National (Nationalism) ihsin Professional Ah

Home » Cahram » National (Nationalism) ihsin Professional Ah

By vcth on June 9, 2013.

UEFA
Francis Cung Bik

Rualpi pawl thawn online in kan Chat aw ṭheu. Thu nuamnuam kan rel ṭheu. A caancaan ziang rel ding cu ca thei lo in kan um caan tla a um. Cuvek caanah bawhlung thu kan rel ṭheu. Bawhlung thu kan rel ve ten cu kan tui nasa. An ngan mi hman siar man lo in a ngan kan nawt aw. Rel ding kan thei nasa.

Southeast Asia ih a ṭhanglain mi mino tam sawn cu bawhlung sit zoh cu an paih, Europe ih in rak influence ruangah maw cu thei hlah. Bawhlung cu Europe pawl lawng siloin Asia, Africa, S. America, Central America, N. America, Australia le Pacific Islands ram pawl tla in an duh bik mi lehpannak pakhat asi. Rualpi pawl thawn capoh thu ngai in kan ti aw ṭheu, “mi in globalization ti mi tahṭhimnak pakhat pek hnik aw in ti sehla “bawhlung” kan ti thei ding.” Leitlunpi caan bangrep ten (a bang aw mi caan) tuarnak (feeling) pakhat in pe theitu tla asi. Mifarah le milian in fin khawmtu tla asi.

Bawhlung thu kan rel tikah a hmaisabikah kan duhmi, kan ṭanmi club thu cu kan rualpi pawl hnen ah a thei lo pang ding phangah kan sim nasa. An update thu pawl, netabik an lekmi pawl kan sim. Cuvekin annih khal in an ṭanmi club thu in sim ve. Bawhlung sit zoh tiah tongpa zohih zoh men kan si lo, mah le Club ciar thawn cu kan si ve. League thu kan rel, ziang dinhmun an si, ziang dinhmun kan si, cun Champions league thu, FA thu kan rel. Cun ṭhal cawlh caanah kan Club in zo lei le a ṭha ding, hmai kum lehpannak kum thar in cu ruahsannak kan nei ko ti pawl kan titinakah tu a ra ding mi June ih EURO hman kan hngilh zik. A laim cia mi World Cup tla Coca-Cola tilarnak fang lawng ka mitthlam ah a tang. World Cup in ka lung in turter lemlo. Curuangah ka ruat ngah mi thil pakhat cu “National cu Professional in a sawng thlang silo sawm.”

Bawhlung sit cu tu baite ih thok mi asilo. Khuahlan ihsin rak lek zo mi a si. Culaiih a rak lar bikmi cu 1930 ihsi thokmi World Cup a si. Kum 4 voikhat hrangah an nop aw. An ha an tat aw, a lektu, a zohtu, zozo khal in. Keimah ka cin thawk hman ah 1994 USA ih World Cup le 1998 France ih World Cup cu a ropi in a hlung hlai zet. R. Baggio te Romario te pawl an rak lar nasa. 94 ih World Cup an hlapi ah “the final countdown” Europe band ih sak mi an hmang ih 98 ah “Ricky Martin ih sakmi “La Copade La Vida (the Cup Of Life) lole Goal Goal Goal Ale Ale Ale” kha an hmang. An hla tiang ka cing.

Kum 2000 hnu in Club lian zetzet pawlin paisa tampi hmang in mi an ko, mi an lei, lakhah sang pipi an pek tikah national team ah zohman caan an pek thei tuk nawn lo. An tik cu caan tam sawn cu Professional ih an leknak ah caan a cem. National (World Cup) zohman in ziang an siar nawn lo ka ti duhnak siloin bawhlung leitlun ah World Cup hnakin a thupi sawn ih ruah mi a suak tinak sawn asi.

Hi thu cu bawhlung thu men a si a bang nan bawhlung leitlun lawngah asilo, nitin nutu khawsaknak ah tla a si thlang lo sawm tin ka ruat. Hi thil hi kan post modern san ih mizia pakhat tla a si in ka hmu. Kum zabi 20 lai vekin ram, miphun uu duhnak, leitlun zate uk duhnak thinlung pawl cu a hlo vivo ih komkhawm hnaṭuannak le dengfel fimthiamnak (IT) pawl cu a thupi nasa thlang.

A hleice in hruaitu pawl in hih san ih um tu daan theih thiam a ṭul. Tulai san ah Super Hero si ding cu a ol nawn lo ding. Politics ah siseh, Biaknak le Zatlangnun ah siseh komkhawm awton in lungthiang ten kan hruai aw a ṭul. Cucu kan san ih in dil mi thil thupi zet pakhat asi.

Apr 22, 2010 post zo mi republish sal mi a si

Na ruahnak

2 Responses to National (Nationalism) ihsin Professional Ah

  1. Anonymous   April 25, 2010 at 4:24 pm

    Na ngan fuh nasa, ruahnak thatha tampi i theihkir ter sal. Mi thin neh thei le siar duh sinsinnak nei dingin ca na ngan thiam sinsin. Ka lo lawm in ka lo lungawipi.

    Na rual
    Pa Pum
    Vairam khuapi

  2. kim (Falam)   June 10, 2013 at 2:25 pm

    Hello, Nau Salai Cung Bik,

    Na ruahdan vek hi tulai kan Chin mi nih neih ve thluh hnai seh la cu kan Falam, Kan Chin, kan ram thawn, kan minung thawn kan tthangso tuk ding nan pan teh, a poi mi cu Super Hero si duh le, thiam bik, thei bik, mah thu thu lawng duh le mah thu kha mi-ih an thlun thluh ve ding duh kan tam tuk tik ah poi ka ti zet, IT san a si zo, kom khawm aw ih hna ttuan tlang san a si zo ti hi kan Chin mipi nih a tak in kan thei suak ih kan practice ttul zo nan pan teh.

    Ei Kim (Falam)