Mai. Van Sui Hnem hnen Cakaut

Ahmaisabikah, Chinmi in duhdawttu Pa Pathian hminin na kut ka lo kai. Ni 24, Tharcan, 2010,www.chinworld.info/ web-cahmai parih an tarlangmi, Chinworld in hmaiton thusuhnak an lo neihmi kha ka rak siar ngah ve. Na thusannak tete nguntakin ka rak siar. Voi sawmsahra siar rero khal sehla siar khawhti ka nei nawn lo. Thu a lo suttu le a thiam si, ka tiral thluh ka ti mai ding. Lo tawn le len theinak ding na mail [email protected] tla felfai zetin ka cabu sungah ka rak hminsin nan, hi www.vcth.net te thawn na hnenah ca ka lo kuat mai. Ziangah tile, na mail in simaw? Chinworld.info in simaw? hi vcth.net in simaw? cun a dangdang in simaw? na hnenah ca lo kuat sehla, a bangaw thluh thotho ti le ziangtin kan Chinmi pawl hin hmailamah ṭan kan lak khawm ding ti na ruah dan fiang tukin i khihhmuh zo sisi. Hi cakaut ka ngan san khal, kan Chin miphun hrangih na ruah dan le na hmuh dan a sunlawizia run tarlang sal loin ka um thei lo ruangah ka ti mai ding.

Si, na timi te ka lungkim tuk. “Cung Pathian in kannih Chin miphun pawl thlawsuah malza in sawmih, fimnak, thiamnak le mawinak a phunphunin in pe. Hi pawlhi kan mai miphun le ram hrang rori ih hmang salin Pa Pathian sunloih ding kan si”na ti. Na ti dik tuk. Pathian rawngbawltu hi hmuntin deuhthawin kan nei zelih a hnangam thlak zet nan, kan thlennak hmun ihsin kan ram duhdawt thiamin, kan ram hrangih pumpeaw in le kan ram thuhla ngaihven vein kan ṭuan sal lo ah zoso kan ram a kilkhawi ngai ding. Kan biak kan Pathian in teh tuhnakih fim sin, thiam sin le mawi sin dingin thlawsuah malza sawm in, lam in hruai vivo ding tin na zum ve maw? Kei cu za ah za ka ring mai. Amahlawngte, a hmansal dan kan thiam a t’ul natsat ka zum fawn. Cukhal cu na thusanank ah fiang tein ka hmu.

Cun, “kan Chinmi pawl hi hnamte nau tete ah ṭanla in thil pipa zianghman kan tuaksauk tlang thei lo” na timi te hin ka lung i khoih tuk ee. Na ti fuh riai ka lo ti mai ding, ka thiam tawk ten. Hi khawvel khawte san (globalization age) ahhin mai khua le ram hrang ruatih nangmah vekin rehsiat le thinheng thiam hi kan Chinram in a va mamawh zik ve! Miphun cangkangpawl tla cu khawvel huapin simaw an ram le miphun hrangah, an thlennak hmuntin ihsin lungrualzet le taimak suahih an t’uan rero. Japan pawl tla cu anmai pumpak hrang hnakhmanin ram le miphun hrangah t’anlakih an zuam tuk ruangah simaw tuisunih khawvel miphun lakah mi phun cangkang, mi zohsohmi ih an can. Brazil pawl khalin Japante cu zohṭhinin hmai an nawr ve rero an ti vek maw? Culaiah kannih chinmipawl cu kan khawvelpi hi khawte hnakih te deuhdeuh ah kan can (tuah) tum rero a bangnak can a um ṭheu ngai. Hnamte nau ah kan buai. Cucu na ninghannak le na thinhengnak bik ti aw? Si rori, ninghan tlak tuk ka ti. Chin timi hin nang le kei, annih-kannih, hmuansak, hmuanthlang ti um nawn loin, hi khawvel khawte san talah hin, in khaikhawmin, in huapkim thluh thei thlang sehla a duh um tuk ngai.

Cule,“Chin pumpi hrangah ṭanlakin ṭuan tlang sawn ding kan si” na ti. Hitluk ih ruahnak mawi le sunglawi ka suahnak pi le pu in teh an rak nei dah ngerkher pei maw tin thu i ruah ter. Rak nei fingfing hai sehla, thukhat le hlakhat sungah rak hmuaw thiam hai sehla tlangṭong(common language) tla kan neih thei leh ka zum. Maw na ruahnak vekhi an rak nei nan, a neitu an tam lo? Maw an um hnuaihni nan kan zate theih dingin an rak phuangsuak ban lo? Maw an phuangsuak rero nan ka rak thei ngah lo? Maw ka rak thei nan ka thlun thei hrih lo? Maw thlun thei dingin hruaituṭha ka nei hrih lo? Ka santlai lo ta hrimhrim asi ko ding. Kan zuam natsat a t’ul ding ti. “Lungrual lonak” ti mi ṭongfang hi ka ṭongbifiah (Dictionary) sungin hlawnhloh thei ka tum thlang ding.

Zianglamkhal vasisehla, lo fak loin ka um thei lo riai! Na mawinak thawn miphun cawisan na thiam. Kan Chin thuamhnaw le rawl (ei in) tla na khaisang fawn. “Chin ṭong hmangih na rualpi pawl na biak can le Chin ṭong na ṭong can te hi na lungawi le lungkim bik can a si” na ti. Na thiam tuk lo ti ding tlak hman ka si lo ti i fiangter. Kan zaten “Pumkhat” kan sizia na phorhsuak. Cui pumkhat kan sinak cu a takih kan nunpi na duh fawn. Hnamte nau ih buai rero le tawhawk rero aicun “Arti le Arpi” zodeuh ha suak hmasa tivek tla hi rak buaipi in, rak ngaihtuah thiam ve sehla, ka khua le ka ram hrangah ṭhathnemnak titham lo te tal ka nei ve sawn men ding ti i simfiang rori.

Kei cun maw, Daihnak ih fanu, rualremnak ih tleirawl, kan chinmi zatei’pumkhatsinak dingih thaisun tiih lo kawh mai ka duh men.

Kan biak Pa Pathian in A thlarau thianghlim thawn lo umpi ringring hramseh!

Mai. Hnem Hnem….Ka lungawi!

Salai Ayete (Vankau)

A Peh-tlaimi Cahram :

Leave a Reply

Your email address will not be published.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>