Leitlun Super Power pawl

Home » Pursum » Leitlun Super Power pawl

By vcth on May 1, 2010.

Francis Cung Bik
Leitlun Ralpi Pahnihnak a cem in America le Russia ti in Super Power pahnih an suak. Meithal le Pokpi pawl thawn kap aw ngaingai cu an silonan an zuam aw nasa. Cucu ral dai (Cold War) tin an ko. 1950 ihsin 1970 tiang cu tha bang aw zet, nang maw kei in an tlan thei. Cui a bang awmi thazang karlak ihsin an bang aw lonak te cu USA in a ram sumlut ihsi 40% kha a hriamhrei hrangah a hmang laiah Russia cu 94% a hmang. 1975 hnu in cu rampi pursum hnget lo ruangah Russia cu a cau vivo.

“Ka lu tlun ah samphang lawng a um” an ti bangin 1980 hnu in cu USA cu Leitlun ih Bulpak Super Power ah a cang. Ral le hriamhrei thuhla ah siseh, Pursum lamah tla siseh, ziang hmuahhmuah ah US cu lo theih lo ih thu ronmi, khaipa ah a rak cang. 1990 in 2000 tiang cu US ih sui tik cu caan ka ti thei. Rampi neihnak an lian, pursum ah leitlun ih lai (center)fangah an cang.
Ralpi II nak ṭheh in Europe cu lak ding a um lo ti tlukin a cang. Khuapi pawl hmuahhmuah tla a siat thluh. Cui a siat thluh mi dungdin salnak ah tik cu caan saupi an lak a ṭul. Kum 10 le 20 men ah a tung ding aw thei lo. Asinan 2000 hnu in EU pawlkom an din lei tlun ral pawl a reh hnu cun an pursum, khua le ram na pin an din sal. 2000 hnu in cu USA lawng super power a si nawn lo. Super Power pi a nei. Cucu EU asi.
A pathumnak Super Power tla a rak suak lala. Cucu Asai (Tuluk le India) asi ve. Asia cu Leitlun ṭhansonak (civilization) ih kekar hmaisabik an si vekin mirang le Europe pawl colony an ra hlan tiang cu leitlun ih lian le duh tawk ih nung cang thei cu an rak si. Colony ram nor pawl an ra in kan neihsiah hmuahhmuah a la thluh, cun cang thei lo ding in in nam nuai. 1800 ihsin 1950 tiang cu Asia ram tam sawn cu kan cau ta reie. 1950 hrawng in cu Asia ram tampi zalennak kan ngah. Cutin ṭhansonak, pursum lam le dengffel fimthiamnak lamah tungdin aw vivo cu an si.
Tulai thil product pawl zoh hnik aw “made in China” ti asiih dengfel fimthiamnak lam ahcun “service in India” ti asi. 2000 hnu in cu Rulhreng (China) le Vui (India) pawl tla an tho thlang. Kum 50 sungah an tungding aw sal thei. Asia hi a tu leitlun nitlaknak ram pawl thawn rualran in a tlan thei ve thlang.
Kan leitlunpi tlun le tang (Vertical) pehzom awnak sinawn lo in a dung a hmai, nisuah nitlak kan pehzom awnak rualran (horizontal) asi thlang. Thomas L. Friedman in “The World is Flat” tiah ca a ngan. A dik. Leitlun ah Super Power pakhat lawng asi nawn lo. Leitlun kan pehzom aw daan tlun le tang zoh aw asi nawn lo.
Na ruahnak