Mirang Rak Dotu Pu Lal Luai Thu Simfiangnak

Home » Cahram » Mirang Rak Dotu Pu Lal Luai Thu Simfiangnak

By vcth on August 17, 2014.

Salai Van Cung Lian (UK)

1) Thuhmaihruai:

Pu Lal Luai cu Mirang san lai ih micak, hminthang Thantlang miuk (Chief) a rak si. Mirang in laitlang an rak lakhnu April 1890 kum ah Mirang column pakhat donak in a hmin a rak thang sinsin. Cutin, a donak ruangah a relh ih, 1894 hnu lawng ah Mirang hnen ah a rak ap awk sal. Pu Lal Luai thu hi Mirang pawl ih nganmi Laitlang thuanthu ah hmuh ding a tam zet. Pu Lal Luai thuanthu hi, kan mah Chin lam in Hakha Lai Carelbu pg 24-27 ah le Deirel cazual website khal ah a thu hmu thei a si. Himi kan mah Chin mi pawl ih ngan mi le, mirang pawl ih amah thu rak ngan mi malte a dang lam deuh. Adanglam bik mi cu, tunaite Dr.L.H.Sakhong ih Lt.Steward thuthawn pehpar in a ngan mi, ka sim fiangnak sung ih Lt.Steward thih thu le zo in a that timi thu thotho a si. Hakha Carel Bu sungah Pu Lal Luai in Lt.Steward cu, Mirang Chittagong column laitlang ukding in Sep 1899 ih an ra lai ah a rak that tiah an ngan. Asinan, Mirang pawl ih nganmi cauk tampi le Hakha Lai Carelbu ih nganmi an bang aw lo ruang ah, Hakha Laicarel bu ih nganmi sawn hi a palh mi si ding tiah ka rak sim ding.

2) Lt. Steward ih Thihnak (Hakha Laicarel Bu or Deirel ih timi)

Deirel calai website ah “Mirang nih 1889 September 5 ah awdar an chuah i, “Lairam cu Fort White phu, Gangaw phu l…e Chittagong phu tiah phuthum in tuk i uk ding” an ti. Awdar an chuahmi cu lihninh in aa hnin i Laimi vialte umtu thutto awk hngal loin an rak um. Pu Lal Luai nih Hakha bawi sinah “Gangaw phu cu nanmah nih rak do ulaw Chittagong phu cu keimah nih ka doh hna lai …,” tiah thawng a thanh. A mi vialte cu a pumh khawmh dih hna i hriamnam tling tein a timh dih hna hnu ah doh ding ah an kal i Mirang he cun Rangkamuti khua pawng ah an i kap. Lieutenant Stewart le a ralkap tam nawnte an thah khawh hna caah an le i an lektaakmi kawmpas le tungthlai suimilam an rak laak. Mirang ralkap phu dang an rak thlah òhan hna i an i tuk tikah hriamnam a thleidan tuk caah Mirang nih an nawr cuahmah hna. Hriangkhan khua pawng La-aw dong Burpahi nel ah Mirang he an i kah ah Thangzang khuabawi Tler Ceu le a hawi le an thi. Mirang nihcun an nam chih hna. Thantlang khua an luh hlan ah Khintlang le Vuichiptlang in an rak bawh hna i an kah òhan hna. Asinain Mirang cu Thantlang khua chungah an hung lut. Pu Lal Luai nih a rem duh hna lo caah a mi pawl he Thantlang cun an zam”.

3) Pu Lal Luai le Lt.Steward thu ah Mirang pawl in ziangtin an sim?

Chin Hills Battaliion in chin heroes pawl upat sunloihnak cu, April 1939 ah Falam khua ah an rak tuah. Cuih, sunloihnak ah cu, Laithuam pawl thawn chitet (parade) an tuah ih Chin hero pawl upatnak an pek mi sung ah Pu Lal Luai khal a tel ve. British Library ih Chin Hills Battalion documents (MSS/EUR 250) sung ah “Chief Lal Luai of Thantlang, leader of the attack on a detachment of the 39th Garhwal rifles with two guns at the laawavar stream, Hakha subdivision, on the 2ndApril 1891. This engagement was very fiercely contested. The total losses were five killed and a Birtish officer and fourteen other ranks wounded. Chief Lal Luai did not surrender until 1894” taih a ngan.

