Leithlun le Thlipi Pathum

Home » Cahram » Leithlun le Thlipi Pathum

By vcth on October 31, 2015.

B.A (Thang), Salai

Third Wave

Karl Marx in ‘Santiluan thleng’ timi cu Sanpi pakhat kan thleng, Santhar hmuhsuak, dengfel fimthaimnak (Technology) pawlin San pianhmang, dun le daan (system) pawl an ṭulnak va belh kha a si a ti. Cui Santhar a rat tikah ṭhansonak a rak dawnkhamtu Sanhlun Nunphung, Ram hruaitu le mipi pawl cu an buai ṭheu. Cui caan cu Mipi tharthawhnak caan (social revolution) a hramthoknak a si tiah Marx in a ti.

A cem zo mi kum hra sung kan zoh asile ram cangkang, cet lam thangso mi ram pawl lawng siloin, ram farah, a dotthumnak ram pawlah tla Ram thuhla, Pursum leilawn thuhla, Nunphung le dun le daan pawl tla a rak thleng aw ve nasa. Cu ti thleng awnak cu rin lo pin a rak cang mi kan ti thei pei maw? Tusanah ruahnak, policy pawl, Capitalism, Communism, Socialism ti pawlin buainak an suahpi lemlo. Cuhnakih thuk sawnih a um mi thil pawl ruangah an si sawn. Daanhlun, Sanhlun cu a cem ti kan hmu thei vekin Daanthar, Santhar, Nunphungthar a suak ti tla kan mithmuh asi.

Leitlun tharthawhnak (Revolution) pawl kha tifingrait ih Thlipi (Wave) thawn Alvin Toffler in a rak tahtthim. A caan a kimih cui Thlipi pawl an hran tikah zianghman in an dawn kham thei lo. Minung kan nunphung, nuntukhausak daanah tla Tsunami bangih a cak mi Thlipi a hranah cun zohman in kan kham thei lo. Nunphung, kiang le kap pawlkom (society) pawl kha a hram ihsin a fen hlo theh.

Thlipi pakhatnak or Agrarian Revolution:

Minung thuanthu ih hmaisabik a rak cangmi Thlipi cu a cem zo mi kum 10,000 BCE hrawngah a rak cang mi Agrarian Tharthawhnak asi.

10,000 BCE hlanah minung pawlih nun kan zoh sal sehla Sadawi, Sapel dinhmun an rak si. Sadawi, Sapel sanah cun minung hi umhmun pakhat ih rak um tihi thil harsa zet a rak si. Cuhleiah mibur tumpiih um tla a rak theih lo. Mah le milai tin bur fate ten an um cio. Sadawi, sapel tifamcu hmun dang, tlang dangih tthawn aw vivo, vai vivo cu a ttul. Cuti harsazet ih rak cawm awnak ihsin Cicin thlaitlak (agriculture) fimthiamnak kha an rak hmusuak. Cicin thlaithlak an thaim hnu cun khau pakhatah an finkhawm aw ih nuntu khawsaknak an rak thok.

Pakhatnak Thlipi cun Cicin Thlaithlak thupi zetih rautin minung pawl hmunkhat ih burkhawm ih um timi nundaan thar a suahpi. Lothlo in an rak cawm aw. Hmun dangdang ih thawn aw ruri a ttul nawn lo. Cuticun uk aw daan, nunphung pawl an rak tuah suak vivo. Leitlunah minung pawlih nun le phung timi painhman te hmuh theih a rak si thlang. Uktu, Bawiphun, Sal, riantu, Ramuk, ram neitu ti pawl an um vivo. Kaihhruai awnak ah Bawiphun, Lal pawl ih kaihhruainak (Aristocracy) uknak san tiih kawh tla asi. Hih sanah Ram thuhla (Politic), Pursum leilawnnak (Economic) le nuntudaan (Social) pawl cu thupi ih rak ruat asi lemlo. Ziangah tile Cicin thlaithlak lawng kha an zeizongza a rak si.

Thlipi pahnihnak or Industrial Revolution

A liam zo mi kum zabi 3 hrawngah a rak cang mi Cet Tharthawhnak cu Pakhatnak Thlipi ih Nunphung le thil um daan hmuahhmuah kha a taw le lu a thleng theh. Cui thleng awnak cu Thlipi pahnihnak tin an ko. Khawpi tumpipi pawl a rak suak ih Pursum Leilawnnak a thupi zet thlang. Khawte ih um pawl khawpi ah an vai. Cet thilri pawl le Fiamthiamnak thar pawlih thathnemnak ruangah pehzom pehtlaih awnak a ol vivo.

