Leitlun Uktu Credit Card

Home » Cahram » Theihkauhnak » Leitlun Uktu Credit Card

By vcth on November 6, 2013.

Credit-Card

Salai Van Cung Lian

Voikhat cu Saya Zaw Thu Lin sermon mi ka it zikah online in ka rak ngai. Australia a feh lai ah mi pakhat in Sayapa ka lo vakpi ding, laksawng tla ka lo lei sak duh so khaw a ti. Khawsung an feh zikah cu cupa in paisa keng lo in a feh pi. Saya Zaw Thu Lin le Kawlram in Australia feh mi si tikah “hipa hi paisa le keng lo, thil le I lei sak tum, thil man khungkhung thawn, I tiam mi a hngilh si pei maw aw” tin amah ten a ruat rero. Dawr ngaingai an vun thleng ahcun, cupa cun a tul mi hmuahhmuah cu credit card ten a pek sak thluh. Saya Zaw Thu Lin cu thazang a ngah tukih, himi credit card hnak in Jesuh a mak sawn tin thu a sim. Kei mah ten ka rak hnih suak zet, Sayapa teh hi credit card le Jesuh tla tah thim cu aw ka ti rero. Asinan ka ruat ka ruat ih credit card hi a rak ropi tuk ngai. Ziang ruangah Saya Zaw Thu Lin in a thathnemnak timi ka rak sim ding.

Ka rual “mi hmuahhmuah ih BA Thang” thawn leitlun thil sersiam mi hmuahhmuah lakah ziang mi in milai a thathnem pi bik timi kan rel theu. A hmaisabik ih kan lungkim veve mi cu Electricity hi a si. Culo dang cu kan el aw phahphah computers, mobile phones etc … Capitalism hi sersiam mi hmuahhmuah lakah thupibik pa khat a si ka ti mi cu a lung kim lo nasa. Kan pahnih in kan ruat lem lo mi cu Credit Card hi a si. Kum zabi 20 hnu-ah milai nunnak ah hmual a neibik mi pakhat a rak si. Kawlram um pawl cun ka thei hrihlo, thei thok tla si men thei. Tuisan ram dang um pawl cu kan vaknak tinkim ah paisa keng nawn lo in credit le debit card tete lawng kan keng thlang.

Tuni Kawlram ah le hlanlai san ahcun paisa rori lawng in thil lei le sumdawng a rak si. Hlan lai san Egypt san lai pi ihsin dar paisa, ngun paisa, siangpahrang zuk cuang mi piasen tin an rak hmang. Chinese Ming Dynasty in caku paisa an rak hmang hmaisabik ih paisa parah ramuktu hminthang, ramsa cuang mi caku hmang in thil lei awk, paisa kuat awk a rak si. Cun cui paisa cu mah ram sung te lawng ih hmang theih mi a si. Ramdang thleng in cu thleng theih a si le thleng, thleng theih a si lo ahcun buai a rak si. Paisa fai rori um lo ahcun kan buai si mei.

Credit card cu hmel a nei lo hlei ah ramuktu zuk khal a cuang lo. Plastic ih tuah mi te men khi a si. A tlun ah kan hmin le credit card number, card thok ni le cem ni le a thupibik mi micro chips a um. UK credit card cu Gold, Platinum tivek an then ih, himi credit card hi Sui le Platinum vek thotho in man a nei tinak a si. Himi credit card ten leitlun khawi tawk hmun khalah thil lei thei, himi card hmang in western union maw bank in paisa kuat theih, paisa khal leitlun hmun tinkim in ngah theih a rak si. Leitlun pi pasia hman dan (Global financial system) pakhat ah a rung cang. Himi credit card hi uktu a nei lo, khawi tawk ram ih ta ti khal a um lo, mithlei dang khal a nei lo, leitlun huap pi ih hmang theih mi a rak si. Paisa kan hmang kuat mi khal hmuihmel nei lo in, numbers lawngin hna a tuan thlang. Tuni ah himi credit card te hin leitlun hmuahhmuah a uk thluh ti seh la a sual lo ding.