Cun, Lt.Steward thah thu ah ….

Tuck le Carey ih nganmi The Chin Hills timi cauk sung ah “Thantlang pawl thawn hmaisabik kan tongawknak cu Hau Sata thu ruang a si. Hau Sata in Thantlang miuk Za Huat ih fanu a rak ṭhi duh. Za Huat cun a fanu hrang ah man sang tuk hlawn thil pawl a rak dil ruang ah Hau Sata cun a rak tlin lo, asinan cui hlawnthil pawl aiah minung lu thawn pek ding in lungkimnak an rak nei. Hi lu pawl ngahnak ding ah, Hau Sata cun mi siim ding a tim tuah ih, vansiatnak ah lamzin thar saknak ding hrang ih, survey a rak tuah tu Lt.Steward le a kilkhawi tu ralkap pawl thawn an tong aw ih, Lt.Steward le a kilkhawi tu tam swn cu an rak that”.

A.S Reid ih nganmi The Chin-Lushai Land timi cauk sung ah “Hau Sata in Lt.Steward a thahnak thu hla cu hitin a si. Hau Sata le a nu pi an buai ih, a nu pi cu a pa Za Huat (Thantlang miuk) hnen ah a va tlan hnuah Hau Sata in a va dil sal. Hau Sata in mirang lu pa hnih thawn a tlen sal tul tiah an lung a kim. Ka zum dan ah, hi vek luyaing (savage) pawl ih ruahnak thinlung ah, nang mah ih mi na that ih, na ngah mi lu, cu mi dang hnen ah na va pek a si ahcun, cumi na va pek mi pa ih, sal ah na cang ta. Cutin, Za Huat hnen ih pek ding ah Hausata cun mi va that ding in tim a tuah, Vansiatnak ah Lt.Steward cu Hau Sata thawn an tong aw. Lt.Steward te kiltu an nei mal mi an hmu tik ah, himi cu kan hrang ah caan tha bik a si tiah, ṭhelh lo in an that”.

Wim Vervest ih ngan mi The Lost Dictionary timi cauk sung ah “Sa Hlut ih fapa Hau Sat in Lt.Steward cu 1888 kumah a that ruang ah lehrulnak (punitive) ral a thonak bik a si. Hou Sata cu thunei zet Thantlang miuk Za Huat ih tupa a si”.

Wimvervest ih a Pu, Major Newland nganmi The Image of War timi sung ah “Thantlang miuk Lal Luai (Lt.Steward that tu pa) cu tlang lak ah a relh lai ih, a sung khat pa Za Huat in, Thantlang hnam pawl, Lal Luai ih um lo sung ah a uk”. Asinan, himi a ngan mi Major Newland a sual mi a si tin, a tu pa Wim Vervest in a cauk The Lost Dictionatary timi sung ah a sim fiang sal. Wim Vervest cun Major Newland ih fapa Sam Newland ih Diary thawn pehpar aw in a sim fiang lai ah “Major Newland in Hau Sata that tu pa cu Lal Luai a si tin a sim ruang ah thuhla a hnok ter. Lt.Steward that tu cu Hau Sata a si tin, Chin pawl le Carey le Tuck in an sim” tiah a sim fiang sal.

Sir Robert Reids ih nganmi The History of Frontier Areas Bordering Assam 1942 timi cauk sung ah “Feb 03 1888 niah Lt.J.F Steward (1st Leinster Regiment) cu Rangamati ihsin peng 18 a hlan nak Saichun tlangtlaun ih, survey an tuah lai ah, miuk Hau Sata in Lt.Steward, European ralkap pa 2 le India ralkap pakhat a rak that hai”.

Ziang ruang ah an that timi cu Sir.Robert ih A.S.Reids ih nganmi thawn a lung a kim a bang. Cucu, “Kaladan tiva kap ih luyaing (Hau Sata) le a nupi buainak ruang ah Lt.Steward thihnak a rak thleng”. Sir Robert Cun Hau Sata thih thu thawn pehpar aw in “Hau Sata ih umnak khua cu, kan maih sakhan a si cia mi Lunglei ihsin March 14 (1889) ni ah kan suak ih, Za Huat ih khua cu March 19 ni ah kan thleng. Hau Sata ih khua cu ni 20 ni ah kan thleng. Hau Sata ih thlan cu kan lai ih, a ruak tang ah Lt.Steward ih zunphir kan hmu. Mr.Lyall’s ih sim vekin, Lt.Steward that tu kan leh rul ngah” tiah a ngan.

