Pu No Than Kap ih CNF Statement Thuletnak

Home » Thlirnak » Pu No Than Kap ih CNF Statement Thuletnak

By vcth on September 11, 2014.

CNF cun an president hlun Pu No Than Kap thu thawn pehpar aw in Niovember 28, 2007 ah statement an rak suah. Cui an statement suahmi cu mipi in thei tuk tla a rak silem lo. 2014 May hrawng in CNF statement suahmi cu online group mail pawl ah tharthawh sal ciamco a si ih mipi kaa ah titi a leng. Curuangah Pu No Than Kap khal in hi an thusuahmi thuletnak tuah ding in mipi hnen ah a rak than.

# 1992 December 9 ah Pu No Than Kap cu Chin National Front ih sungtel sinak, Chin National Front (CNF) President le Chin National Army (CNA) Commander in Chief (C-n-C) sinak in siseh, National Security Emergency Committee (NSEC) in a dawisuak a si… tiin November 28, 2007 ah an ngan.

Simfiangnak:

Hmaisabikah, Pu NTK dawisuaktu an timi NSEC hi CNF Central Committee in siseh, Central executive Committee (CEC or Politburo) in siseh a din mi a si lo, Pu Roger le Pu Zing Cung ih ho in CNF dan lo vekin an din mi a si ruangah, CNF ih President tuan rero lai le ralkap hotu bik C-n-C tuan lai (zo an si khalle) NSEC in dawisuah theinak power le right a nei lo.

NSEC din thokdan:

(1) November 11, 1992 cabinet meeting ah President Pu NTK remtinak in sual an puh mi zoh fiahtu dingah Sub-committee (Inquiry Commission) din ding in relcat a si.

(2) Pu NTK cu CNF president ding lai le CNA lu bik tuan rero lai a si ruangah, sual an puh mi thu Inquiry Commission in a hmuhsuah mi cu Central Committee (CC) hnenah a thlen hnuah, CC in thuneihnak sang bik neitu Central Executive Committee (CEC or Politburo) hnenah thlen ding a si. Cui hnu lawngah Pu NTK cu President sinak in banter tlak a si, ti a si le CC le CEC in banternak ca an suah thei. Asinan November 11 ihsin thla khat sung Inquiry Commission in Pu NTK sualnak an hawl nan an hmu lo. An hmuh lo thu cu CC le CEC hnenah report an pe cuang lo.

(3) Report an pek lo hleiah December 9, 1992 ah NSEC timi cu a thupten Roger hoin an din ih cumi cun Pu NTK kan dawi.. an ti rero mi a si. CC si lo, CEC khal si lo, CC theihpinak khal um loin CNF dan lo vekin din men mi NSEC hrimhrim hin CNF President ding lai cu Pu NTK si lo midang an si khalle dawisuah theinak power le right a nei lo.

Pu NTK in CNF a cawlhsan dan cu a hnuailam vekin a si sawn:

– December 10, 1992 ah CNA umnak Champhai Camp hotu Pu Thawm Mang cu Maj. Zing Cung hoin thahrum suah in an hung siim ih Pu Thawm Mang cu a hman lai pistol laksak in a cal ah an tin ih an kaih. Cutin Pu Thawm Mang an kaih (kidnap) hnuah Pu NTK hnenah na tupa Thawm Mang thih ter na duh lo a sile meithal in pe thluh aw tiin Zing Cung in Aizawl ih um Pu NTK hnenah ca a kuat. Pu NTK cu CNA hotu Col. Tlung Lwe le Lt. Col Hrang Vung le ralkap pawl thawn Champhai ah an so ih Pu Sangchia inn ah an riak. Lt.Col Hrang Vung, Ngun Uk Lian tipawl CNA pawlin “mai president sual puh men lawng si loin thahrum suah in hlon tumtu cu party dan vekin kan kaih ih an thu kan rel tengteng a tul,” tiin meithal zun 20 lai thawn Champhai camp ih Zing Cung ho mi pathum (Sui Khar, Benjamin le Zing Cung) cu zingpit ah vung siim ih kaih an tum. An feh hlante ah Pu NTK cu a ihnak in a tho ih, naulepawl, hnamdang ral hman do taktak hlanah mah le mah meithal thawn do-awk a tha lo tiin Lt.Col Hrang Vung ho cu a kham. December 12 zinglam ah Champhai camp ah Pu NTK cu a feh. Buainak tuahtu Maj. Zing Cung te pathum cu camp ah um nawn loin hramlak ah an rak relh zo.

