Nitin Manna: Pathian in Hril Seh

Home » Nitin Manna » Nitin Manna: Pathian in Hril Seh

By vcth on May 5, 2017.

NITIN MANNA

May 5
Tlawngkai Ninga

Pathian in Hril Seh

Lot cun amai’ hrangah Jordan tiva kap
phairawn zate in a hril ih
nisuahnak lam ah a ceer.
– Seem. 13:11 [Seem. 13:9-13]

{audio:http://hwcdn.libsyn.com/p/c/b/a/cba3dc3f35236d39/May_5_2017_Nitin_Manna.mp3?c_id=15174538&expiration=1493981342&hwt=ca02cd401656c4c3bf2eae6b3212e71f|titles=Nitin Manna – May 5}

Midang sim dingah a thuuktukmi thuthup, thuthimnak ah innsang neih duhnak, hnatuan, dinhmun ttha tivek kan duh thei men. Kan duhmi hmuahhmuah Pathian kut sungah ret in, “Bawipa, Nangmah in i hril sak hram aw. Keimah te ka hril lo ding,” tiah thlacam ringring ding a si.

Lot cun a duhmi hmun amah te’n a hril. “Cutikah Lot cu khua a cuan ih, Bawipa ih hmuan le Izipt ram vekin, Jordan tiva kap phairawn cu Zoar tiang tidai tamzet ngahmi ram ṭha a si kha a hmu…. Jordan tiva kap phairawn a zate’n a hril ih Nisuahnaklam (East) ah a ceer” (Seem. 13:11-12).

Jordan tiva kap phairawn cu dawm ṭha le tidai a tam ih Lot hrangah a ṭhabikmi hmun le ram a bang. Asinan mi ṭha lozet pawl ih balhtermi ram a si (c. 13). Pastor Ray Stedman in, “Lot in amah te khuakhang a tum ih a hrangah a hril, a hmuhmi in a bum, khua hmu loin riahsiatnak le thuṭhennak sungah a riilbah. Khatlam ah Abraham cun a hrangah Pathian a hrilter. Cumi sungah tleunak dik a hmu,” tiah a ngan. Lot in amah te a hril ih a innsang le a neihsiah tivek ziang hmuahhmuah a hloter ttheh.

Kan hrangah Pathian hrilter in a sim vekih thlun cu a ṭhabik. Kan Pa Pathian cun duhdawtnak le fimnak thawn in hril sak. – David Roper

Dunglam caan reipi ah ka nunnak hrangah thurelcatnak ka nei,
Bawipa rian dingin le ka lamzin i hril sak dingin;
Ziinṭeek ah ka lamziin fiang loin ka um tikah,
Nikhat hnu ni khat lam i hruai ding a pelh dah lo. – Hess

Pathian duhmi cu
kanmai’ duhmi hnakin
kan duh sawn tikah
diriamnak taktak kan nei.

Na ruahnak