Leitlun ralpi voi hnihnak ruangah Europe zaten hnawmtpen vekin a siat ṭheh. Thianfaisaalnak le tundinsaalnak pawl an thok rero. An khawpi, inn le lo, sumhnam, cetzung le pardum pawl hmuh cu camsiat tuarmi bangin an cemral thluh. Riahsiatza a si betmi cu thil le ri lawng si lo in nu le pa ih thihsanmi ngahṭah nauhak ziangmaw zat cu ei ding nei lo le umnak nei lo in an vaivuan.
Zing khat cu a siatbalmi London khawpi ah American ralkap pakhat cu jeep te thawn khaw haal phahin a vak. Hmuk rawhnak dawr ih hmuk rim thawn zet cu a vun hip ngah tikah zianghman a ei hrih lo cu mang in cui dawr kiangah a mawṭaw cu a va cawl. Hmuk dawr cu thlalang ih kulhmi a si ih a sungih an zuarmi pawl cu a lengin a lang ṭheh.
A rilrawng zetmi nauhak pakhat cu cui dawr lengin dawr sung cu a zoh, a khadi a for, a cil a dolh rero. Naan a ei duh zetmi hmuk pawl lakin pakhat te hi ei ngah sehla ti hman a ruat ngam lo. Ziangah tile paisa pia khat te hman a nei lo ti a thei aw fiang tuk, va ngen ding nu le pa le a nei nawn fawn lo.
Ralkap pa cu dawr sung a lut zik ah cui dawr le dawr leng in a bih rero tu ngakṭah nauhak pa te cu a vun hmu. A thin nuam lo ngaingai ih nauhak pa hnen va feh in, “ Ka fa, na ei duh hngai maw” tiah a sut. Nauhak pa cu a lu a sut.
Dawr sungah a lut ih plastic tumpi khatin hmuk pawl cu a lei ih a lengih nauhak pa cu a ra pek. Cun a feh saal. Dunglam ihsin a angki coat dir vekin a ruat ih dung a hoi saal. Nauhak pa te cun, “Sayapa, Pathian na si maw?”
Johnlsl
Source: : Charles Swindoll ih Are You God?
