Professor William Osler ih Casiar Daan

Home » Cahram » Professor William Osler ih Casiar Daan

By vcth on November 16, 2013.

Professor William Osler

B.A (Thang), Salai

“Zokhal, Zaan it zik caan ah- Zing kan tho caan hnakin malte tal- Kan fim hlei a ṭul. Cutin asilo ahcun minung pakhat dinhmun in a sualbik mi thil kan tuah ngah vek asi” Professor William Osler tin a rak ti.

A dik, Minung cu zing hnakin zaan ah kan fim ṭul. Mizaan hnakin Tuni kan fim sawn ṭul. Kan kum upa vivo vekin kan thluak tla a rit ṭul.

Cumi hrangah ziang kan tuah ding.

Pakhat lawng a um.

“Ca siar” Cuvial……

Nitin casiar uh. Ca ṭhaṭha pawl hril in siar uh. Kan hnaṭuan hrang le kan nunnak hrang ah in bawm thei mi ca pawl kha hril in siar uh. Zaan it zik tinte tuni ziang mi fimnak ka ngah timi mah leh mah sut aw uh.

Mi hretkhat in an ti. Ka hnaṭuan a tamtuk ih cabu timi ṭhaten ka kai thei lo. Ngaingai maw? Cu lawmlam maw kan hnaṭuan tam? Professor William Osler tluk cu zohman kan buai lo ding tin ka zum.

Professor Sir William Osler (1849-1919) timi cu leitlun Sii lam thawn pehpar aw in a hminthang zetmi Canadian Sibawi pi asi. Professor pi pakhat asi vekin sibawi tampi tla amah rori in a sawm dawl a tung ding mi an tam zet. Amah a rak ngan mi Cabu pawl siar in sibawi rak cangtu pawl cu siar cawk lo an si ti si.

A thuanthu pawl kha mi tampi in an rak ngan. Asinan cumi pawl in amah kha Sibawi pakhat asi mi hrang lawng an rak ngan lo.

A mah hi Sii thuhla lam lawng siloin, Fimnak a zate a thei duh mi pakhat asi. Leilungpi ih minung pawl kan ṭong, ruat, tuah mi pawl kha a thei duh. Minung thuanthu ih man nei zet mi experience pawl kha a thei duh.

Cumi hrangah a ṭhabik mi lamzin cu Casiar asi ti a thei fiang.

Asinan, cumi hrangah a poi mi pakhat a um. Cucu tulai saan ah casiar duh nan, siar caan nei lo tin sim rero vekin a man lo thei nasa. Mina pawl a zoh ṭul lai. University ah ca zirh ṭul lai. Si lam research pawl tla a tuah ṭul lai. Nikhat nazi (24) timi hi a hrangah a mal zet. Casiar caan ngah ding hrangah a it caan ihsin lak lo cun a dang um nawn lo.

Cutin a it zik te ah (15) minutes casiar mi daan te a rak thok. Zaan (11) ah a it ding sile (15)minutes a lak bet ih 11.15pm ah a it. Hnaṭuan a tam ih Zaan (12) a kim sile (15) minutes a lak bet ih 12.15 am ah a it.

It zikte (15) minutes a fir ṭheu mi daan kha kum 35 hrawng ihsin a rak thok tikah nitin a rak tuah/hmang tikah.. kum 70 sung a rak nung mi ah cabu tampi a rak siar suak.

Casiar sawhsawh siloin ṭhaten a siar ih midang pawl hrangah tla ronmi a tuah sak. Cabu (7,787) cabu kha a tuah mi thesis pawl ah reference a tuah.

Cumicu Professor Osler ih casiar daan asi. Nangteh nikhat ah (15) minutes hrawng caan na pek thei lo ding maw? It zikte or Tho pek or Thaihtawh ei zik or Ei ṭheh or Suncaw or zanriah.

Kan siar ding mi cabu pawl kha ṭhaten hril in kan mah thawn kan fehnak tinte a um thei ringring ṭul ding. Nikhat ah (15) minutes siar thei hmanah nitin na tuah ringring sile na hrangah ṭhathnemnak tampi a um. Research tuahtu pawl in an sim daan ah nikhat ah (15) minutes ca kan siar sile thlakhat ah cabu tum zet pa 2 kan ṭheh thei. Kum khat ah 20-25 kan ṭheh ding ih kan nun sungah 1,000 cu kan ṭheh ding.

Cabu (1,000) timi cu a mal maw?

Pakhat na ral ring ding mi cu cabu ṭhaṭha pawl rak hril in siar ngah ding mi siko.

Na ruahnak