NLD in Pu Henry Van Thio vice president ih hrilnak parih thlirnak

Home » Thlirnak » NLD in Pu Henry Van Thio vice president ih hrilnak parih thlirnak

By vcth on March 11, 2016.

Pu Henry Van Thio

Mizaan ah NLD cun Amyotha Hluttaw ih vice president nominee ah Pu Henry Van Thio hmin an thun ih tusun ah Amyotha Hluttaw sungah USDP palai thawn an zuam aw ih Pu Henry in a neh ruangah presidential nominee ah a tling. Cucu zohman ih rak ruat lomi a si ruangah zo cio kan mang a bang thluh.

Hi thuthawn pehpar aw in Kawlmi hrekkhat siseh, tlangparmi hrekkhat siseh an lungkim lonak thu tete social media ah hmuh ding a um phah. Cuhlei ah Pu Van Thio cu Khrihfa a si ruangah Kawl, biaknak lam extreme deuh pawl in an soisel lala.

NLD in Pu Henry Van Thio hi vice President ah a menmen in an hril lo ding cu zum a um. Ziangruangah NLD in ramkhel lam ah zo hman ih theih lomi, Chinmi lala hman ih theih lomi Pu Van Thio hi vice President ah a thun si pei?

Pu Henry Van Thio ih bulpak sinak le hmuhtonnak ruangah

Ralkap kum 20 lenglo a tuannak: NLD cozah hrangih a thupi zetmi thil pakhat cu ralkap le NLD karlak pehtlaihnak t’ha ding a si.

Ram a tawi dahlo tu in ram tawi thu rel ding a ollo, cu vekin sum a dawng dahlo tu in sumdawnnak thu lam rel ding a thei aw cuca lo. Ralkap thawn thurel tlang ding ah ralkap rak tuan dahtu cun thurelpi ding tam deuh a thei ding cu a awm ang zet. Meeting caan lawngah siloin cawlh caan, thu naum titi caan ti vekah tla an hmuh tonnak tete rel tlang ding tampi a um ding.

NLD MP pawl sungah Pu Henry Van Thio hnakin ralkap kum rei le rank sang a tuan an um lo ding. Curuangah ralkap thawn pehtlaihnak t’hater dingah Pu Henry Van Thio hi a awm ang zet.

Cun Kawlram cu ramsung ral a tam zetnak ram a si. Zalennak kan ngah hla ihsin tusun ni tiang ramsung ral a um ringring. Cozah le tlangpar hriamkai bu lakah siseh, Tlangpar hriamkai bu an mah le an mah lak ah siseh do awnak a um ringring. Pu Henry Van Thio hi Kawlram hmunkip ah ralkap hna a rak tuan, Kachin, Karen, Mon tiin tlangpar hriamkai pawl t’hacaknak hmun tampi ah hna a rak tuan dahtu a si. Cozah hruaitu sung ihsin rallam thu thei a t’ulnak zawn a rak um.

Sethmuh 1 ah Kum 9 hna a rak tuan: Pu Van Thio cu ralkap lawng silo in Sethmuh 1 ah Mandalay le Yangon ah bawi pakhat dinhmun in kum 9 sung hna a rak tuan. Curuangah administration lam ah hmuhtonnak a neitu a si.

Mirang tong a thim: A theitu hrekkhat ih an sim daan ah Pu Van Thio cu mirang tong a thiam zettu a si tiah an ti. Mihrek in New Zealand le Philippines lam ah tla a rak um dah tiah an ti. NLD MP sungah hin mirang tong duh tawk ih a thiamtu a tamtuk lo ding a bang. Ramdang mi bawi upa tontik ah duh tawk a tong theitu hi a rak t’ul.

NLD in Kawl pawl ih Tlangparmi pawl parih ruahnak an siat bal

Mihrekkhat in vice President hi tlangparmi pawl khuaidaan ih pekmi a si, tuhi Chinmi pawl khuaidaan kan co caan a si tiah an ti.

A tak ahcun tuitum ah Chinmi a si tengteng ding tinak a um lo. Ramkhel lam thlingthlatu le Media tampi in an zummi cu Shan lam pawl a rak si.

Kawl pawlin thlangparmi pawl parih savo an zem daan ah Shan le Karen, cun Mon le Rakhine, cun Kachin, netabik ih savo an pekmi hi Chin a si. Cucu Kawl pawl ih ruahnak a si kan tile a sual lo ding.

NLD in Kawl pawl ih tlangparmi parih an hmuhdaan bal in Chinmi vice President an peknak thawngin tlangparmi parih NLD policy a hnget khoh ter ih zumtlak a si ter sinsin.

Ziang thilti theinak hman a neilo mi vice president?

DVB debate ah Pu Sakhong Lian Hmung in tlangparmi paw cu hmun in pek hman ah zianghman thilti theinak a um lomi vice President tivek lawng in pek ding tiah a rak ti dah.

Vice President a si vekin President tlukin thu a nei lo ding cu a fiang ko. Ziang khal lole Chinmi Vice president kan si ti mi rengreng in Kawlram pi Chin mipi mithmai a hngalter. Culawng siloin miphun dang ih in zoh daan tla tampi a dang lam ding.

Na ruahnak