Mirang ralkap a thi mi pawl lakkhawmmi website ah “Lt. John STEWART-Leinster Regt. cu – 1888 kum ah, Rangamatti khua kiang ah, survey a tuah laiah a thi ih a lu cu February 1890 kum ah an hmu sal” tiah a ngan. See (http://glosters.tripod.com/burmamem1.htm)

Suhas Chatterjee ih ngan mi Mizo Chiefs and the Chiefdom timi cauk sung ah “Shendu (mara) miuk cu Mirang lam tang a si ih, Hau Sata le a ho pawl ih cangvaihnak thu hla cu Mirang pawl hnen ah a sim. Hou Sata cun, Mirang pawl lamzin an cek si ahcun, a khua ah an ra ding ih, Mirang kut tang ih um a duh lo ruang ah cui lamzin tuah ding ih Survey tuah tu pawl cu thah a rak tum. Lt.Steward te cu, Shendu miuk Saipuia ih ralrinnak a pek rero nan, ziang hman a rak siar lo. Lamzin ceknak ding hrang ih Survey hnatuan tu pawl cu, 03 Feb 1888 ni ah, Hau Sata le Za Huat homi mi lai 300 lai in an kulh” tiah a ngan.

Lt.Steward ih lu an phurnak thawn pehpar aw in A.S.Reids cun “An tan mi milai lu pawl cu, nisuahnak lam (further east) ih um mi miuk Paona hnen ah an kuat. A mah cu Lt.Steward that ding ih hotu pa nga lak ah a tel. A dang pawl tla cu How Sata le a fa pa hnih le Za Huat an si” tiah a ngan.

Lt.Steward ih lu cu Thangtlang peng Thangzang khua ah an phur. A lu cu Thangzang khua bungpi ah an tar ih, puai tuah in an rak lawm (sesawm an tuk). Thangtlang peng Thang Zang ih thang lian mi Salai Chan Khar in kan khua thuan thu ah hitin a si tiah i sim.

4) Mirang Pawl Simmi Pu Lai Luai le Deirel website Simmi Pu Lal Luai thu Thlirnak

Deirel website ih ngan mi Pu Lal Luai thu ah, Mirang pawl in September 5, 1889 ih awdar suah in Chinram a ra kai tu Chittagong column cu, Pu Lal Luai in mi a khawm thehhnu ah Rangamati khua kiang ah an va do ih Lt.Steward cu an that tin a ngan mi hi Sep 1899 hnu ih cang mi a si lo. A tlun ih evidence pawl ah Lt.Stewart cu 03 Feb  1888 ah, Hau Sat le a ho pawl ih thatnak in a thi tin kan hmu thei. Deirel website in, Maj.Newland ngan mi a quote pang tla a si men thei. Asinan, cumi cu a hman lo mi si tin Wim Vervest in a sim sal. Lt.Steward va sim tu ah Hau Sata ih homi minung 300 lai an tel ih cumi sung ah Pu Lal Luai a tel tla cu a si thei nan, Pu Lal Luai a tel timi cu, evidence a um lo (Major Newland ih ngan mi siar lo).

Cun, Deirel ih ngannak ahcun, Pu Lal Laui ih Rangamatti ih khua khiang ah Lt.Steward a that hnu ah, Mirang pawl an rak kai ih an rak do awk. Cumi ah Tlir Ceu a thi tin a ngan. Thil a cang dan (Overall) in cu an ngan mi cu a hman nan, himi thil cang mi hi kum 2 an thlau awk. Chittagong column cu Sep 1899 ihsin rak kai thok mi an si. Himi tum ah Pu Lal Luai nih a do hai mi si lo in April 1891 kum ah a rak do hai mi a si. Mirang nih laitlang zaten 11 March 1890 ihsin a lak theh zo. Asinan, Chinmi pawl nih Mirang a thup ten an do ringring thotho. Deirel ih sim mi, Pu Lal Luai le Mirang doawknak, Tlir Ceu a thihnak hi March 1891 ih a cang mi thil a si. Chittagong column an rak kai lai ih a cang mi thil a si hrimhrim lo.

