ruahnak ṭhaṭha na nei ding kan zum. Na ruahnak in hlawm ve he’ an ti. Lal fapa cu zam rang ten a ding vukvi. “Tu khuasik a reh zik thlang. Buu tuah ding hrangah caan ṭha a si. Khua le ram ṭhansonak hrangah kan zaten Buu tuah uhsih,’ tiah a rak ti. Tlangsuak upa pawl tla cu ziang ti-ngaihnak an thei lo. Pakhat le pakhat an zoh aw.

Fimthiamnak tihi minung kan nunnak ih thil thupi zet pakhat a si. Kum 5 kan ti ihsin kan nu le pa in tlawng in kai ter. Cuti cun cozah tlawng kan ṭheh in Phunsang tlawng kan kai. A hrekkhat cu Master an kai bet. A hrek cu Ph. D tiang, Ph.D hmanah dothnih dotthum tiang an kai bet. Fimnak ngah ding hrangah kan zir nasa.

Fimthaimnak cu a mahte lawng a ding thei mi thil a silo. Nunnak timi thawn a peh aw ringring. Fimthiamnak cu kan nunnak hrangah a si. Kan nunnak a ṭha deuh ih ke a kar theinak ding, kan peng le ram a ṭhanso theinak ding, cu pawl hrangah fimthiamnak cu a thupi nasa. Tlawng ih kan rak zir mi pawl cu zirthiamnak a si. Cui kan zirthiamnak in fimthiamnak a suahpi lo ahcun thil ṭha a si lemlo. Kiosa lal fate ih a zir mi fimthiamnak vek a si ding. Mi tampi khua le ram ṭhansonak an ruat laiah Buu sak ding lam kan ruat ah cu a poi mawh zet ding.
Zirnak ihsin fimnak ah………
Fimnak ihsin mah bulpak nun le kiang le kap hrangah………

Francis Cung Bik

Hminsin: Russia thuanthu tawi sirhsan ih ngan mi a si. Oct 29, 2009 ih rak ngan mi

Na ruahnak