Mi-aa pakhat hnen ih Interview tuahnak

Home » Cahram » Mi-aa pakhat hnen ih Interview tuahnak

By vcth on March 4, 2016.

Mi Aa

B.A (Thang), Salai

Mikim. . Mi-aa timi ṭongkam hi ziangtin na hrilhfiah ding?

Mi-aa. . Mi-aa timi hi kan thinlung ngaingai kha a bum lo tu pawl tin kan sim thei. Kan aa sinsin le kan bum lo sinsin a si mei. Mi-kim timi pawl hi pakhat le pakhat an lungkim lo ih that kan duh hman ah pakhat khat ngah duhnak thawn paih lo cing in an hni. Mi-aa ah kha vek a um lo. Ka lungkim lole ka hni lo ding. Kan thinlung ihsin kan lo that duh le kan lo that men ding. Kan thinlung ngaingai ih um vekin tuah dingah zianghman kan poisa lo. Mi dang pawl tuah thei lo mi pawl tuah thei le – University leh pawlkom pawl in buaih pawl, honorary pawl an pek ṭheu vekin mi menmen (mi kim) pawl ih tuah thei lo mi pawl tuah thei ruangah Mi-aa timi buaih kan ngah ve mi a si.

Mikim. . Mi menmen pawl tuah thei lo mi nan tuah thei mi hi ziang pawl a si?

Mi-aa. . Asile na lungkim lo mi na ṭong tikah na thinlung um vek in- na au ngam maw?

Mikim. . Ka au le kan buai ding ual…

Mi-aa. . Na tuah thei lo silo maw? Asi na tuah thei lo vekin midang pawl tla an tuah thei lo. Asinan, mi-aa pawl cun ṭhaten kan tuah thei.

Mikim. . Cucu thilṭha asilo pi?

Mi-aa. . Thilṭha timi hi ziang a si? In sim aw. Mi hnenah kan thinlung ngai siloin kan hni rero nan, an dung lamah an ṭhat lo thu kan rel… A nun sungah amah ih a ṭhatnak pawl kan sim lo, thei lo, a thih hnu lawngah kan sim ṭheu mi hi a ṭha mi maw a si?

Mikim. . A seang lo pi..

Mi-aa. . A ṭha, ṭha lo timi pawl hi minung pawl ih kan tuah mi dun le daan lawng asi ko. Nan nih mi-kim pawl ih dun le daanah cabu siar hi a ṭha nan ti. Zuu in hi a ṭha lo tin nan ti. Asi ko lo maw?

Mikim. . Aw, asi ee. A hman mi tla a si ual.

Mi-aa. . Asinan, keimah ih ka hmuh daanah cun zuu in hi a ṭha. Ca siar hi a ṭha lo.
Mikim. . Ziangruangah maw?

Mi-aa. . Zuu in tikah kan bang mi pawl a hlo. Leilungpi bangnak tla tampi a hlo ter. Kan thinlung tla a dam ter, a nuam ter. Ca siar timi hi… kan mit tla a siat ter.

Mikim. . Ca kan siar le thil tampi kan thei. Ruahnak ṭha tla kan ngah. Zuu in cu- kan nunnak tla a siat suah si..

Mi-aa. . Cumi pawl cu nan dun le daan sungah ngan mi pawl asilo maw? Zuudawr ih ṭong mi pawl va ngai aw. Theihkauhnak tampi na ngah ding. Nan cabu ah censor luat lo mi pawl tla a tel, an rel. Ka sim ding.. Zuu in tuk ruangih nunnak a siat timi cu– sunvu ziang hman ṭuan lo in zuu lawng in ruangah a cang mi a si. Nan nih tla cabu kha sunvu a dang ziang hman ṭuan lo in siar hnik uh. Ni, thla a rei le natnak nan ngah ding ih nunnak a siatsuah ve thotho ding.

Cuti vekin leilungpi ah ṭhatnak timi tla um lo, siatnak timi tla a um lo. A sinak timi lawng a um. Cumi a sinak timi kha minung pawl in kan lungkim tikah a ṭha kan ti. Kan lungkim lo tikah a ṭha lo kan ti.

Calai duhtu pawlin cabu pawl ih a sinak nung thei ding hrangah a ṭha tin an ṭong vekin, Zuu zuar pawl in le zuu duhtu pawlin zuu ih sinak nung thei ding hrangah a ṭha tin an ṭong ve thotho ko ding.

Leilungpi ah a ṭhatnak le a ṭhat lonak timi SI-NAK pawl hi cui thuhla parah kiang le kap pawl ih lungkimnak tam ngah sile a ṭha. Kiang le kap pawl ih lungkimnak a mal sile cumi thil cu a sia ah a cang timi lawng a si ko ee…

Na ruahnak