Nunnak a Tawi Zia in Zirh Awla!

Home » Cahram » Nunnak a Tawi Zia in Zirh Awla!

By vcth on October 8, 2013.

Francis Cung Bik

Leitlun ah a tlangpithu in minung kan kum cu 66.65 a siih ram cangkang le ṭhangso ram pawl ah cun 67-72 asinan kan Kawlram le ram thangso lai pawl ah cu 52-58 a si. Zingtikah kan thi ding, kan thih le nun thu cu zohman ih rel theih asilo nan mai saduh thah ten cu kum 65 tiang hrawng tal nung sehla ka ti aw.

Kum 65 cu a ni in kan siar asile ni 23,600 hrawng asi. Ka nauhak lai ihsin tu ni tiang ka nun ka ruat sal tikah caan rei tukin tla cu ka rak thei lo nan ni 10,000 lai cu ka hmang liam zo. Ka san hrek lai cu ziang cu ca lo in a ra cem men. A tang lai mi ka san hrek teh rauh man hlanah a ra laim ve lala pei maw? Nazi, ni, zarh le thla pawl an liam. Cui tik cu caan pawl in ka nunnak cu nitin in fir, in ei sak.

Caan tampi ah nunnak, thihnak thu hi biaknak lam hrang lawngah kan ret ṭheu. Minung pakhat kan si ahcun hihi buaipi tlak zet thil cu a si. Nikhat ni ah zianghman a um nawn lo mi, hmuh thei lo, tham thei lo mi ah kan ziam ral ding.

Leitlun ih mifim tiih na uar bik mi pakhat hril hnik aw. Cu pa ih a nun ruat hnik aw. Ziangruangah mifim na ti. A ram le miphun hrangah maw, minung pawl hrangah maw ruahnak ṭha, hnaṭuan ṭha, ṭhathnemnak a suahpi tu a si ding ka zum. Nunnak ti hi caan tawitak te a si, cui caan tawite sungah kan ti thei tawk in ṭhatnak, ram le miphun ṭhansonak hrangah tiih pum a pe aw tu pawl, nunnak a tawi zia fiangten a ruattu pawl an si.

Fimnak ih ralkhat ih a um mi cu atnak ti a si. Mi aa, mi hmukhmak, na uar lo zet mi pa, zohṭhim tlak lo zet na ti mi pa ih nun zoh hnik aw. Ziangvek nunnak a si. A tlangpi thu ih mi aa, mifim lo kan ti mi cu thu cuca ih ruat thei lo, mumal lemlo pawl kha kan ti. Minung hrekkhat cu milai kan nun hi a tawituk, sankhat kan nun ah nun nuam thei tawk in tiin kan ruh le rangih tlin tawk ten nun nuam kan cen. Nunnak a tawi zia ruat phah in kan nunnak lam kan hruai. Cutiih nunnak lam kan hruai kha kanmah bulpak hrangah ṭhathnemnak a suahpi lem lo. Kan tik cu caan pawl ṭhansonak hrangah hmang lo in zianghman lo mi thil ah a cem ter. Cuhleiah kiangkap le innsungsang hrangah thil ṭha lo, lungawi lonak, buainak tete a suahpi fawn.

Saam ca ngantu in, “Nunnak a tawi zia hi in zirh awla mifim ah kan cang ding” a ti.

Duhdawtmi rual le pawl nunnak hi a tawi, khawi mi lamzin kan hril ding. Kan theih man hlanah kum kum 30, 40, 50, 60 kan kim ding. Mi ih mifim tiih an ti mi cu si ding a ol lo men ding nan si lo bik in na innsungsang, na rual le pawl, kiang le kap pawl ih zohṭhim mi si ding cu duh a um. Kan ti thei tawkin kan leitlun, khua le ram, innsungsang hrangah a ṭha mi thil tuah zuam uhsi. Man a nei mi tuahṭuannak in man a nei mi minung in si ter.

Nunnak A Tawi Zia

Na ruahnak