NUNNAK?

Home » Cahram » NUNNAK?

By vcth on June 11, 2013.

B.A (Thang), Salai

Mahten thuruat theimi kum ka si ihsin “Minung Nunnak” timi ziang si? Ziang si nunnak? ti keimah le keimah ka sut ṭheu. Kei cu zing khuavang veten zaal a lak ih tlawng va kai mi tlawngta pakhat ka si. Tuition kai phah, tlawng kai phah in caan a cem ṭheu. A caancaan le tlawng ka thlan phah. Bawhlung kan va lek ṭheu. Chess kan lek ṭheu. Ping Pong tla kan lek ṭheu. Zaan khua a thim le nunthuleng pawl ka siar ṭheu.

Cutikah keimah le keimah ka sut aw mi cu….. Tlawng kai timi hi minung nungnak a si maw? Nunthuleng siar timi hi Minung nun nak a si maw?

Life


Zianghman thei lo pi in tlawng kan va kai thok. A,B,C,D hman kan rak thei lo. Cumi ihsin tlawnginn ah A,B,C,D kan rak thei. Neta ahcun, A,B,C,D lawng si nawn loin kanmah ten kan duhmi kan hawl, kan siar. Nunnak timi tla cuvek thotho a si in ka hmu. Leilungtlun ah lolak (zero) in kan rak thleng. Nunnak ihsin kan zir. Cuti-in kan rak ṭhang so vivo.

Cuti tikah Nunnak hi….. “Tlawng pakhat maw a si………?”
……………
Nunthuleng kha zianghman a sung thu thei lomi dinhmun ihsin cahmai pakhatnak ihsin kan rak siar thok. Cahmai pakhat hnu pakhat kan ṭheh tikah cun cui nunthuleng kha thaten kan thei thluh.

Minung pawl hi zianghman kan rak thei dah lo mi leithlun ah kan rak thleng. Nikhat hnu nikhat kan nung. Ni ihsin zarh, zarh ihsin thla, thla ihsin kum a liam vivo, cun hmuh le tonmi a tam vivo vekin nun hi ziang a si ti tla mal tete kan fiang vivo. Cutikah nunnak timi hi…. nunthuleng siar thawn maw?
……………
Chess kan lek tikah hmaisa bik kan tuah mi cu rawng hril hi a rak si. A raang maw na duh? Maw a dum? Rual le pawl thawn lek caan ahcun a poi lem lo, pakhat le pakhat kan sim aw thei. kan duh mi rawng kan lak thei. Asinan zuamawknak ahcun, a ngah lo. Zohfeltu a um ih cui zohfeltu ih thuh mi kha hril a si. Kan ngah mi rawng cu thleng theih asilo.

Nunnak timi ah tla mai paihmi ṭuan, mah duhmi thawn pum rak cawm aw theitu an um vekin…………..Caan tam sawn ahcun zohfeltu ih in pekmi, kan co mi thawn nun a rak ṭul.
………….
Chess kan lek tikah poon te cu a tha a mel bik mi a si. Asinan cumi poon te ruangah kan sung thei, kan neh thei caan a um. Minung kan nunnak ah rualpi pawl hi a thupi maw tin kan ruat tikah thupi tin kan sim thei lo vekin, thupi lo tin tla sim theih a si cuanglo. A caancaan le kan Nunnak ih kan sunlawinak pawl kha kan rual le pi pawlin an tuah thei….cuvek ṭhiamṭhiam in………….
……………
Chess kan lek tikah kan lekpi (kan ralpa) in a lakin in ei ter caan tla a um. Cutikah in ei ter mi kha voikhat teih ei lohli ṭih a um. A dunglam ah a tumtahmi pakhatkhat a um maw? Silole a mit a vaivuanih a hmu sual mi maw? ti fiangten zoh a ṭul. Amit a sual ruangah in rak ei ter mi kha a tumtah mi pakhat khat um si ding tin kan ruat ih kan rak ei lo sile kan na ding. Cuvekin tumtahnak nei keukeu mi kha a lak ka ngah ual tin kan ruatih kan ei pangah cu kan na nasa ding, thi hman kan thi thei.

Cuti vekin kan nunnak ah in bawm duhtu an um vekin cui a thlam phenih kan hmuh thei lo mi thil tla tampi a um ve thei. Voikhat, voihnih laksawng kan ngah ṭheu. Cui laksawng cu zianghman pek sal a ṭul lo. Asinan caankhat caanhnih ah mi-in in bawm nan cui a phen a dunglam ah a peh a rak um theu. Cui in bawm mi kha lak maw lak lo, ziang a ṭha deuh pei.
……………
Chess kan lek tikah pakhat hnu pakhat kan thi veve. Cutikah kanmah lamih a ummi tha (power) le khatlam, kan lehpi pa lamih tha kha kan ruat a ttul thlang. Ka do ding maw(Tiatsit maw?) lole Khansit maw? Kan tha (Power) a tha ih kan do tinten tla kan neh cuanglo vekin, khansitih kan lek tinten tla kan sung lo ding tinak asi cuanglo. Tuvek dinhmunah ziang ka tuahding ti fimkhur zet in ruat a tul.

Cuvekin a caancaan le kan nunnakah retheinak, zonzainak ti pawl thawn kan do aw theu. Cutikah kan nei mi tha ka zohfel a tul. Tha kan nei lo laiah kan va thuat a sile kum 7 nauhak pa fang dipkhat phurter vek kan si ding. Zonzai siseh, farah-ah siseh fimkhur ten, ralring ten nun tihi a thupi zet.
……………
A caancaan le kan tha (power) a tha ih nasa zet in kan do vekin a caancaan le tha a dermi bang in khansit in tla kan um caan a um ve. Kan tha a malih khansit kan lek nan, kan Kingpi kil khawi phah ten a remcang caan hrangah ti kan tim tuah ve. Caan remcang timi te cu kan bawh ve nasa. Cuvekin kan cak zet tiih kan ruat aw caan khalah voikhat te kan cang sual ruangah thihrulh in kan khir kan zuang caan tla cu a um ve.

A caancaan le leilungthlun ah nehtu nun, aungminhmuh a ngah rero tu mi tampi an um vekin rawl voikhat ei in ding hrangih a buai zet tu tla cu mi mal an si ve lo. Nehtu nun a neitu, a aungmintu pawl tla hmai an nor rero vekin thaithawh zaanriah hrangih a buai rero tu pawl tla an mah le tawk ten hmai an nor ve rero ko. Ziangtluk kan aungmyin khal le rinlopin pakhatkhat tisual ruangah kan neih le siah, sui le ngun pawl tla cu mitṭhep karah a hlo thluh thei. Cuvek ṭhiamṭhiam in zianghman a silo kan rak timi nu/pa khal caan remcang, caan ṭha pakhat ruangah nehtu nun a neimi nu/pa tla a si thei.
……………
A zate kan ruat sal tikah minung nunnak timi hi CHESS lehnak pakhat thawn a va bang lala…
Cutin a sile nunnak timi hi Chess Lehnak Maw?

Na ruahnak