Mangkhua

Home » Cahram » Mangkhua

By vcth on December 10, 2010.

Salai Nohmung

Khuan cin ar a khuang. Khua a vannak ding rei a duh lai. A hnung ṭhang harh ih a mang cu a ruat sal. Mang sia maw? mang ṭha? Ka khua ruah cu a har… a ruat awk tawk khal ka thei nawn lo.

A tho. Tappi ka ah cu a to. Meisa ah thing cu a vun hlak. A mang cu a ruat. A mang sung ah ngalrang Pakhat cu sih ti hmuh a man ih feipi in a sun that. Cun aw a thei ” na miphun umnak ka lo hmuh ding, in thlun aw.” A ruat. ka thihnak ding si maw ka hmu. Pacang ṭha ral kut in maw ka thih ding. A thaw pi cu a suah.

Mangbang vansang ih a um rero lai ah an hmuan sung in thawng a thei. ” Um… ziang si ko sawh” A biar rang kaih mi cu a rem. A itnak kaing ih a tun mi feipi cu a lak. Paiper cu a pai. Inn leng a va suak. Ngalrang in a hmuan rawl a ei rero kha a hmu. A feipi cu fek zet in a kai. A dawi….

Rang ngaingai in….
a tha nei hmuah suah in….a dawi
Ngalrang cu in man lo pang ding tiphang bang in a tlan. Sun ni vuai an dawi aw.

Ngalrang cu sihti kiang ah bu a rak nei. A bu kaing cu a thleng. A bu sung a lut. Mi nung pa cun a bu sung ih ngalrang cu a hriamhrei feipi thawn a sun that. Cun ngalrang a that ngahnak hmun cu ngalrang sih tiah hmun a sak.

Cuih zan cu a sim tuk zo ih khua a thlung ngam nawn lo. Leipar khal ah a it ngam lo. Thing par ah a riak. Pacang pa a si dan a zoh awk ih a hni a suak. Hla a seh. ” Tuu hlum sakhuai vom ṭih vang ah riat ing sang thing par ah” tin a ti pan lo maw.

Zaan ih a mang kha a vun mang sal. A lung a hring. Lo ram cu a zoh. Ram ṭha ngaingai asi. A mang bang. Ka mang ih in hmuh duh mi hmun a si pei maw?
A ruat….
A ruat na sa…(cungngai dan te)
ziang tin ka thei thei ding…
A ruat..

“Aaw..si seh law” a tiih Um ci a lak. A ka in ” hih hmun ah khua ka to thei ding a si len Umci ka tuh mi in a lu tlang sawh seh. A zik in lailun khih seh la a hram kiang ah rah tam pin rah seh law” tiah cam cawhnak a nei taih Um ci cu a tuh.

( kan pupa daan ah Umci an tuh tik ah mi ṭhang so ding an si len a rah a ṭha, a tam, thang so lo ding an si len a rah a mal. Um rah cu a fatemi a silen ti thawl ah an hmang ih a tum mi cu zu retnak ah an hmang.)

Ṭhal a rung kim. A Um cin mi cu a mang sal. Ziang a bang ngai pei. Sa dawi phah in a Um cin mi cu a vung zoh.
A lungawi…. a lung kim zet. A hni suam so. A um cin mi cu a keuh, a ṭhang . A lu cun ” Um raw te”tlang a suak ih a zik in lailun a khih ngaingai. “Ka cam cawh vekin a si ngaingai. Ka mang ih in sim mi cek ci a si.”

Hih hmun ah khua ka toh pei…. ka mang ka kheng ngahnak hmun a si ruang ah ” mang kheng” tiah ka ko ding.

Cu ticun kan Pu Hlawn Ceu cu Mang kheng khua a rak toh.

Ref: ka u ih sim mi par in ngan mi asi.

Um raw te= lai zo feh nak lamzin sak lam thlang
Kheng= ka ral ka that nak

Na ruahnak

2 Responses to Mangkhua

  1. Lungbawk brother   December 10, 2010 at 4:22 am

    Na cangan daan (Technique) ka uar zawng. Pu Hlawn Ceu ih Mang Kheng khua a rak toh daan cu… ti in na thawk lo. zuam vivo uh laimino pawl.

  2. Zodaizilthli   December 10, 2010 at 4:45 am

    Ala!

    Zawng mangsia skei maw tiin cahram thoknak lamah cun in feh pi. Asinain, Real history rori sawn ding a va bang ve.

    Hna na ti tlai,

    Theihnak/ruahnak na ti kau.

    Khaw dang tobul tla rawn post zel aw.