Lungthin

Home » Cahram » Lungthin

By vcth on June 21, 2013.

Francis Cung Bik

“Leitlun ih ṭhabik le a mawibik mi thil pawl hi hmuh theih le tham theihlo mi an si men ding, nan na thinlung in na tuar thei.”
Helen Keller

Ka nupi thawn December thla cem zikah kan ṭhen aw. Nupi ih tan ti cu ka lungleng, ka um har, ka kumthar cu ziangvek a si ding ti nan ruat thiam ko ding. Um ngaihnak thei lo ah thinlung lam mi hnemtu therapist ka pan. Ka therapist nu hnen ah ka nun thar hrangah a ṭhahnem ding mi thil pakhatkhat i pe aw tiah ka ti.

Thinlung

Ka therapist nu in rang zetin aw tiah in sawn lohli ih ka mang a bang lam. Cun kut ih tuahmi thinlung zuk te in pek. Ka saza nu in, “hi thinlung zuk te hi ka lo hlan” tiah in ti. Cule a mina hlun pa in a rak pek dah mi a si thu in sim. Thinlung thar ka ngah ihsin cui a thinlung zuklem te cu khirh sal ding a si. Cutin thinlung zuklem te thawn cu inn lam ka pan.

Ka thinlung zuklem te cu cabuai parah ṭhaten ka ret. Ni tawkfang rei hnu ah ka fanu te Juli Ann in in tlawng. Ka inn thar ih a hmaisabik a riaknak ding a si. Ka cabuai parih thinlung zuk te cu “papa ziang si” tiah in sut. Kum 11 nauhak cu ka sim le tla a theithiam pei maw tiah ka ruat nan a thei duh sisi ka tiih ṭhaten ka sim. “Ka therapist nu in in hlan mi a si, thinlung thar ka ngah ihsin ka khirh sal ding” tiah ka sim. Juli cu zianghman a ṭong lo.

Thlakhat a rei hnu ah Valentine’s ni ah Juli thawn kan tongaw sal. Ribbon mawite thawn ṭenmi kuang sen te laksawng in pek. A laksawng te cu lungawi ten ka cohlang. A sung ka zoh ih ka therapist nu ih in hlanmi thinlung zuklem thawn a bang aw cekci mi thinlung zuk lem te a si. Cun ningzak nawn in card te tla in pek. Card sungah biazai te a ngan. Ka san sung ka hngilh thei lo mi le ka mithli biazai te.

Papa na hrang

Hinah Lungthin
Na kilkhawi dingah
Na thazang hrang
Co na duhmi lungthin…

Na zin a mal caanah
Lungawi ten feh thei hram aw
Cun, tumhmun na thlen tikah
Rak kil khawi aw.

Happy Valentine’s Day
Duhdawtnak thawn, Na fanu
Juli-Ann

Ka hlawnthil, neih le siah hmuahhmuah lak ih a sung lawibik le a man neibik thilah hih biazia te hi ka ret. Thinlung thar i petu lungthin.

The Heart by Raymond L. Aaron

Na ruahnak