NLD in zo pawl Vice president ah a thun pei?

Home » Thlirnak » NLD in zo pawl Vice president ah a thun pei?

By vcth on March 1, 2016.

President zo a si pei

Tulai mipi ih an thei duhbik mi thu pakhat cu NLD in zo vice president ah zo a thun pei ti hi a si. March 10 ah vice president hmin cu Hluttaw ah thun lut ding a si.

NLD hotu pawl in cu Pi Aung San Suu Kyi cu president a si ko ding, a hnu le rang lawng si ko tiah an ti.

Asinan tuitum ih vice president hmin thun lutmi ah cu a hmin a tel thei lo ding. March 10 ih hmin thun ding a siih ziang ti lam khal in daanhrampi, 59f, rem le cawlhter sungnak ding caan a um lo.

Curuangah tulai fang mitampi ih NLD ih vice president ih a thun ding tiih an zumbik mi pawl tla cu Pi Aung San Suu Kyi thawn nai aw, nel awtu pawl an si.

A pakhatnak ih an zummi cu Pi Aung San Suu Kyi ih a rualpi tha a simi U Htin Kyaw a si. A pahnihnak ih an zummi cu Pi Aung San Suu Kyi ih bulpak harhdamnak tuanvo laktu le NLD harhdamnak committee sungtel a simi Dr. Tin Myo Win a si. A pathumnak ih an zummi cu CEC sungtel Dr. Myo Aung a si.

U Htin Kyaw cu Kawlram cangan thiam hminthang Min Tuh Wan ih fapa a si. A pu, a nupi ih pa, tla NLD CEC sungtel a rak si dang. Cun a nupi Daw Suh Suh Lwin tla Yangon ramthen, Tongkhuah pengih NLD MP a si.

Dr. Tin Myo Win cu Pi Aung San Suu Kyi ih bulpak le innsungsang sibawi in kum reipi hna rak tuantu a si.

Dr. Myo Aung cu NLD thok pek ihsin a teltu pakhat a siih tulaifang Cozah hlun le cozah thar thuneihnak thaten pek aw theinak ding committee ih tuanvo neitu pakhat a si.

Asinan NLD lam in official in vice president ah zo an thun ding ti thu an suahmi, a than mi cu a um lo. Ramkhel lam a thlirtu pawl ih zumnak le ruahnak men cu a si. BBC

Na ruahnak