Minung tam zetih ttaun a tul mi cetzung, Tlawng tum pipi, mipi aw ngai-ih ram hruai aw daan tivek pawl a rak suak. Ttong dangin kan sim asile cu Cet Tharthawhnak cu Mipi timi kha thupi zetin a rak suak ter. Cetzung tla-in thil pakhat kha tampin an suah. Mipi tampi ih hmantheih ding ti an beisei. Hnattuan tla tikcucaan thawn hanttaun a tul. Cui an kiangkap ih thil cang rero mi cun nundaan (lifestly) pakhat a suahpi. Peisa neih timi a thupi zet. Peisa neitu cu dinhmun sangih zoh an si. Ziangah tile thil neitu an si. Peisa neilotu pawl cu hnattuan tu an si. Mizaran le Milain tin miphun pahnih in an then aw. Hih pahnihnak thlipi cun leitlunah nunphung thar a suahpi.

Pakhatnak thlipi hi leilthlun ihsin a hlo rori ti cu silo. Tuni tiang hlan lai pi le pu saan lai vekin thih tiang lothlo ih cawm aw mi minung siar cawk lo an um ve rero lai ko. Ziangkhal lole cumi Sanih a rak um dah lo mi Tlawng, Cetzung, Siizung (zato), Khawpi le mipi thupit ih uk aw daan ti pawl a suahpi. Pakhatnak thlipi ih a thazang cu a mal vivo. Cicin Thlaithlak sanih thazang a rak nei zettu Siangpahrang, Lal, Ram uk pawlih thazang cu a cem cuahco. Cui a tthangso mi ram pawlah cun Lo hna tla cetih ttuan asi thlang. Mi pakhat in Lo tum pipi an ttuan thei thlang.

Thlipi Pahnihnak Sanah Ruahnak tum zet pahnih a rak suak. Cucu Capitalism le Communism ti asi. Capitalism ti cu mi pakhat in sipuazii, cetzungih neihnak hmauhhmuah nei thluh, neitu pakhat ti nak a si. Communism ti cu neihnak, neitu sinak kha mi pakhat hnenah siloin mipi hnen lole mipi aiawh mi pawlkom hnen ih um ti asi. Minung bulpak neihnak tha a pek mi American ram vek Democracy a um vekin, Bulpak neihsiah tha a pelo ih thil le ri, cetzung pawl hmuahhmuah cozah ih kut sung a ret mi Union of Soviet Socialist Republics Ram vek tiin hmun hnih in an then aw.

Ahleice in Soviet ramah cun centralization an hmangih Ram thu, Pursum leilawnnak, le Nuntu khawsak daan pawl tla cu central ihsin an kai thluh. Centre ih thu pek vekin ziang hmuahhmuah a feh thluh. Khatlamah Democracy ram pawlah cun Ram thu, Pursum leilawnnak, Nuntu khawsaknak ah zalennak an pek. Sumdawnnak ah zalennak an ngah tikah a theih mi thuhla, fimthiamnak pawl tla ol ten an hlawm aw thei. Cutikah a ti fekfek mi Centralization hnakin thuhla thar, ruahnak thar ol deuh le rang deuh in an ngah ringring.

Soviet ram le Communist ram pawl tla Cet lam, Ral hraimnam le tuah thei mi tampi an hmu thar ko nan, Computer parah ih hram a ttohmi electronic dengfel fimthiamnak a suak hnu in cu American, Japan leh Nitlaknak Europe pawl an zuam thei nawn lo. Ralpi II nak hnu, 1950 hnu in Electnoc fimthiamnak a thangso vivo. Computer, awkhumnak, Copy nak ti pawl thil tam zet mipi ih hman thei mi pawl an sersiam vivo. Cui thil pawl cu Tlawng Inn, Siizung, bulpak inn ih hman cu an si. Automatic ih hna a tuan thei mi cet pawl tla a rak suak. Cetzung pawl ah tlun le tang pehzom awnak (Vertical relationship) a cem vivo ih a phei zawngih pehzom awnak (Horizontal) dun le daan pawl kha hman a si vivo.

Thlipi pahnihnak cun Mizaran din hmun a suahpi. Cetzung ih hnattuan tu cu rampi mipum zatek ih a tam sawn an si. Democracy ram pawlah cun Milain (capitalist) pawl an suak vekin Communist ram pawlah cun Uktu (Centralist) pawl tin leilungpi cu an khal. Thlipi pahnihnak cu Pursum leilawnnak hram a ttoh mi San pi a rak si.