Cule Champhai camp ih CNA zate hnenah Pu NTK cun, “Tutiang kan ram in zalennak ngah thei dingih tuan tlang dingin ka thei tawkin ka lo kaihhruai hai. CNF timi innpi cu umnak tlak si dingah kum 4 sung (October 1, 1988 – December 12, 1992) ka sak thluh zo. Chin ralkap CNA timi khal ka din ih thla neiih zuang thei dingin ka tuah zo. Asinan sinak atcilh pawlin ka kaihhruainak duh loin buainak an tuah. Sual in puh hrim ih in puh mi dik le dik lo thei fiang dingin Inquiry Commission tiang ka dinter. Asinan cui Inquiry commission thusuak daiten kan hngak rero lai ah thahrum suahin tuvekin buainak siava bik an tuah lala. Chin lala hmanah party pakhat sungih um, pakhat le pakhat le ram hrangah rinum dingih thisen rori in ih thukamnak tuah thluh kan si ruangah kan karlak ah hmuhsualawknak a um hmanah a nem zawng (non-violence) in cabuai parah thu rel fel ding kan si. Asinan tu cu keimah lawng si loin kan hotu dang tiang hlon ih thah (coup) tuah tumnak a um ruangah a poi tuk. Kawlram ah ralkap in uknak a lak (anating, coup) mi duh loin dothlengnak kan tuah tiin a au rerotu Pu Zing Cung pawl cun, kan do an timi Kawl ralkap vekin anating an tum. Asinan, tu ah keimah dotupawl cu meithal thawn kan hawlih kan kapawk a si le, kan lakah thisen a luang tengteng ding. Ral hman kan do taktak hlanah kanmah le kanmah kan kapawk a si le, peng khat le peng khat hnam khat le hnam khat huatawknak a pung sinsin dingih thuanthu ah kan mualpho ding. Curuangah ka sak cia mi CNF innpi le ka din cia mi CNA ah tui buainak tuahtu pawlin an duh tawkin lengin run tuan ko hai seh. Rampi le leitlun theih ding tlak in Chin timi le CNF cu ka tuah zo. Kei cu tui ni ihsin ka cawl hrih ding. Ka hnuih run tuantupawl hrangah ziang hman thil harsa a um nawn lo. Asinan ka bang lanta lo khal a si thei. Nan zaten ka cawlh hnu khalah ram hrangah run ṭuan vivo uh,” tiin a sim.

Champhai camp ih Chin mino ralkap zaten riahsia in an mitthli a tla. Cutin Cabinet Vuanci Col. Tlung Lwe, Finance Secretary Thawm Mang, Pub&Information Secretary Nililian le Lt. Col Hrang Vung le Falam mino CNA zaten, hivek mah le mah lakih buai kan paih lo kan cawl ve ding an tiih CNF cu an suah san thluh. Bangladesh ramri ih CNA hmunpi ih um Falam mino CNA pawl khal, Pu NTK le Falam hotu lam an cawl thluh ti an theih veten, an cawl thluh ve. Hitin thin na zetin mitthli thawn thenawk a si ruangah tui ni tiangin Falam mino tampi an thin a dam thei nawn lo.

A tawinak in, December 12 ah amai thuten Pu NTK a cawl. Cumi hlan December 9 ah Pu NTK cu party ihsin kan suah tiih ngan mi cu, amahte cawl a si lo, dawisuah mi a si tiin thangsiat duhnak menih ngan hrim mi “thu dik lo” a si.

# Pu NTK cu CNF ihsin an suah hnuah India Politics ah a hnamhnawih ringring ruangah India Security pawlin an kai ih SLORC kut sungah an hlan.

