Laimi le Bawhlung

Home » Cahram » Laimi le Bawhlung

By vcth on October 19, 2010.

Naunaute

Laimi lak in ram pi ai-awh bawhlung sit thiam kan neih sun lakih pakhat a si mi Lal Ceu Luai cun “kawl ram ih um kan unau pawl lak ah lai mi hi bawhlung duh bik le zuam bik kan si” tiah a rak ti dah. Cumi cu a dik zet tin ka hmu. Kan pu, kan pa pawl san lai ihsin kan rak zuam zet ih bawhlung sit zuam awknak khal a rak tam zet.

Tuisun ni ah tla cun bawhlung zuamawknak puai hi siar cawk lo in a tam. Khua tin kim in bel an suah, mi hmin nei hngilhlo-nak ah si maw. Puai a um ah siseh Fellowship kan tuahnak ah siseh, Bawhlung sit zuam awknak hi tello theih lo vek ih a ruat tu kan si.
Laimi pawl in ziang tiang in bawhlung sit kan uar ti len: kan khua kan peng lawng ah si hlah khua dang ram dang kan thleng khal ah bawhlung sit zuamawknak tete kan nei vivo. Thil ṭha zet le lungawi um zet in ka hmu. Ahleice in Yangon ah lai mi pawl hoha nak in bawhlung sit zuamawknak hi kumkhat ah a mal bik vei 3 cu um thei ringring. Tui 2010 ah tla cun zuamawknak vei (6) tiang a um thei. Kan unau pawl lak in zuamawknak ngaingai kumkhat ah vei khat nei thei hi an um lo ti seh la ka sual ciamco ding ka zum lo.

Laimi pawl bawhlung kan duh tuk ti cu a fiang ngaingai ko ka ti. A silen kan duhnak par ah ziang tiang kan feh pi. Ziang tiang kan ṭan pi. Tuisun ni ah kawlram pi aiawh in laimi aiawh lek thei mi mi nung paziat kan nei. Kawlram ih zuamawknak sangbik MNL ah zo si tel ban (Second team ih tel ban tu pathum li lai cu an um).

Ziang mi ah si pei kan sam. Bawhlung sit zuamawknak len kan nei tam bik kan ti fawn. A silen laimi lak in thiam hleice kan nei thei lo ruangah si pei maw. Tuisun ni ah kan ruat a cu zo tin ka hmu. A ruat khal nan rak ruat rero zo ding ka zum.

Mi tam pi cun hitin an ti lai mi pawl in thlei dang tuk. Ziang khal ah kan tel ban lo. A dik ko. Nan a thu pi bik mi cu a silo. A thu pi bik mi cu lungrual asi. Lungrual ten tang tlang sehla a cang thei lo mi ziang si um. Lai mi ai-awh in Football Culd pi pakhat nei ve thei sehla. MNL zuamawknak ah tel thei in lai pa cang thiamnak hmuh thei seh la. Kan unau dang pawl in in thlei dang ngam ngaingai pei maw.

Bawhlung a duh men tu mi phun siloin Bawhlung lam a ṭhanso pi tu miphun kan si theinak ding ah nang le kei kan lung rual a ṭul.

Na ruahnak