Parmawi

Home » Cahram » Parmawi

By vcth on June 26, 2010.

Francis Cung Bik

Zarhpi zing tinten biakinn sangkaa ri in rose parmawi te ka ṭang ah in ton sak ringring. Hihi thil mawi le ṭha asinan pangpar duh zettu ka si lem lo ih ziang ciamco in ka ruat lo.

Zingkhat cu khawm ṭheh, biakinn in ka suak. Nauhak pakhat ka hnenah a ra tlan. “Sayapa, Sayapa na ṭang ih rose pangpar hi na hei maw?” tiah in sut. Ziangruangah in sut ti cu ka thei lo nan ziang a duhsan ti cu ka thei. Cun a ṭong a peh, “na hlon men ding sile hlon men ai in zangfah ten in ṭhen thei pei maw” tiah in sut.

Parmawi

Kei tla in ka rose par te cu ka pek. Kum 10 kim lo nauhak pa in ziangruangah hi pangpar te a duh ti thei ka duh ih ziangruangah in dil ti ka sut. Nauhak pa te cu “ka pi laksawng pek ding ah” tiin in sawn. “Ka nu le ka pa kan dung kum ah an ṭhen aw. Ka nu hnen ah ka um nan pasal thar a nei ih na pa hnenah um aw in ti. Ka pa hnenah thla 1 hman ka um hlan ah ka pa in ka pi hnen ah in kuat lala. Ka pi cu ka parah a ṭha tuk lawm mam. In duhdawt, in zangfah, ka ei le in ding tla in timtuah sak ringring. Ka par ih a ṭha zettu ka pi laksawng pek ka duh, zianghman pek ding ka nei lo ruangah na papar te ka lo dilnak a si” tin in sim fiang.

Nauhak pa a ṭong ṭhehin cu ziang ṭong ding tla ka thei lo. Ka mitthli a hal, ka hmulsia a tho. “Ka fa ka papar te cu pakhat lawng a si, na pi hrangah a mal tu. Biakinn sungah lut aw la pulpit hmai ih pangpar tom kha na pi hrangah lak aw, biakinn cu zarhpi ni tinten tlawmngainak thawn a hlu tu an um ringring ko,” tiah ka sim.

Nauhak pa te cu lungawi zet in “mangbangza ni…. Pangpar parkhat ka dil ih pangpar tompi ka ngah” tin au phah in biakinn sungah lungawi zetin a lut.

The Flower by Pastor John R. Ramsey

Na ruahnak