Thlipi pathumnak or Information Revolution

Kan leilungpi a thaw le a luu cu a pathumnak thlipi cun a hram ihsin a let thluh sal. Cui thlipi cun leilungpi kha cak zetin a tlan ter. A laim cia mi sanhlun pawl kha ngam zet in a tawng. Leitlun khauza ramkip ih kan hmuh ton mi Dengfel Fimthiam Tharthawhnak (Information Revolution) kha zoh lo ih um a theih nawn lo.

A laim cia zo mi kum 50 hrawng ihsin Thlipi pathumnak cu a hran a thok rero. Dengfel Fimthiam Tharthawhnak cu a cak zet mi kekar thawn kum sawm tel pakhat hnu pakhat a ra vivo. Fimthaimnak sang zetih tuahmi Electronic thil pawl, Computer Networks, Sattalite System pawl kha ramkipah hman vivo asi. Hih sanah cun Fimthiamnak, Thu (information) theihnak kha tha a nei bik mi le a cak bik mi thil pakhatah a cang.
Thlipi pathumnak ih a hran pi mi Pursum Leilawn Daan cu theihnak hram a ttohmi a si. Leiram, hnattuan thazang, thil le ri, sumpai a zin ti pawl cu Thlipi pahnihnak ih thil thu pi zet an sinan Thlipi pathumnak ah cun thil thupi an si lem nawn lo.

Tulai Sanah Kehdeng (leftist), Vorhdeng (rightist) tivek ih kum zabi 20 thok lamih Niangnganzii pawlkom pawl an buai rero mi pawl tla zianghman a thupi nawn lo. Santhar ih a suak mi santhar nonawn pawl tla cun Kehdeng, Vorhdeng cu ziang a si ti hman an theih pi nawn lo. Tusan-ah cun Niangnganzii ti tla a mah te lawng ke a kar thei lo. A leng lam pawlkom pawl thawn kutkai aw in hna an tuan tlang a ttul.

Tui Sanih buainak in suahpi tu thil pakhat cu Thlipi pahnihnak le Pathumnak karlak ih thazang zuam awnak kha asi. Cet Tharthawhnak sanih nunphung tha a pe tu le Dengfel Fimthaim Tharthawhnak sanih nunphung tha a pe tu pawl karlak ah theithiam awklonak, buainak a rak suak theu.

Dengfel Fimthaim Tharthawhnak tla buaithlaknak cu a nei ve. Cucu fimthaimnak, thu le hla, thil le ri pawl hi a thleng aw cak tuk lawmlam. Nazi tin kim, Nitin in thil thar a rak suak. Cuvekin Fimthaimnak theihnak pawl tla a thleng aw ve ringring. Cui cak zetih a tla mi San thawn tlan tlang ding cu thil harsa zet cu a si ve. Cuvek thiamthiamin Uk aw daan, Pursum Leilawn daanah tla Daan pakhat kha tahfung ih ret a har sinsin. Ol ten tleng, thawn a theih mi (flexible) daan pawl hman a ttul thlang.

Tusan-ih a nung rero mi kannih pawl hi Thlipi pahnihnak thazang a cak lai fangih a rak suak mi kan si. Cuvek tthiamtthiamin Thlipi Pathumnak tla cu kan hmai rori ah kan mitin kan hmu. Tuisan Minung pawl hi kum zabi 21 sung kan rak lut thlang. A ra lai ding mi kan hmai lamah Ziangvek dun le daan a suak ding, ziang tivekin a thleng aw ding ti ruat cia cu thil har zet cu a si. Asinan Thlipi pahnihnak cu Mangtha tin kan kut kan zap san vivo ko ti cu a fiang.

Hmailam santhar ih nunphung thar cu.. tuniah a thok phah rero zo. A sang zet mi dengfel fimthiamnak a neitu pawl thawn lawng a pehpar aw mi tla cu asi bik cuang lo. Ram thangso, Ram cangkang, Milain ram lawng hmuitin ih a feh mi San tla cu asilo. Ram tinkimin, farah ram siseh, mi lain ram siseh, thangso ram siseh, thangso rero lai mi ram pawl siseh, mah le ti thei tawkin, kilkipin mah le neh tawk thazang ten kan leitlunpi ah cu kan tlan cio.

Netabikah… Thlipi pathumnak ah Ram Uk, ram hruaitu (politician) pawl hnakin Pursum leilawntu, sumdawng (Business person) pawl kha a rak thupi sawn thei…………….. Ram hruaitu(Politician) le Niangnganzii (Politics) pawlhi Sumdawng pawl (Business Person) le Pursum leilawnnak (Business) tangah a thleng leh men thei………………..

Ronmi:
• Salai Kipp – The Start of Third Wave
• Alvin Tofler – The Third Wave
• Alvin Tofler and Heidi – Creating a New Civilisation (1994)
• Kyaw Win – Speaking with Toefler

Na ruahnak