Simfiangnak:

Pu NTK cu Kawlram ihsin U Newin in a rak dawi mi Kalapawl lakih tel ve India ralbawi Lt. Col. Grewal (Kawl tong Kawl vekih thiam) in thlem bum in a kaih mi a si. Hi Kala ralbawi in Pu NTK vek tho tho in Zakhaing ralkap (ALP) le Karen (KNU) ralkap pawl cu, India cozah in Koko tikulh ah umnak kan lo pe ding tin thlem bumin a kai ve ih, an hotu Khaing Raja cu a kap that hnuah, midang cu Calcutta ah kum tampi an thu relsak loin thawng ah a thlak. Zakhaing ralkap paisa $50,000 leng lo khal a laksak bet. Kum reipi hnu tunai ah an thu relsak a siih an thu buaipitu Sihni Kala nunau cu a umnak inn ah nam thawn a hngawng zai that a si (a zai thattu hi Kala ralbawi pa thotho zum a si). Tu ahcun Kala pai kaih mi Zakhaingpawl cu Netherland ramah refugee in an um ih hi thu hi sut fiang theih ringring an si. India Central theihpinak tel loin, Pu NTK le Zakhaing le Karen pawl bum in a kaih ih thah mi tla a neih ruangah Kala ralbawi pa hi kaih dingin hawl a siih India ah a um nawn lo.

Curuangah, “Pu NTK cu India Politics ih a hnamhnawih ruangah India cozah fialnak in kaih mi a si” ti cu thuphan a si. Ziangahtile, Arakan (ALP) le Karen (KNU) ralkap khal India politics ah hnamhnawihnak um lo le India hman an thlen hlan Koko tikulh ah Kala ralbawi in a bumih a kai thotho. Himi Kala ralbawi le Kawl ralkap pehtlaihnak hi theih ban a si lo.

# Rev. Dr Val Thang thawn Pu NTK in 2006 laiih thusuah (statement) an tuah ih CNF thu a dik lo mi a ngan.

Simfiangnak:

2006 laiah Pu NTK in Pu Val Thang thawn Statement an tuah mi thu cu, 1989 laiih Mizoram mi ZORO/ZRV hotu Lalsanga le Roenga thih thuah, Pu NTK le Pu Val Thang ih thahnak order suah vekin thuthang a um ringring ruangah annih pahnih thahnak order suahtu hi Pu NTK a si lo, Pu Val Thang (khalai ih CNF General Secretary) khal a si lo, timi thu umdan diktak ngan suah mi statement a si. Pu Val Thang cu culaiah Sekenah timi Bangladesh ramri CNF hmunpi ih a um lai (Pu NTK cu ramdang ih a um lai) a si ruangah, Pu Lalsanga le Pu Roenga thih dan fiangten theitu a si. Curuangah Pu Val Thang thawn suah mi Statement cu CNF thu a dik lo mi ngannak a si lo.

# Pu NTK cu Malaysia a feh laiah CNF le CNA thawn pehpar aw in a dik lo mi thuhla a sim lala ruangah miphun lungrualnak kha a siat suah thei ding ruahnak a um.

Simfiangnak:

2006 ih Malaysia a feh laiah Falam mino pawlih dilnak vekin CNF President a sinak dinhmun in CNF thuanthu a theih dan a sim. A dik lo mi simmi a um lo. Lungrualnak siat seh tinak khal a um lo. November 14, 1988 ah CNA a din thu le KIA ramih ral thiamnak zir dingin Mizoram ihsin ralkap ih lut hmaisa bik Pu Hrang Vung le mi 9 an si thu le Pu Zing Cung ih ho 7 cu leh hnu deuh ah “the fittest seven” timi ca thawn Champhai in Aizawl ah an ra ih CNA ah an lut ve ti thu a sim. December, 1992 ih thenawknak thu a ngan fawn. Hi thupawl Pu NTK in a sim ruangah miphun lungrualnak a siatsuah theinak ding san a um lo, a liamcia mi thuanthu sim men mi a si ih zo an dik, dik lo, timi simnak khal a si lo. Hi thu Pu NTK in a sim ruangah Pu NTK dodal le huat phahnak a tling lo.

CNF Hramthawk lam Umtudan

  1. CNF a suahkeh dan

# 1988 kum March thla 20 ah Pu Tial Khal ho in Federal, Democracy, Human Right le Self-determination ngahsalnak ding hrangah Chin National Front an rak dingsuak a si.

