Nui’ Ni A Thok Daan Thuhla Tawi

Home » Cahram » Nui’ Ni A Thok Daan Thuhla Tawi

By vcth on May 11, 2017.

By Lairawn Meifar

1872 kum ah Julia Ward Howe in America ah Nui’ Ni (Mother’s Day) hi tuah ṭha a si tin ruahnak a suahpi hmaisabik. Boston khua ah Nui’ Ni biakkhawmnak cu kum tin in an rak tuah. Julia Ward Howe cu America, New York khawpi ah 1819, May 27 ah a suak. Anih hi cangan thiam, bezai thiam, le zatlangnun hrangih cangvaihnak uar zet a si. Nui’ Ni hi June 2 si dingin a rak hril nain a hlawhtling lo. Julia hi October 17, 1910 ah a thi. Asinan a ruahnak cu nung ringring.

Nui’ Ni tin May zarh hnihnak ih hmang dingih a thoktu cu Anna Jarvis a si. Anna Jarvis hi pasal le fanau nei lo a si. Nui’ Ni hmang dingih ruahnak neitertu cu a nu Anna Marie Reeves Jarvis a si. A nu in Nu pawl sunloihnak ni hleice um ding a duh thu hi thlacamnak ah a telh ringring. Cutiih a thlacamnak cu a fanu Anna Jarvis (kum 12) cun a rak thei. Cutin a upat tikah Nui’ Ni tuahsuak thei dingin nasatak in a cangvai. Anna Jarvis cu Amrecican ih Webster khua ah May 1, 1864 ah a suak.

Anna Jarvis in a hmaisabik Nui’ Ni a tuahnak cu 1887 April 20, Henderson ah a si. Cuih sin kum (20) sung Sunday School sayama a rak ṭuannak Andrews Methodist Episcopal Church ah 1908 May 10 ni ah a vei (2) nak a nu hngilh lonak le upat sunloih peknak a tuah. Himi ṭum ah a nui’ duh bikmi Carnation pangpar (ေဇာ္မႊားပန္း) 500 thawn sunglawi zet in an tuah thei.
Amah cu a nu ih rinsan zetmi a si. A nu thawn hmun dangdang ih um ding a duh lo tuk nain fimthiamnak zir a duh tuk vek ruangah khua dang ah a um. Cutin fimthiamnak lamah a hlawhtling vivo ih, tlawnginn ah sayama a ṭuan. Ca a zirh phah in nauhak pawl cu Baibal ca khal a zirh phah ṭheu.

1902 kum, Anna Jarvis cu kum (38) a si lai ah a pa in a rak thihsan. A pa ih a taan hnu kum (3) nak 1905 May 9 ni ah a nu in a thihsan lala. A nu hi damlonak ruangah kum (15) sung rori ihkhun parah caan a hmang nain Anna in thinsau tein a nu cu a tuamhlawm. A nu thih hnuah a nui’ duhdawtnak a thlum-alnak kha a vun theifiang deuhdeuh ih lungleng le riahsia zet in a um. A nu hngilhlonak ah ziang ka tuah sehla ṭha ding ti a ruat. Cutin a nu thih hnu kum (2) nak 1907 May 9 ni ah a rualpi pawl a sawm ih, hringtu a nu parah ṭihzah upatnak a pek. Hitiih a tuahnak san cu: hringtu nui’ duhdawtnak thei lo in a vakvaimi pawl in hringtu nui’ duhdawtnak an theihfiangnak ding hrangah a si.

Nui’ Ni hi American ram khalah Julia Ward Howe in 1872 kum ah a rak tuahpi zo. Culawng si lo in Mary Towles Sasseen, Franle E. Hering pawl khalin hringtu nu pawl upat peknak cu an rak tuah dah cio ko. Asinan Anna Jarvis tlukih rampi uktu ih rak theihpimi a um dah lo.

Anna Jarvis in leitlunpi ih theihpi in Nui’ Ni tuah ding a duh tuk ruangah ram uktu le bawi pawl hnenah vei (10,000) lenglo cakuat a ngan ih, a kuat. Curuangah a nganmi ca hi mi pakhat ih nganmi ah a tam bik a si ding ti tiangin an rak ti. Cutin American President Woodrow Wilson in 1914 May zarh hnihnak Zarhpi Ni hi nu pawl parah upat sunloihnak peknak ni “Nui’ Ni” siseh tin lungkimpinak le nemhngetnak hmin a khen. Cuihsin thok in Nui’ Ni cu sunglawi zet in hman a si vivo. Kum 2017 tiangah Nui’ Ni hmangtu ram hi ram (85) lenglo in pehzom in an hmang thei.

Anna Jarvis cu kum (84) nungdam in, 1948 November 24 ni ah a thi ih, a thlan parah “Carnation” pangpar (43) an ret. A sullam cu a thih ni tiangah “Hringtu Nu” upatnak a tuahmi ram (43) pawl in upatnak kan pek a si ti langternak a si.

NUI’ NI IH HMANMI CARNATION PANGPAR

“Carnation pangpar cun nui’ duhdawtnak thianghlim a hmuhsak” tin Anna Jarvis in simnak a nei. A rong a senmi carnation pangpar cu nungdam laitu nu pawl hrangah a si ih, a rong a raangmi pangpar cu mualliam zotu nu pawl hrangah a si. (Nungdam lai nu a neitu pawl in carnation pangpar cu an lu ah an ton asilole an angki tivek ah an thiat ih, an nu pawl a senmi carnation pangpar an pe. Nu nei nawn lotu pawl cun carnation pangpar raang kha an lu le an angki ah an ton ih, an thiat ve.

NUI’ NI HMAN NI PAWL

Nui’ Ni a hmangtu ram pawl hi kan hman ni a bang aw lo celcel nasa.

May zarh hnihnak ih a hmangtu ram pawl cu:
Australia, Belgium, Brazil,
Canada, Denmark, Finland,
Germany, Greece, India,
Italy, Japan, New Zealand,
Singapore, U.S,

May 10 ah hmangtu ram pawl:
Bahrain, Malaysia, Oman,
Pakistan, Qatar, Saudi Arabia le
South Africa U.A. E

May zarh hmaisabik (Zarhpi Ni/Bawipa Ni)
Austria, Hong Kong, Hungary,
Netherlands, Portugal,
South Africa, Spain, Taiwan,

RAMDANG PAWL
Albania (March 8)
Egypt (March 21)
Indonesia (December 22)
Norway (February 13)
Poland (May 26)
Russia (November 28)
Sweden (May zarh netabik)
Thailand (August 12/Siangpahrangnu Sirikit Kitiyakara ih suahcam ni)

Ref:

http://en.wikipedia.org/widi/Mother%27s_Day
http://www.biography.com/…/anna-jarvis-mother-of-moderns-da…
https://www.bing.com/search?q=anna+jarvis&filters
http://www.thechinnews.com/hringtu-nu-ni-mothers-day-thawh…/

Source: The Chin Voice/Lairawn Meifar

Na ruahnak