A si nan zumnak (trust) timi par ih base mi paisa a si. Bank le Credit card pek tu pawl ih zumnak na tong lo si ah cun ngah theih a si lo. Hlan lai san ih hmui hmel keng paisa a si nawn lo nan, hnaatuan dan cu an bang aw lai. 1990 hrawng ah Argentina an sipuayii dan (economic system) a rak siat tikah an paisa man a nei nawn lo. Cutin an ram ah pa khat le khat zum nak in paisa an rak cawi awk. Mi hrek khat cu Chruch Pastor hnen ah an feh ih Pastor pa hmai ah paisa an cawi/ bak aw in zumnak an rak lak. Tuisan khal ah zumnak cak ter sin sin tu ding ah Pastor hmang lo in kan financial history pawl zoh par ihsin zumtlak kan si le silo an thence.

Credit Card in thil kan lei tikah “pin number” mah te nei cio in hmet cio khi si. Hitin hnatuan thei nak dingah “micro chips” te hi a rak thupibik. Himi in khawi ah, ziangzat kan hmang timi a rak khum thluh. Himi pawl hi zoin monitor a tuah ti khal kan thei lo. Cun an nei mi kan information pawl khal ziangah an hmang ti khal kan thei lo. Kanmah a hmang tu lala in zumnak (trust) in pektu pawl ah kan nei. Pakhat le pakhat zumnak ihsin hna a tuan thei mi a rak si. A cancan ahcu kan thuhla tampi an thei, an thu hla ziang hmang kan thei nawn lo. Kan thuhla an thei tikah, ca tampi in kuat, an duhduh in kan information pawl an hmang theu ve.

Asinan himi zumawknak (trust) timi a cem ahcun tihnung zet mi si. 2009-10 hrawng ih a rak cang thok mi credit crunch khal himi pawl ruang thotho ah a si. Tuhlan ahcun paisa kan khawl ih kan nei hnu lawngah kan hmang. Tuisan ahcun credit card ruangah cutin khawl hmai sa a tul nawn lo. Inn, motor, thilri etc.. khal credit in kan lei. Laitlang um pawl in US le ramdang um pawl inn, motor etc…pawl an lei thei ih kan zohso zet theu. An lo sim lo mi cu Credit in kan lei timi ti mi si. Business khal credit in tuah theih a si. Cutin mi tampi in an hmang, mi tampi in an pek thei nawn lo tikah Financial System tiang a rak siat ter. Credit Crunch (credit ngah har nak) ihsin Recession (Leitlun sipuayi tlaknak), Double Dip Recession (Leitlun sipuayi voihniknak tlaknak) tin lei tlun pi a rak buai. Tuisan ahcun credit card ngah ding a har sinsin.

Himi paisa cawi ih a thang thawn kuan sal timi kan Bible le Muslim pawl ih bible “Kuran” in a duh lo. Leviticus 25: 37 “A ṭhang thawn tangka coih hlah uh; a miat in rawl khal zorh hlah uh. (You must not lend them money at interest or sell them food at a profit (NIV)”. Hlan lai England le Europe ah Jews pawl an rak lian tuknak khal paisa an cawi ih a thang lakin an rak tuah thei. Christian pawl cu kha tin tuah dingah an rak kham. Kan dung thla ah khal England ih Anglican Arch Bishop pa in a thang lak ih paisa cawi pawl na pin a rel siat. Christian pawl ziangtin tuah a um lo nan Muslim ram hrek khat ahcun “Sharia Law” thawn feh mi credit card pawl cu 1990 hnu in an hmang thok. Paisa cawi mi cu Zu, Gambling, Pornography pawl ah hmang theih si lo. Cun a thang in lak si lo in an lei man (service) ah paisa an lak.

Tuni ah credit card cu kan nei cio thluh ding ka zum. Himi te hin kan nun can, paisa kan hmang dan, kan tlan leng dan, sum kan dawng dan tiang in a rak thleng thluh. Tuni ah paisa khawl hmaisa tul nawn lo in paisa hmang theih si. US ih ka rualpi pakhat tla cu pa 5 rori a nei ih, credit card pakhat ta in pakhat a kuan ih a hmang rero men. Himi credit card a cang theinak ding ih hero bik cu “micro chips” technology hi a si. A dang cu santiluan dan thlun in a rak cang ve.

Na ruahnak