Simfiangnak:

Pu NTK in CNF president a tuan hlan ah Pu Tial Khal ih ho CNF ih tumtah mi cu Federal, Democracy, Human Right le Self-determination ngahsalnak ding hrangah a si lo; an rak tumtah mi cu India ram sungih Chinram lutter (to merge Chinland into Indian Union) a rak si sawn. India PM hnenih Pu Tial Khal hmin ih cakuat mi khalah hitin ngan a si (Mirang ih ngansaktu cu Pu Lalkhawliana a si). Pu NTK President a si hnu lawngah CNF tumtah mi cu “mahte ukawktheinak ngah (to have the right to Self- determination)” tiin thleng a si. “Self-determination timi hi Independence, asilole, Federal danin rampi pakhat ih Chinram um ve” timi phun hnih a sawh thei. Sawh thei dingin Pu NTK in a ngan mi a si. Hi tumtah mi le Danbu (Constitution/By-law) cu August 30, 1989 Champhai CNF Central Committee meeting lawngah nemhnget a si.

  1. Pu NTK CNF president a ngah dan.

# Pu NTK cu Manaplaw ah meeting kai dingah CNF ah an thlah ih meeting kainak ah midang pawl in President in hmin an sign ih kei tla ka sign ve.. curuangah kei tla President ah in ret lawlaw uh..a tiih Roenga le Lian No Thang in an duh lo nan Pu Tial Khal in a duh ih president a rak cang… Party conference ah siseh, cabinet sungtel pawlih lungkimnak khalin siseh CNF president a rak cang mi a si lo.

Simfiangnak:

Pakhatnakah, President sinak thawn Pu NTK in a hmaisabik ih (October, 1988) Thailand a feh tikah Manaplaw meeting kai dingah a si lo, Manaplaw (KNU hmunpi) um le um lo hman Pu Tial Khal le Pu NTK pawlin an rak thei hrih lo. Thailand a fehnak san cu Pu Sapzova timi MNF hlun Chiangmai ih um le Bill Young timi tongin ramhna tuan vivo dan ding lamzin hawl dingah a si. Pu Sapzova hnenah Pu NTK hmel theihnak ngansaktu cu Pu Hmangngaiha (Electric veng, Aizawl) a si. Pahnihnakah, 1988 laiah CNF in Tlangparmi meithal kai zawmkhawm National Democratic Front (NDF) ah a lut hrih lo ruangah Manaplaw ih meeting ah Pu NTK tel thei a si lo, president ka si tiih hmin sign nak ding san khal a um lo. Curuangah, an ngan bangin “President in hmin an sign ih kei tla ka sign ve. Curuangah kei tla President ah in ret lawlaw uh,” ti mi hi thuphan a si. Hitin Pu NTK in a simnak ding san a um lo.

Cun, culaiah CNF ah minung pali (4) Pu Tial Khal, Pu Roenga, Pu Lian No Thang le Pu NTK pawl lawng an um. Cabinet ti ding tlak a um lo, Central Committee ti ding tlak khal a rak um lo. V. President le General Secretary khal an rak um lo. CNA timi ralkap khal din a si hrih lo. Pu NTK Thailand a feh zik ah, President in maw Foreign Secretary hmin in maw a feh ding, timi thu a suak ih, CNF aiawh in thutawp va rel thei dingah President sinak in feh siseh, tiin thu relcat vekin feh suak a si sawn.

Pathumnakah, Pu Tial Khal, Pu Lian No Thang, Pu Roenga le Pu No Than Kap lawng umnak CNF ah an zate (4) lungkimnak telloin Pu NTK cu President ah a cang thei lo. Curuangah, Lian No Thang le Roenga in Pu NTK president a si ding an duh lo timi cu a dik lo.

Palinakah, Pu NTK cu Party conference ah siseh, cabinet sungtel pawlih lungkimnak khalin siseh CNF president a rak cang mi a si lo…. ti mi thu ah, ngan zo bangin Pu NTK president a si pek laiah, CNF ah minung pali (4) lawng upa cin an um. Cabinet ti ding tlak a um lo, Central Committee ti ding tlak khal a rak um lo. Mi pali nga lai lawngin ziang Party conference an tuah thei ding? Cabinet timi a um hrih lo laiah “Cabinet meeting” ziangtin an nei thei ding? Pu NTK zuamnak in CNO, CDP, ZLF le Pu Zing Cung pawlih party BDF in CNF an kawp thluh hnu March 27, 1989 lawngah Cabinet members (Secretaries or Ministers) hrilnak le sinak pekawknak neih thei a si. Cabinet dinnak hmun cu Aizawl, Chaltlang vengih Pu Ngura tei inn hnuaiah a si. Cabinet members cu:

