Leitlun Tuluk milian Jack Ma ih mino pawl hnen ih thu cah

Home » Pursum » Leitlun Tuluk milian Jack Ma ih mino pawl hnen ih thu cah

By vcth on March 23, 2016.

Jack Ma

  1. Kum 20 na kim hlan ah a cang thei tawkin fimthiamnak zir aw
  2. Kum 30 na ti hlan ah mi pakhatkhat thlun aw, dungthluntu ttha tuan aw. Ziang company ah hna na tuan ti hnakin zo na thlun ti a thupi sawn. Hruaitu tha in thil tha tampi a lo zirh ding.
  3. Kum 30-40 lak ah zo hrangah hna na tuan, mi dang hrangah maw, nangmah hrangah hna na tuan ti na thei fiang a tul.
  4. Kum 40-50 lak ahcun na thiambik mi kha tuan aw. A dang san phah ding caan a si nawn lo.
  5. Kum 50-60 lak cu mino pawl hrangah tuan aw. Mino pawl hi na hnakin an thiam sawn. Curuangah na sumpai neihmi pawl kha sumhram bur in mino pawl tuan ter aw.
  6. Kum 60 hnu lam cu nuam huahhi in caan hmang aw.

Jack Ma cu online thilzuarnak tumbik Alibaba Group a dintu le Chairman a si. A neihmi sumpai hi $24.1 billion hrawng a si.

Jack Ma cu Hangzhou, Zhejiang Province, Tuluk ram ih suak a si. A nauhak lai ihsin mirang tong thiam a rak duh ruangah free in Tour guide a tuan. Mirang pawl in a hmin an ko thiam lo ih Jack tiin an ko. Cutin Jack Ma tiah khawh a si.

Jack Ma cu a tlangval pek ah hnatuan a hawl nan a ngah thei lo. Hmun 30 lenglo ah hnatuan a siauk nan a ngah lo. Voikhat ah KFC ah hnatuan a siauk. Hnatuan apply tu minung 24 an siih 23 in hnatuan an ngah. Jack Ma a mah lawng hnatuan a ngah lo.

Jack Ma cu 1994 in internet timi a thei. 1995 ah US a tlawng ih a rualpi in internet ziang vek a si ti a hmuh. Jack Ma cu hmaisabik ah “Beer” timi tongfang a hawl. Beer cu an ra suak ruri, nan Tuluk beer pakhat hman a suak lo. Cun a mang a bang ih Tuluk thil pawl a hawl, pakhat hman internet ah a tong lo. Cutin a rualpa thawn Tuluk website pakhat an tuah. Cui website an tuah hnu minute 5 ah zo in hi website a tuah ti mi in an thei duh. Cutin internet in sipuazi tuah le lamzin a um tiin a hmu.

1995 ah a nupi thawn peisa an khawl mi $20,000 in internet company pakhat din an thok. Cui company cu’China Yellow Pages’ ti a siih Tuluk company pawl bookmark website a si. Kum 3 hnu ah $800,000 an ngah.

Jack Ma cu 1999 ah Alibaba timi online in thil zuarnak service an tuah. Alibaba cu leitlun ram 240 ah service an pek ih kum khat sung ah $25 million an ngah.

Tu ahcun Alibaba cu leitlun online ih thil zuarnak tumbik a si. Alibaba ah hnatuantu minung 34,985 an um ih an Company cu US$231 billion man a si tiah theih a si.

 

Na ruahnak