NY Times ih Cartoon, ziangtin na ruat?

Home » Thlirnak » NY Times ih Cartoon, ziangtin na ruat?

By vcth on February 8, 2016.

ny times cartoon

New York Times ih cartoon suaitu Mr. Heng in tulai Kawlram ramkhel um daan zuk a suai mi cu mi tampi mit a lak zet. “Pi Suu Kyi cu ralkap pawl in a dunglam in duh tawk in an khal tiin a suai.”

Ziangkhal va sisehla Kawlram ramkhel thu ah tulai fang ih hmanmi 2008 constitution in ralkap hi thu neihnak tampi cu a pek cia. Constitution an thleng theih hlan sung cu ralkap cu hmun thupi ah an tel ringring ko ding.

A pahnihnak ah Pi Suu Kyi in cozah thlengawk caan (transition period) hi thupi in a ruat. Thleng aw ta phot sehla a tangmi thil, rem tulmi cu neta ah nuam teten kan rem vivo ding ti deuh in a feh a bang. Khoh tukin a feh pang le 1990 lai vek a cang thei runagah kap hnih hrang a tha bikmi zin zawh in a feh tiin ruat sak thei a si.

A pathumnak ah Kawlram ah ralkap hi tam le mal cu an thupi ringring ko ding. Zalennak kan ngah thok ihsin tuni tiang ramsung ral a um ringring. A thok ahcun ramsung ral hi ramkhel thu ruangah a si deuh nan neta lam in cu ramkhel thu lawng siloin miphun thu, pursum thu pawl ruangah tla a si. Hriamhrei kai pawlkom an um sung cu ramsung ral cang thei dinhmun a si ringring ruangah ralkap hi a si ding hnakin thupi in an um theinak a si.

Tulai thu vakvai a um ve mi pakhat cu Pi Suu Kyi president cang thei dingin a dawn khamtu 59f rem dingin thu ah ralkap in an dilmi NLD in a lungkim ahcun 59f rem ding ti vek thu a um. Ralkap in ramthen hrekkhat le ramkulh hrekkhat ah Chief Minister pawl an dil ti a si. Cui an dilmi NLD in a pek ahcun 59f rem ding thu ah ziang thu buai hman a um lo ding ti a si. NLD in Pi Suu Kyi president caan theinak le ralkap ih dilmi ape-azu an tuah a si ahcun hi cartoon hi a dik zet ding. Asinan hi thu cu thu vakvai, mi ih titi men mi a si ruangah a dik tiih ruat thei cu a silo.

Na ruahnak