President: Pu No Than Kap (John Khaw Kim Thang)

Vice President (1): Pu Tial Khal (Flm)

Vice President (2) : Pu Sang Hlun (Hka)

Vice President (3): Pu Salai Myo Aye (Asho)

General Secretary: Pu Acaret Val Thang (Mtu)

Trade & Commerce Secretary: Pu Lian No Thang (Flm)

Finance Secretary: Pu Ngun Hre (Hka)

Deputy Fin. Secretary: Pu Anthony Thawm Mang (Flm)

Deputy Foreign Secretary: Pu Roger Biak Lian Thang (Hka)

Publicity & Info Secretary: Pu Thang Rem (Hka)

Dep. Pub&Infor Secretary: Pu Ni Lilian (Flm)

Organization Seretary: Pu Than Kio (Thantlang)

MVL Director: Pu Tluang Lian (Flm)

Dep. MVL Director: Pu Dr. Sui Khar (Thantlang)

Defense Secretary: Pu Tlung Lwe (Mtu)

Asst. Defense Seretary: Pu Rollin Van Bik (Hka)

PA to V.President -1: Pu Roenga

HMINSIN: CNF dan ah President cu ralkap C-n-C a si ruangah Pu NTK cu C-n-C a si cih.

Cabinet members hril ni zuk

Cabinet members hril ni zuk

Sitting (L to R): Pu Tial Khal (V.President-1), Pu NTK (President), Pu Sang Hlun (V.President-2). Standing (L to R): Pu Thang Rem (Pub&Info), Pu Thawm Mang (Dep. Finance), Pu Roger BLThang(Dep.Foreign), Pu Roenga (PA to V.President-1), Pu Tluang Lian (MVL Director), Pu Nili Lian (Dep.Pub&Info), Pu Val Thang (Gen.Secretary).

  1. Pu NTK cu CNF President sinak ihsin a veikhat dawisuahnak

# Pu NTK in President sinak a lak mi parah lungawi lonak cu 1989 kum thawk lamah a sang bikah a thleng a si.

Simfiangnak:

2007 ih CNF thu suah mi ah Pu Tial Khal in Pu NTK president si dingah a duh ih midang hnenah pawmpi dingin a dil sak ti phun in an ngan. Cutin Pu Tial Khal in Pu NTK president a si ding a duh a sile ziangah 1989 kum thawk ah Pu NTK President a si ruangah Pu Tial Khal a lungawi lo, lungawi lonak sangbik a thleng, tiin an ngan lala? An thu ngan mi a kalh aw. An ngan mi a dik lo ti a lang.

Ngaingai ahcun Pu NTK president a si ruangah si sawn loin, India bawmnak paisa thu ah PC party sawhthupnak ruangah Pu Tial Khal in Pu NTK hnenin president sinak laksak a tum sawn mi a si. President sinak men lawngah Pu Tial Khal hi a buai lo ti a tlunih CNF pawl ngan mi lala ah a lang zo (Hi thu hi a hnuaiah fiang deuh in ngan a si).

# Pu NTK cu India Congress (I) Cozah hnen ihsin an bawm mi Rupee Rs.1,000,000 (one million) cu president Pu Tial Khal um lo laiah Pu Tial Khal ih nupi hnen ihsin paisa suahnak Check kha a bum ih a lak hnuah amah thu te in a suah ih dik loin a hmang.

Simfiangnak:

Himi paisa thu ngan mi a rak zumtu mipi an um ruangah sau deuh in “thudik” simfiang a si ding.

Pakhatnakah, CNF hi ramhnuai (underground network) pakhat le Chinram in mahte-thuneihnak ngah thei dingin (to have the right to self-determination) Pu NTK san laiah rak tumtah a si tlunah, ramsung lawngah cangvai loin ramdang dang (international politics) ah tel ban dingin rak zuam rero lai a si tikah, “thuthup” timi an rak nei. Cuvek mipi theih ih puansuah lo ding mi paisa le ralthuam leinak thuthup (top secret) ih ret mi a um ruangah (Thimnakah, India bawmnak in KIA le CNA kawpaw in ramdang ihsin vanzam thawn ralthuam phurh tumnak), a thei ban lotu le a thei thiam lotu in CNF thawkpek lai ih hotu bik Pu NTK cu amai hrangah paisa hmang peng rero in an puh (ruat) phahnak a si.

