College ka kai thok kum, Whites timi innsang thawn kan tong awk. An innsang cu kan innsang thawn ling te let kan si, an hnen ka va leng thok veten inn timi ih sidaan ding hi ka va hmusuak ngah. Jane White thawn tlawng kai tlang kan si ih an innsang nih tla hlunghlai zet in in hmuak, an mah sungmi pakhat vekin in zoh ve.
Kan innsang ahcun thil poimawh pakhat a cang tinten zo nih a tuah ti hi a hmaisabik ih kan hawl ringringmi cu a si. Coka ih hnawmbal pawl hi zo nih a tuah tin ka nu nih a au. “Katharine, nangmah ruangah sokhaw zawhte nih kan pakan a thlakkhuai hi,” tiah ka pa nih a ti ding. Cutin kan unau rual tla zanriah ei phah in mawhpuh aw ding kan hawl celcel.
Nan Whites sungsang ah zo nih ziang a tuah tihi an buaipimi a si lo. Thil zoh rem lo a um a si le a hmutu nih remcang dingin an tuah saal lohli men.
White te nupa nih fapa 3 le fanu 3 an nei. Fapa pakhat cu a nauhak lai te in a thihsan hngai zo. Curuangah tla si men ding a tangmi sungsang rual cu duhdaw aw zetin an nung.
July tlawngpit ah White fala unau 3 thawn motor in Florida in New York ah kan tlawng tum. A upa pahnih a si mi Sarah le Jane cu college tlawngta an si zo. Nautabik Amy cu kum 16 kim pek fang a si, motor mawngtheinak license nei pek a si ih a duhaw nasa, a tongmi hmuahhmuah tla a license thar cu a hmuh hngai thluh. Kan khualtlawng ding ah tla a phur biktu a si.
Mi hnok deuh hmun pawl ahcun upabik Sarah nih a mawng vivo. Mi malnak le lam tluangnak pawl ah cu an naunu Amy cu a mawng ter. Cutin South Carolina ah cu suncaw ei in kan khualtlawn cu kan peh. Cutin kan feh vivo laiah lut ngah lo ti ih an taar mi ah Amy cu a mawng lut vivo, a hmu lo maw a lau ih a cawl thiam lo si pei maw, cak zet in a mawng lan vivo. Khat lam ih ra mi Truck tumpi cu brake a phit man ve lo ih kan motor cu nasa takin in taik.
Ka rual Jane cu cui hmun ah a thi cih.
Kei cu hliamhma fate lawng ka ngah. An nu le pa hnenah ziangtin ka sim ding ti ka ruat ah a ngaihnak ka thei lo. Kei ka rual ih i thihsan hman tuar daan ka thiam lo si khawh, an nih cu an sungsuak fa!
White te nupa cu sizung ah an ra thleng. An fanu 2 umnak ah zamrang ten an feh. A lu an tuammi Sarah le a ke an tuammi Amy cu an va pom. Dam ih fanu 2 an tong ngahmi an lungawinak cu an mithmai ah a lang. A ninghangmi fanu 2 cu an hnem, an mitthli an hnul sak hngai.
An fanu 2 hnen, a hleice in Amy hnenah dam ih an va hmu mi parah an lungawi zia an rel rero.
Ka mang a bang, kawknak, mawkthluknak pakhat te hman a um lo.
A rei hnuah ka sut hngai saal ih in letmi cu, “Jane cu in thihsan zo, ziang vekin puhmawk kan hawl le kan tawlrel le tla a nung saal cuang nawn lo ding. Nan Amy cu a nung lai, hmailam caan saupi feh lai dingmi a si. A mah ruangah a u a thi ti mawhthluknak thawn cu a nun hmailam ziangtin a feh thei nawn ding, nomnak le lungawinak tla a co thei nawn ding maw?”
An dik nasa. Amy tla college in degree a ngah hnuah pasal a nei. Mibanglo nauhak pawlih sayamah a si. Fanu 2 ih nu a si, a upa deuh ih hmin ah Jane tiah a sak.
White sungsang hnenin mawhtluk aw rero men ih sullam a nei lo zia le a santlai lo zia ka nunah zirnak tumpi ka ngah.
Johnlsl
Source: : Kathy Johnson Gale ih Blameless
