PATHIAN Hnen Ih Cakuat

Home » Cahram » PATHIAN Hnen Ih Cakuat

By vcth on August 3, 2010.

B.A (Thang), Salai

Tlang parah innhnen nei lo in an inn pakhat te lawng a um. An innsang hi lo thlo ih pum cawm awk mi an si.

Tukum an lo thlairawl thu pawl rawl ei phah in an rel rero. Cutiih an rel rero lai fangah- ruahpi a sur. Ruahpi a tak nasa. Ruah fang tla a por nasa. An nun sungah hi tluk rauh fang por le ruah tak an hmu dah lo. Ruah sur daan a roh tuk ih an thinphang thlang.

An pa bik cu thaizing lo a feh tikah, an cing mi thlairawl hmuahhmuah a siat ṭheh. Zianghman lak ding um nawn lo. Inn ah a tlung ih a nupi le a fa le pawl thawn thu an rel. An zaten an beidong thleh. “Siat cu a siat zo ko. Sinan, kan beidong tuk lo pei. Rawl ei lo ih thi mi timi an um dah hrih lo pi” tin innsang pa pi in tha a pek.

Pathian Hnen Cakuat

Cumi hnu ah amah ten thu a ruat.
Ziangtin ka tuah le a tha pei????
Cutin a ruat rero ih “hmmm, kan hrangah rinsan ding le, ruahsan ding cu Pathian lawng a um thlang ko ee” tin a ruat. “Haa, a si. Pathian timi cu mi hmuahhmuah ih thinlung thei tu a si. Mi hmuahhmuah run tu a si. Ka ton mi buainak, beidongnak pawl hi Pathian hnen ka sim ding. Ca ka kuat ding” tin thu a ṭhencet.

Thaizing khua a vang veten, Pathian hnen kuat ding ca a ngan. Pathian in a bawm ding khal a zum nasa. A ngan mi ca cu hitin a si.

“……….Rin san mi Pathian, tihni zaanlam ah nasa zet ih a sur mi ruahpi ruangah kan cing mi thlairawl pawl cu a siat ṭheh zo. Na fa le pawl ei ding kan nei nawn lo. Lo a thar ih thlo thei salnak ding le Ei le in hrangah tangka 100 in rak kuat aw……………….”
Cakuat te keng in khuasung ummi Carek zung (Post Office) ah a ra. Stamp a lei ih ca cu a thlak. To….. timi ah “Pathian hnen Cakuat” tin a ngan. Cazi pa cu cumi cakuat a hmu tikah a hnihsuak tuk. Voikhat hman cuvek cakuat a hmu dah lo. Cumi cakuat te a keng, hni phah in an hotu hnen ah a va feh. Thinlung ṭha a nei mi an hotu pa tla cakuat a zoh ih a hni nasa. Hotu pa in “Pathian parah rinsannak a nei nasa ual. Amah vek zumtu si thei sehla ziangtluk a ṭha pei. Amah vek zumtu si ka duh. Amah vek ruahsannak nei ka duh. Pathian hnen rori hman ca a kuat” tin a ti.

Khawitawk kuat ding thei lo mi ca-ik a siih an rak ong ih an siar. An siar tikah… Pathian parah a zum daan an hmu tikah a beidong lo ding in pakhat khat kan bawm le a ṭha ding tin an hotu pa in a ruat. Hotupa, amah rori tla peisa a thawh, thehle a hnaṭuan pi pawl hnen ihsin tla peisa pawl an khong ciam co. Asinan, Lothlo pa dil mi 100 cu a kim thei lo. An khong thei zet paisa kha ca-ik sungah lothlo pa hmin in an ret.

Thaizing zung ong veten, lothlo pa cu Post Office ah a ra ih a hrangah cakuat a thleng maw? Thleng lo? thu a sut. Cazi pa te in, mizaan peisa an thawh mi ca-ik te kha lothlo pa hnen ah a pek. An hotu pa le an zaten mi pakhat an bawm ngah mi parah lungawi zet in an zoh rero.
Lothlo pa cu ca-ik kha a ong ih peisa pawl a hmu tikah ziang hman mangbang lo in a um. Ziangah tile ngah ding a zum cia mi a si ruangah….. Asinan, peisa pawl a siar tikah cun…. a thinheng nasa…. Pathian cu peisa siar a sual lo ding… A dil mi peisa tla el lo ten i pek ko ding….

Thinheng zet in..cazi pa hnen a va feh ih– cahnah pakhat le cafung a dil.
Cumi hnu ah himi ca te a ngan…

“ ka lo dil mi peisa lak ihsin 70 cu ka rak ngah zo. A tang lai mi peisa 30 tla in rak kuat bet aw…. Ka ṭul ngaingai mi a si. Asinan, tuiṭum na kuat ding sile Post Office ihsin in kuat hlah aw. Post Office ih hnaṭuan pawl hi mi ṭha lo, fifir pawl an si..
Ka lungawi…
Lothlopa”

(Gregoria Lopez: A letter to God)

Na ruahnak