Mifim Si Dingah Tar Tengteng a Ṭul Lo

Home » Cahram » Mifim Si Dingah Tar Tengteng a Ṭul Lo

By vcth on August 11, 2013.

Johnlsl

Hihi heavy metal band Judas Priest ih hla-lu a si. Thu tampi i ruatter. Fim, fimnak, mifim …. ziang a si, zo an si!!!

Kan naukhak laiah kan zir dah. Lu pathum neimi hnenah zir aw. A sim duhmi cu tar pawl hnenin zir aw, an hmuhtonmi a tam, an theihmi a tam. Khatlam zawngin cu tar pawl hi an fim a ti duhnak si. Cutin kan mitthlam ah mifim ticun, ‘Ding thei nawn lo, el kuun tak, a ding hmanah kianghrol thawn tal maw a si ding, lo le, a kawm hrawngah to in a aw tla ring tuk thei nawn lo, ṭhia phah nawn thlang, khua hmu ṭhiṭha nawn lo, thlanmual lamah ke khat kar zo’ ti hrawngin khi kan vun hmu deuh ṭheu.

Ka ruat, hmuhtonnak a nei tamtu, theihnak a nei tamtu pawl hi mifim an si maw? A phi ka suahmi cu, ‘ Si thei, si lo thei.’ Thusutnak pakhat um dingmi cu, ‘ Theihnak hun nei tam ah, mifim a si ko lo sawm?’ Si cekci deuh lo, ‘Kan hmuhtonmi, kan theihmi pawl kan nun ah bun in, nung ter in, a rah le par a suahpi ngai thei lo ahcun fimnak kan ti thei ngai lo ding.’

Hlan deuh ahcun company pipi ah hnaṭuan na lut ding a sile thupi zetih an lo sut dingmi cu, ‘Na hmuhtonnak lole himi thawn pehpar aw in ziangzet hna na rak ṭuan dah zo’ tihi a si. Nan tuni ahcun thupi sawn ih an lo sut dingmi cu, ‘Ziangsi na ti thei?’ tihi a si. Na hmuhtonnak tla an thupi ter ko, nan cuhnakin na thiltitheinak si an duh sawn.

Tuni ah leitlun mi thupi tampi cu mino tete an si thlang. Facebook tuahtu le neitu Mark Zuckerberg le Mozila firefox tuahtu Blank Aaron Ross pawl hi kum 20 le malte fangfang an si. Google neitu Larry Page le Sergey Brin hi kum 30 le mallai lawng an si. Nan, tusun ah leitlun ṭhangso deuh nakih milai hmuahhmuah cu an mah thawn pehpar aw lo in um a theih nawn lo.

Hmuhtonnak tampi rak nei zo upa mifim an tampi. Cuvek thotho in mifim, mi thupi mino an mal lo. Mifim si dingah tar a ṭul, kum upa ta a ṭul timi ruahnak hi kan hlon a cu thlang lo sawm!!!

Judas Priest nih hla in an sak, ‘Mifim si dingah tar tengteng a ṭul lo.’

Putar fim zet

Na ruahnak