Pu Henry Van Thio parih Chin singer hrekkhat ih ann ka

Home » Thlirnak » Pu Henry Van Thio parih Chin singer hrekkhat ih ann ka

By vcth on March 13, 2016.

Chin Singers

Kawlram santhuanthu le Chinmi pawl ih santhuanthu ih a hmaisabik a simi presidentail nominee ah hmin cu NLD Amyotha Hluttaw palai pawl in hminthun a siih March 11 ah nem hnget a si. Hi thu thawn pehpar aw in Chin hlasak thiam hminthang hrekkhat ih ann ka kan zoh hnik pei:

Sung Tin Par: Kan peng le kan miphun sungin hi vek dinhmun tiang a thleng thei cu kan lungawipi tuk. Mai peng hrang lawng siloin rampi hrangih a thahnem mi hnatuan theitu a si ding tiah ka zum. Cozah hna a tuan lai ah tla mitha le mi tluangtlam zet a si. Rampi ziangtin a hruai ding ti cu tuhnu kum 5 ah kan hmu vivo ding.

Chin ramkulh cu Kawlram lakih a farah bik ti a sinan, Kawlram pi a zaten thansonak kan ttul zet. Kan ram a thangso ah cu Chin ramkulh tla a tel cih ko ding. Chin ramkulh hrang lawng ih hnatuan a ding tiin ruahnak nei ding a si lo. Vice President ti cu ramkulh pakhat hrang lawngah a si lo.

Chin ramkulh ih kan ttulbik mi pawl cu pehtlaihnak lamzin, pawl an si. Leilam zin lawng a um ruangah ei le in thiar daan a har, a hleice in fur ah. Tu hnakih tha sinsin kan tul. Cun Chin ramkulh cu khu kham a tam ih lo tuahnak a tha tuk lo. Ziangtin pumcawm aw nak a dang ka tuah thei ding ti ruat a tul. Harhdamnak lam ah tla tu hnak ih tha sin in tuah a tul.

Chaw Suh Khin: Hlanlai ah Chinmi sungah raldo thiam, mi raltha, mi hminthang an suak. Tu ah vice President tiang an suak. Lungawi um zet. Bulpak thu in U Henry Van Thio hi ka thei mi tla cu a si lo, Sung Tin Par tei’ sungkhat a si ti lawng ka thei. Pu Van Thio vice President ih hrilnak thawng in Chin ramkulh tla hlanlai vekin tansan mi ramkulh cu a si nawn lo ding. Kei hi Chin ramkulh ih suak mi cu ka si lo. A um tla ka um dah lo, nan ka tlawng dah ruangah thu hla mallai ka thei, ka hmu. Chin ramkulh ah a hleice in lamzin tha a tul. Tlang a tam ruangah lamzin pawl hnget khoh zet a tul. Cun pehzomnak le Harhdamnak lam tla an mamawh zet.

Van Dawt Chin: Vice President siseh, President siseh hi vek dinhmun thleng thei ding in sinak, thiamnak tampi a tul. Chinmi lakah hi vek an um dah lo. Tu hi a voikhatnak a si. Ka lungawi zet. Hlanlai ah cu Chinmi an si ahcun cozah hna ah siseh, ralkap ah siseh rank sang an ngah dah lo. Tucu vice President tiang hril a siih ka lungawi tuk. San a linglet thlang. Chin ramkulh hrang tla tampi a tuan ding ka zum. Chin ramkulh ih kan tul bik mi cu pehtlaihnak lamzin pawl a si.

Na ruahnak