Leitlun Hruang

Home » Cahram » Leitlun Hruang

By vcth on June 20, 2013.

Francis Cung Bik

Kan dung April thla ah “South Asian Association for Regional Cooperation” tiin Asia thlanglam ram riat pawlkom politic le pursumnak lam kutkai aw dingin tawlrel a si. Cui tonkhawmnak ih a san cu ramkhat le ramkhat pehzomnak a hnget sinsinnak ding le ramsung ih thilri, fimthiamnak, technology, nunphung pawl dawnkhamtu um lo in ol ai sinsin ih hlawm aw thei ding ti a si. An tumtah vekin a si thei ngaingai ah cu a rei hlan ah Asia Community ti a tha a cak zet mi pawlkom pakhat a rak suak ding.

Ramkhat le ramkhat huat awnak pawl tan in duhdawtnak thawn kutkai aw in feh tlang ding ti cu Amen ti lo bak a dang ti ding a um lo. Nan cui Forum a kai tu ram pawl ka thir tikah an ram kha hruangkham nasa zetin a tim zel rero tu ram pawl an si. “Kha rei, ziang ti si?” Hruangkham kan ti tikah Pursumnak, Thleidannak ti pawl a silo, thirhling thawn, tlakrawh thawn tuah mi a hngetkhoh zet mi hruangkham pawl a si.

Berlin Wall

Tahṭhimnakah Pakistan in Afghanistan thawn an ramri pawl ah thirhling nasa zetin a kham hleiah Bumb(mines) pawl tla tamtak lei sungah a phum. Aliam 1980 hrawngah India tla in Pakistan thawn ramri ah hitin a rak tuah dah. Terrorist pawl an ra lonak ding ah a ti. A ngaingai ah India le Pakistan ram karlak ah ciarbek tipi in a dang zo. Culawng siloin India nisuaknak lam Bangladesh thawn an ramri ah tla hruangkham tum sau zet an sak bet. Bangladesh cu farah, harsa ram an siih cui farahnak, pem, vaihnak pawl India ram sung thleng pang ding ti phangah a si.

Hih thil hi India kiangkap lawngah a silo, leitlun hruangkham a tim zal rero tu ram an tam nasa. Iran in Pakistan thawn a ramri ah tlakrawh hruangkham nasa zet a tuah, tazawin lo in vai le pem khamnak ah ti a si. Botswana khalin 480 km a sua thirhling hruang cu Zimbabwe thawn an ram ri ah a tuah, thirhling lawng lungkim loin electric an thlah bet. Saudi Arabia tla in thlanglam Yemen, saklam Iraq thawn ramri hruangkhamnak hrangah Dollar million tamtak cemin a timzal rero. Leitlun ram ṭhangso bik ih ruah mi USA khal Mexico thawn an ramri ah hruang na zetin a kham ve.

“Hruangkham ṭha in rual ṭha a sar” tiah an ti. Nan leitlun khat le khat pawlkom aw a ṭul fawn, hruang le nasa zetin kan kham. Ziang thawn a bang tile ‘nuam zetin kan pursum aw ding, nan ka kiang nai tukah cu um hlah.’ Indian Journalist Suman Dubey in “thinlung lam ah cu OK kan si, sangka ka ong nasa nan taksa, hmuhthei thil ah cu kan hmu vek siko,’ tiah a ti.

Israel Miphun humhual committee hotu Dan Schueftan in, “hruangkham thawn pehpar aw in sim ding tampi a um. Tu cu USA le Europe ram pawl khal in dawnkham a thei lo mi vai le pemnak thawn pehpar aw in an thei thiam thlang. Kan miphun humhimnak a famkim zo maw? A kim zo ah cu sangka ong ding a si ko, nan tu din hmunah cu sorry si hrih ko. Sangka na tukin kan ong le ṭihnung za thil, ral pawl ol ten an lut ding,” tiah a rak ti. A ṭong mi hna lut a thlum lo nan el ding a um lo.

Ram pakhat in a ram humhimnak ti cu a thupibik in a ruat a ṭul. Cucu rampi ih ṭuanvo a si. Ziangtin rampi kan humhual ding ti cu nasa zetin ruat a ṭul. Hruang thawn rampi humhual cu san a man nawn lo a bang. Hruangkham a zaza in kan kham hman ah dawn kham thei lo mi thil tampi a ra lut. Mithmuh hruang hi a thupibik ih ret thei a si nawn lo. Kan miphun le ram humhim, Kan miphun le ram thansonak hrangah san thawn a milh aw mi, a ṭha sawn mi ka hawl a ṭul.

A World Divided by Simon Robinson
http://www.time.com/time/magazine/article/0,9171,1614903,00.html

Na ruahnak