Himi Pu Lal Luai te doawknak cu Tuck le Carey ih nganmi The Chin Hills timi cauk sungah hitin a sim. “29th March 1891 ah Lt.Macnabb (political officer) cu Lt.Mocatta ih homi ralkap pawl thawn Thau ihsin an pok. Lal Luai le Koizway ih ho mi Thangtlang pawl in Lt.Mocatta column cu, Laawvar tiva kiang ih zingrawl an ei lai ah an rak do”. Himi doawknak details cu Lt.Macnabb ih kimzet in nganmi The Chin Hills pg.51-53 ah va siar theih a si. “Himi doawknak ah Mirang lam in Pa (5) an thi, Lt. Forbes, Jemadar Negi le a dang 13 hriamhma an tuar. Thangtlang khua a tam sawn cu himi doawknak ah an tel, an mipum in cu 500 hnakih mallo le meithal 300 lai tel in an do. An mah Chin lam in “minung paziat an thi ti cu kan thei lo nan Thangzang miuk pakhat a thi ticu kan thei” tiah a ngan.

Mirang pawl ih Thangzang miuk a thi an timi cu, Deirel ih ngan mi Tlir Ceu hi a si. Tlir Ceu cu Thangzang khuami a si ih, Mirang pawl ngan vekin Miuk cu a si lo. Hithu cu Thangzang khua ih thang lian mi Salai Chan Khar khal in Mirang pawl thawn doawknak ah kan khua pa Tlir Ceu tla an that ve tiah i sim.

Himi thu hla cu Wim Vervest ih ngan mi The Lost Dictionary timi sung ah khal hi tin a sim. “Thangtlang miuk Lal Luai ih a hminthannak cu political officer Mr.Macnabb a rak donak ruangah a si. Mr.Macnabb ih column cu Hakha ihsin 29th March 1891 ah an suak ih Thau khua ah an pan. Thau khua ihsin an rak tlung lam ah Lal Luai in a do hai. An doawk theh hnu ah Za Huat cu Hakha ah a ra ih daihnak ngah ding in Mirang hnen ah a ra sim. Daihnak an ngah theinak ding ahcun  Thangtlang ih Lal Luai cu mirang hnen ah a apawk ter ding ih an inn pawl ur asi thluh ding . Carey le Tuck in hithu cu “Events of 1892-93” ah, Lal Luai siar lo thlanglam laitlang ah buainak a um lo. Lal Luai cu daihnak ngah ding ih kan dil mi term a lungkim lo ih, a tlan phah in Thantlang khua pawl ah siah a khawn. Netabik ah cu, Lal Luai ih sungkhat unau pawl thawn kan thih ruang ah, Mr.Tuck hnen ah Lal Luai cun, hmun dang ih in kuat lo ding aiah meithal zun 25 cu ka khua pawl in an pek hnu lawng ah ka ap aw ding tiah a sim. Cuhnu ah Lal Luai a dam lo ih, 13th May 1894 ah Hakha ih Mr.Tuck hnen ah a ap awk. Cun, Thantlang pawl khal in April 1891 ih Lt.Macnabb an rak donak ruang ih, dan tat mi man cu an rak pek thei” tiah a ngan.

Curuang ah Deirel ih ngan vekin, Mirang pawl Chittagong column ih an rak kai lai mi Pu Lal Luai ih a va do mi siloin, Mirang pawl laitlang an uk hnu an hnatuan lai, April 1891 ih Lt.Macnabb le a ho pawl an va do sawn mi a si.

5) Thunetnak

Pu Lal Luai cu ruangtha, micak, paral tha le mirang rak dotu kan Chin hero pakhat a si. Mirang a rak do ruangah kum thum lai a rak relh. Himi thu ah Deirel website le Hakha Lai Carel bu ih ngan mi a sual ka tinak khal cu, mirang pawl ih nganmi cauk sung ta pawl thawn an bang awk lonak ruang ah a si.

———————

References pawl cu a tlun ah an cauk hmin le a ngan tu pawl thawn ka ngan thluh zo. A tlun ih ka list lo mi ah ….

1) A military report in Chin-Lushai Country by E.B.Elly (British Library shelfmark number: X.809/66230)

2) Report on the Chittagong Column, Chin-Lushai Expedition by A.O. Chambers (British Library shelfmark number: IOL.1947.b.414)

Na ruahnak