Pahnihnakah, Pu NTK in amah le CNF hotu pahnih thum lai lawng ih theih ding thuthup cu Central Committee meeting ah a puangsuak. Hihi a palh zet mi a si. Thu umdan hitin a si: India ih paisa bawmnak thu hi CNF upa dang in a thu men lawng an theih a sile amah (Pu NTK) an zum lo phah ding tin a ruat ruangah, August 30, 1989 ah Champhai Refugee Camp ih Central Committee meeting ah India in CNF paisa a bawm thu Pu NTK in a puang. A puansuah tikah, Cabinet Minister pawlin anmai kaih mi Department hrangah paisa ting tam tuktuk an dil ciamco ih party sungah paisa at in an aa cih, dothlengnak timi cu paisa hawlnak vekih ruat Cabinet Vuanci lakah an suak cih. Hihi CNF buaithawknak hrampi bik a si sawn, Pu NTK ih president tuan le tuan lo thu lawngah buainak a suak lo.

Pathumnakah, India in CNF hnenah one million (Rs. 1,000,000) a pe timi hrimhrim hi thuphan a si.

Palinakah, India hnenah Pu NTK hminin 10 million (1 crore) dil a si. Cumi sungin ting 17 lawng India in bawm a si hrih ding thu CNF a sim. India aiawh in paisa petu dingah ZORO hotu le DP party president Brig. Thenphunga Sailo cu Pu NTK in a hril (Hi thu kimcang Pu NTK ih “Ramhrang Ruat in” timi cabu sungah siar aw). Ting 17 pek ding timi sungin ting 6 cu India aiawh in Pu Thenphunga hmang in CNF hnenah pek a si. CNF lamin paisa dawngtu cu CNF president Pu NTK a si. Petu ah Pu Thenphunga in hmin a sign ih ngahtu ah CNF lamin Pu NTK in hmin a sign ve. Peknak hmun cu Zarkawt, Aizawl ah a si. A pek laiah India aiawh Kala bawipa le ZORO lamin Pu Thengphunga le Pu Lalkhawliana an um ih CNF lamin Pu NTK (president), Pu Tial Khal (V.president-1), Pu Roenga le Pu Ni Lilian an um.

Pek mi paisa ting (6) sungin a zan lala ah thawng sawmnga (Rs. 50,000) cu Pu Tial Khal hnenah pek a si (himi paisa ka hmang thei a si le Bank in Loan ka lak phah thei ding tin Pu Tial Khal in a dil ruangah). CNF upapawl lakah bulpak hrangih India bawmnak paisa hmang ngahtu cu Pu Tial Khal lawng a si. Cun, ZORO hotu Lalkhawliana te dilnak vekin thawng sawmli (Rs.40,000) cu an hnenah pek a si. A tang lai mi zaten Pu Roenga le Pu Ni Lilian hmin in Jt. Bank account tuah hnuah Vijay Bank, Aizawl ah ret thluh a si. Pu NTK hmin in paisa ret mi Bank ah pya khat hman a um lo. Cumi Bank ih paisa ret mi sungin Champhai camp CC meetingih relcat vekin CNA hman dingah biakawknak W/T le R/T cu Hongkong ihsin lei a si. Ramdang khualtlawnnak lamzin fehnak ih hman ding lenglam president Pu NTK in amah bulpak hrangah CNF paisa hman mi a nei lo. President a si ruangah CC remtinak le Finance Secretary theih loin Pu NTK in party paisa a duhduh in hmang thei a si lo. Paisa suak lut zaten Finance Secretary in record tuah thluh a si.

