Pathian Nan Zuar Maw?

Home » Cahram » Pathian Nan Zuar Maw?

By vcth on December 14, 2015.

Pu tu
B.A (Thang), Salai

Nauhak pate pakhat dollor fangkhat kai in dawr khat hnu dawr khat lut suak in a lei duh mi a sut rero. “Himi dawr ah Pathian nan zuar maw?” Cutin a sut veten, dawr neitu pawl cu… an thinheng ih mi-aa tin an dawi. Khua a thim zik thlang, dawr 29 kimnak dawr ih a neitu lawng in a rak dawi lo.

Dawr neitu pa cu a sam a raang ṭheh zo mi kum 60 luan putar pakhat a si. Nauhak pa ih thusut mi a thei tikah, Putar pa cun hni phah in a sut sal. “ Naute, Pathian cu ziang hrangah na lei tum? In sim thei pei maw?”

Nauhak pate cun a mitthli thawn a hmin John a si thu, a nauhak lai ihsin a nu le pa an thi ih, a pu thawn an um tlang thu, a Pu cu Lo hnaṭuan mi pakhat a siih a luan cia mi ni 2 hrawngah accident a cang ih a tu cu sizung ah “comma” a si rero thu, Sibawipa in “Pathian” lawng in na pu kha a run thei ding tin a ti thu a sim.

John in, “Pathian timi hi mangbangza pakhat a si ding. Curuangah ka pu nunnak hrangah Pathian ka lei tumnak si,” ti a sim.

Putar pa in duhdawtnak mithmai thawn a zoh ih “ka fa, paisa ziang zet na nei?” tin a sut. “Dollor fangkhat ka nei” tiah a ti. “Ka fa, Pathian ih man tla 1 USD a si ve ko” tin a tiih, “Kiss of God” timi a-ee-palang (soft drink) pakhat kha a lak ih John kha a pek.

“Himi palang hi keng awla, na pu kha in ter awla, a dam ding” a ti. John cu lungawi ten palang kha a keng ih Sizung ah rang zetin a thlung. Nan, a pu cu a ṭhang hrih lo tikah a in thei hrih cuang lo. Thaizingah special doctors group pakhat an rak ra ih, John ih pu cu ṭhaten an rak zoh sak. A thabik mi cet le sii pawl hmang in, ṭhaten an zoh khen. Cutin thla khat hrawng a rei tikah ……..John ih pu cu a rak dam sal.

Sii man hrang an cem mi paisa cazin a zoh ih, John’h pu cu a lau tuk. Asinan, sibawi pa in a cem mi hmuahhmuah kha Putar pa pakhat in a pek zo. Cumi putar pa cu milian zet asiih, ramdang ih company pakhat ah hotu ṭuanvo ihsin pin-sin lak mi a siih, tu cu um har phen ah mini market te a tuah phah, Special Doctor group tla amah in a hlang sak mi asi ti pawl a rak sim.

John te puvah hnih cu Putar pa parah an lungawi tuk ih, an va hawl. Nan, putar pa cu a dawr kha a zuar ih, khual a tlawng zo.

Ni rei lo ah, putar pa hneh ihsin cakuat an ngah. Cumi ca sungah…. “….. John vek tuupa na nei cu mi vanṭha na si. Na nunnak run ding ah 1USD te thawn, hmun tin kim ah Pathian a va hawl ih a lei tum. Pathian parah lungawi aw. Na nunnak cu Pathian in a lo run ko. Nan, pakhat ṭhaten na hminsin ding mi cu.. PATHIAN ngaingai kan hmu theinak cu Minung pawl ih Duhdawtnak, Lainatnak thinlung ah a si” tin a rak ngan.

Hminsin: Rak siar dah mi ca a rem cang dan ih ngan mi a si.

Na ruahnak