Kum Zabi 21 le Kan Ṭuanvo

Home » Cahram » Kum Zabi 21 le Kan Ṭuanvo

By vcth on August 25, 2010.

21st-Century

B.A (Thang), Salai

Tulai leitlun ih santilaun pakhat cu pemawnak (migration), a ṭhangso mi ram ih vainak ti hi a si. Hih thlipi in kan lai mi pawl in nuai nasa. Hih santiluan hi kan lai mi sung lawngah si hmang maw ka ti nan a rak si bik ce lo. Ram ṭhangso lo, a dotthumnak leitlun(3rd world) kan zaten ram cangkang cu kan pan cio. Hi tiih kan feh mi hi can tawi hrangah cu a ṭha ko nan caan sau kan thlir tikah cu thil ṭha a si lem lo. Phunpi, hnampi hlo ter tu a si thei. Ziangtin, ṭihnung le tuk sum in………….

Leilungpi hi IT le luxury in a ṭhangso bik mi saan ah kan thleng. Asinan, minung nunnak (or) a leng lam nunnak a sang sinsin nan khat lamah kan thinlung/ lungput lam ah kan tha mal sinsin a bang. A caancaan ah ka ruat ṭheu, hihi chemical kan ei tamtuk ruangah a si pei maw tiin.

Hlanlai ah harsatnak, buainak tum pipi a um ko, cu pawl hi poisa tuk in kan rak ruat ṭheu lo nan, tusaan ah cu malte kan buai hman ah buai tuk vekin kan um ṭheu…… Cumi hlei ah Phun lungput (Nationalism) timi khal hi thupi ah kan ruat nawn lo. Phun lungput (Nationalism) thupi timi sim rero mi pawl hman san man nawn lo vekin hmuh an tuar sawn riangri. Cutin cu formula pakhat kan suah thei ding ka zum. Leilungpi ih ṭhangsonak le Phun Lunput hi a ling ta let in a um.

Curuangah a tu saanthar mino pawl hnen ka sim duh mi cu………
Minung pakhat kan si ve ten, mi pakhat dinhmun in kan suak ve ten kan ngah mi kan sinak (identity) timi a um vekin khatlam ah a suahpi ṭuanvo timi khal kan nei cih. Kan Pi/Pu pawl ṭuanvo ṭhaten an rak ṭheh suak ruangah tuni kan mah pawl an ro kan co rero mi a si. Curuangah hmailam nonawn, kan tesinfa pawl hrangah a tu hnak in a ṭha mi Ro tanta thei ding zuam ding hi tu lai saanthar mi no pawl ih ṭuanvo pi a si. Tulai saanthar mino pawl in “ṭuanvo” timi ngam zetin ṭuan duhnak thinlung le tuan suak thei mi si in, hmailam santhar nonawn pawl hrangah a tleuvar mi zin sial sak uhsi.

Curuangah mi pum a mal zet mi miphun a si mi kan Chinmi ṭhangsonak ding hrangah cu laimi pakhat cio parah ṭuanvo kan nei…. Mah sinak, mah mi phun le mah tesinfa hrangah a ṭha hnemtu, ro ṭha pek theitu si ding kan zuam tlang pei uh.

Zuam sinsin uhsi MINO Pawl……..
Hninsin: Falam Phunsang Tlawngta Pawlkom, Yangon tuah tum mi Maganzie hrangah ngan sak mi cahram asi.

Na ruahnak