Panganak, Ting 17 sungin ting 6 lawng CNF hnenah India ih pek mi a lut. A tang mi ting 11 cu Brig. Thenphunga kut a thleng zo nan Thailand ramri ih DAB meetingah Pu NTK a feh lai a si ruangah a tlun hnuah lak dingin rel a si. Pu NTK ra tlun hlan, DAB meeting ih a um laiah a tang mi ting 11 cu ZORO in an party DP hrangah hman an duh ruangah Pu Tial Khal an sawh thup ih Pu NTK cu hlawn tumin Pu Tial Khal le ZORO kawpaw in CNF sungah nasaten buainak an tuah. Pu Tial Khal pawlin;

“Pu NTK cu India bawmnak paisa tampi a lak ih USA lamah a tlan hlo zo. Hollywood lamah fala thawn nuam a cen rero men. Pu NTK in amai hrangah Paisa a ei thup ruangah CNF president ihsin ban a siih Pu Tial Khal cu CNF president a si sal zo..” tivek thuphan le thusia phunphun cu Aizawl News papers ah an rak suah ciamco. Cui thuphan thupawl cu Pu Zing Cung pawlin an ngan sal mi a si. Pu Tial Khal le ZORO pawlin thuphan an rak sim mi cu tui ni tiangin a zumtu an um.

@ Hitin 1989 October laiih ZORO le Pu Tial Khal kawpaw in CNF sungah buainak an tuah laifang, Pu NTK cu paisa tampi tlanpi in USA lamah fala thawn nuam a cen rero tiin thuphan an puh rero laiah, Pu NTK cu Thailand ramri Manaplaw kiang KNU(Karen) sizung ah a thi ding maw a nung ding ti hman theih ban loin a pumna in ni 4 sung, ziang thei lo (unconscious) in, a um. A dam lo sung hmuah Pu NTK rak kiltu cu Maj. Zamaising a si. Pu NTK thei tawkin rak bawmih rak kiltu Karen le KIA upa pawl hnenah lungawithu sim tlak a si.

HMINSIN:

Hitin ZORO le Pu Tial Khal pawlin India ih CNF bawmnak thu Thuthangca tiangin an puansuah (publicize) ruangah Kawlram cozah tiangin an theih phah ih lungawi lonak India hnenah an thlen. A thupte ih sumpai bawmnak a lang suak tikah India le Kawlram rampi pahnih pehtlaihnak a siat phah phangin paisa bawmnak khal India in a tawpter. A pawi zet. Riahsiatza zet a si fawn. Pu NTK in thuthup ah ret a zuam rero laiah zapi theih dingin rak au luarlo an um ih cutiin au luarlo pawl cu International politics le dothlengnak tuah tlak an si lozia a lang.

Hitin party le ralkap sungah buainak a suak ruangah, Pu Thenphunga hnenih Ting 11 a tang lai mi cu, tu ni tiangin, CNF hnenah pek a si nawn lo (Pu Zing Cung ho in an dil ngah thei sal a sile a tha zet ding). CNF sungah Pu Tial Khal hmangin buainak an tuah ruangah Pu Thenphunga pawlin Ting 11 an ngah ih an hlawkpi phah, asinan CNF hrangah cun “zuan theinak ding thla hmul phawi kawlh sak” tluk a si.

# Pu NTK in president Pu Tial Khal um lo laiah Pu Tial Khal ih nupi hnen ihsin paisa suahnak Check kha a bum ih a lak hnuah amah thu te in a suah ih dik loin a hmang.

Simfiangnak:

1989 laiah India in Check in paisa CNF a pe lo. A pek mi umsun Ting 6 cu, a tlunih ngan zo bangin, kut in pek a si. Tahthimnakah, Pu Tial Khal hminin Check ngan mi a um ih cumi cu a nupi hnenin Pu NTK in bum in a laksak a si ti bang hmansehla (even if), Check ih Pu Tial Khal hmin a um ahcun Bank ihsin Pu NTK in a suah sak thei hrimhrim lo ding (Bank cu an ralring tuk ruangah paisa cu zatzat midang in suah sak theih a si lo). Curuangah a tlunih Pu NTK in president Pu Tial Khal um lo laiah Pu Tial Khal ih nupi hnen ihsin paisa suahnak Check kha a bum ih a lak hnuah amah thu te in a suah ih dik loin a hmang.. timi thu cu zoh fiah dawl lo thuphan phuah cawp (baseless deliberate lie) a si.

# A tlunih tarlang mi thuhla pahnih ruangah V. President Pu Tial Khal, Chief of Staff Pu Ro Eng le rualpi dang pawlin 1989 kum October (6) ah Pu NTK cu CNF ihsin a veikhatnak an rak dawisuah a si.

