Pa Pakhat ih Thlacam: Salai Ram Ling Hmung

Home » Cahram » Pa Pakhat ih Thlacam: Salai Ram Ling Hmung

By vcth on December 16, 2014.

Salai Ram Ling Hmung le a fapa

Vancung ih a um ka Pathian, pa pakhat dinhmun in thlacamnak nei ka duh. “Ka fapa hi a derthawmnak thei aw dingin thazang rak pek hram aw. Ṭihphannak a ton caan khalah pahsuak theinak thazang, ralṭhatnak rak pek hram aw. Mah le mah khaisang aw loin, tangdornak thawn nehnak a la thei tu fapa pakhat si ter hram aw.”

Aw!!!! Ka Bawipa le Ka Pathian rauhnak lawng, thutak le fungfe ih ṭuannak a tel lo mi sinak in rak luat ter hram aw. Nangmah a lo thei ih a nunnak in a lo ṭihzah theinak dingah lam hruai hram aw.

Bawipa Pathian ka fapa kha a ol mi, a hahdam mi nunnak lamzinah hruai loin harsatnak a phunphun le cui harsatnak pawl a pahtlang theitu a si theinak dingah rak bawm hram aw. Thlipi lakih a ding ngam tu, mi vansia, vanduai pawl a zangfah theitu si dingin rak zirh hram aw.

Aw!!!! Bawipa, Ka fapa hi thinlung a thiang mi, ruahnak ṭha, ruahnak sang a nei tu si ding in lamzin hmuh hram aw. Mi pawl kha Bawi upa ti ih a upat hlan-ah amah le mah upat aw thaimtu rak si ter hram. A laim zo mi thuhla pawl a ruat man hlanah a ra lia ding mi a tikcucaan pawl hrang tim a tuah theitu si dingin lam hruai hram aw.

Cuhleiah ka lo dil bet duh, Bawipa, ka fapa cu mi tluangtlam pakhat si ter hram aw. Midepde, mibum hmang siloin, thudik sim ngamtu, thudik ṭanpitu le a dikmi fimnak, thuruahnak a neitu si dingin lam hruai hram aw.

Cuhnu-ah kei a pa a si mi, na salpa nun man ka nei tiah dim ten ka saal ngam ding.

Hminsin: Hih ‘Pa pakhat ih thlacam aw‘ , Gen Douglas ih Prayer from Dad hi 2005 October 24 ah Salai Ram Ling Hmung in ramdang ih um a fapa, B.A (Thang) Salai, a kuat mi cate a si.

Lettu: Francis Cung Bik

Ronmi: Gen. Douglus Mac Arthur, Reader Digest, A Soldider’s Prayer for his Son, August, 1965

Na ruahnak

One Response to Pa Pakhat ih Thlacam: Salai Ram Ling Hmung

  1. linlin   November 13, 2009 at 4:03 am

    Salai Ram Ling Hmung nih a fapa hrang a kuat mi ca te a si ko nan a siar tu kan hrang ah tla tha zang tha in pek ngai a si. Kan nu leh pa ih tla in cam sak nak cu fa leh kan hrang ah ziang tik hman ah a lak a si dah lo.