Mr. Bean le Chin Ṭong

Home » Cahram » Mr. Bean le Chin Ṭong

By vcth on August 13, 2013.

Voikhat cu kampani pakhat ah hnaṭuan luhdil in Mr. Bean cun interview a rak phi dah. Cui interview ahcun “Mirang ṭong na thiam maw?” tin an sut “Thiam tuk ee, mirang ram ih suak ka sisi”a rak ti. “German ṭong teh na thiam maw?” tin an suh bet tikah Mr. Bean cun “ Thiam hlah, German ramah ka suak lo pi” tin a rak ti an ti.

Voikhat lala cu zawhte in zinghnam kaihthat ding in heh-le-mang ti’n a rak dawi. Zinghnam cun zawhte ṭih le thlaphang, tingaihnak thei lo’n kua pakhat sungah a relh thup aw. Zawhte khal cun zinghnam ra suahsal ding bawh in cui kaw kiang te cun a rak bawhthup ringring ve. Caan ziangmawtawk a hngak khiokhi nan zinghnam cu ra suahsal ti a nei nawn lo. Zawhte cu a bei a dong cuahco. Culaifangah, a inhnen tei’ uico bo daan a faale pawl in an cawn le a kawk ṭheu kha a hun mang. Cule veten, “Bo-Bo-Bo” ti’n a thiam tawkten uico aw cawng in zinghnam kua cu a vun auh. Zinghnam khal cun zawhte in i bawh ngam nawn lo, uico ṭih ah a tlan hlo zo ti’n hnangam zet in a kaw sung cun a hung suak. Zawhte cun rinlo paral ah a rak kaih dukdi. Cui zaan, a faale pawl thawn zanriah an hil vialvial lai ah, zawhte in lungawi sopar zetin a timi cu “Tui san cu, miphun dang ṭong rak zir le thiam ve a ṭul nan timi hi a va hman (dik) ve” a ti an ti.

Kan theih cio bangin Mr. Bean cu mirangmi asi ih mirang ram ih a suah ruangah mirang ṭong a thiam nan, German ram ih  a suah lo ruangah German ṭong cu a rak thiam lo. Santiluan thawn mil aw in zawhte vekin miphun dang hnenah rak um ve in, an ṭong tla rak zir in thiam ve sehlacu hnaṭuan tla a ngah phah men ding nan.

Kei teh hi Chinram ih ka suah ruangah maw Chin ṭong ka thiam? Hmun dang ram dang ah suak in um ve sehla teh Chin ṭong hi ka thiam pei maw? Chin ṭong lawng thiam in ṭong dang thiam lo sehla teh tuisun ih ka hnatuannak ah ka hlawhtling thei  pei maw? Santiluan thawn mil aw in ṭong dang zir in thiam ve sehla, Chin ṭong thiam lo sehla teh Chinmi sinak ka nei lai pei maw? Thaisun ih Chinmi pawl teh khui hmun khui ram bik ha an suahnak le an umnak ding? Santilaun an timi in teh kan Chin ṭong hi miphun dang pawlih zir ṭul le thiam ṭul ah a can (tuah) leh pei maw?

Ṭong lam zirnak ih mithiam saang pawl in ramnung hin ziangtin ṭong (awsuah) kan thiam ti thei duh ah,  nui pum sung ihsin rung suak pekmi tuu faate rual hmang in zingzawinak an rak tuah dah.Cui tuu faate rual cu awn-ai zianghman thei lo ding in hmun dangah a hran ten an rak ret. Cui zingzawinak ih an hmuhsuahmi cu, cuti’h a hrantei an retmi tuu rual sung ihsin a hrekkhat cun an hung upat tikah “Um-Paw…Um-Paw” ti’n caw bang in an au thiam nan tuu vek cun au le awsuah (ṭong) an thiam nawn lo. Cuticun, ziangruangah cui tuu rual hrekkhat in caw bangih awsuah an thiam ti felfai ten an hliakhlai sal tikah cawkhaltu pawl in an zingzawinak hmun kiangnai ah, an theihlo sungah caw an rak khal ṭheu ih caw au-aw a rak thei ngahtu cui tuu hrekkhat cun caw au-aw cawng in caw vek ih au le awsuah an thiam nan, an phunpi tuu vek cun awsuah an thiam nawn lonak a si ti’n an hmusuak.

“Kei teh hi ka theih lo sungah miphun dang ṭong in i neh tuk pang maw?” ti ka ruat ṭheu. Mr. Bean cun a sinak ruangah silo’n a suahnak ruangah mirang ṭong thiam in a rel aw. Tui ṭum cu Mr. Bean ih hnihsuah relmi hi ka hnih a suak thei lo ee…

Salai Ayete (Vankau)

Na ruahnak

7 Responses to Mr. Bean le Chin Ṭong

  1. jn   February 3, 2011 at 2:56 am

    sair tlak taktak ca a si, lungawi…

  2. Pathang   February 5, 2011 at 8:30 am

    Mr Bean le Chin Tong timi ka duhzet. A dangdang tla ka rak lo cuan hai ding!

  3. math games   February 7, 2011 at 3:59 am

    thanks

  4. Anonymous   July 24, 2013 at 2:13 am

    A va tha ve…. ka duh tuk… tulai fangih kan tul tukmi a si,,,

  5. Anonymous   August 14, 2013 at 9:53 am

    Salai Ayete na ngan thiam nasa. Tui hlan ih sin hi thu hi ka rak ruat theu suah nak nu le pa le lai mi sisi mai suah nak nu le pa’i tong thiam lo ti hi a mualpho thlak tin ka ruat. Mai tong hnak in mi tong uar nak thin lung kan neih theu mi hi a poi tuk….