Simfiangnak:

V.President (1) Pu Tial Khal le Pu Roenga pawlin Pu NTK lawng CNF ihsin kan dawisuak tiin ca an suah lo, President Pu NTK, V. President-2 Pu Sang Hlun, General Secretary Pu Val Thang, Defense Secretary Col. Tlung Luai le Cabinet Secretary dang pawl khal an zaten kan dawisuak tiin ca an rak suah mi a si. Cumi duh loin, V.President-2 Pu Sang Hlun ho pawl cun, “Pu Tial Khal le Pu Roenga pawl cu CNF ihsin kan dawisuak a si” tiin ca an rak suah ve (Hilaiah Pu NTK Thailand ramri ah dam loin a um).

Khatlam khatlam in “dawinak ca” an suah veve ruangah, Pu Tial Khal lamih suah mi lawng thungai le lak tlak ah ret tahratin “Pu NTK a veikhat dawinak” tiih an ngan mi cu thu pipa ih lak tlak a si lo. Cun, thulai le thudik ngantu cun, “Pu NTK vei khatnak dawi” timi zawnah Pu Tial Khal te in Pu NTK lawng si loin Pu Sang Hlun, Pu Val Thang, Pu Tlung Luai le a dangdang khal dawinak ca an suah ruangah Pu NTK hmin lawng dawi vekin ngan ding a si lo. Cuitlunah, Pu Sang Hlun pawlin Pu Tial Khal an dawinak thu khal “CNF ihsin Pu Tial Khal an dawi” tiin an ngan thluh a tul. Thleidan neiin ca ngan dan a si lo. Theih ding mi ah, khalaiah Pu Tial Khal (V. President-1) ih hoin president tuan lai Pu NTK dawi theinak power le right an neih lo ruangah “Pu NTK vei khatnak dawi” timi cu san le umzia nei lo a si.

# Chief of Staff Roenga.. timi hi Pu Tial Khal ih kawh dan an cawn men mi a si. CNA ah Roenga cu Chief of Staff pek a rak si dah lo. Tui ni ah Pu Tial Khal le Roenga te pawl ih sim mi zaten a dik thluh vekin Pu Zing Cung pawlin ca an ngan mi cu Pu NTK donak ah hriamhrei (political weapon) phun in an hman hrim men mi a si.

# Pu Sang Hlun, Pu Tluang Lian le 88 tlawngta tlan mi pawlin Pu NTK lamah dingin an rak tanpi ruangah Pu NTK cu President ah a rak ding suak theinak a si.

Simfiangnak:

A hmaisa ah “an dawi” an tiih tu ah “a ding suak” an ti lala. An dawi timi ih umzia a neih lozia a lang.

Theih ding mi ah, Pu NTK in Pu Sang Hlun le 88 tlawngta tlan minopawl CNF ih a lutter cu Pu Tial Khal le Pu Roeng in an duh lo tuk (an sinak an hloh an phang tla a si thei). Hihi Pu Tial Khal hoin buainak an tuahnak san pawl lak ah a telve. Curuangah 88 tlawngta tlan pawlin anmah duh lotu Pu Tial Khal le Roenga lamah tang loin anmah duhtu Pu NTK lamah an rak tannak a si. Ngaingai ahcun 88 tlawngta Haka lam unau pawl hi Pu NTK in la lut lo sehla, Pu Tial Khal le Pu NTK lakah buainak hman a um lo men ding.

Theihbet ding mi cu, Pu NTK CNF president a si ti 88 tlawngta tlan pawlin an theih hlanah, Pu Tial Khal ih ho CNF cu 88 tlawngta tlan pawlin an zawm duh lo. Tlawngta hotu Pu Sang Hlun le Pu Khua Uk Lian te Aizawl lockup ah thawng an tlak tik khalah CNF ih Roenga le Lianno Thang in in hek a si ti tiang in CNF le Tlawngta lakah thu a rak buai. October, 1989 ih Pu Tial Khal in buainak a tuah laiah Pu Zing Cung te cu Kachin ramah an um lai a si ruangah thufiang an thei ban lo.

  1. CNF pawl hnih thennak

# Pu Tial Khal hopawl cu CNF (origin) ti ah an ti aw i India-Bangladesh – Kawlram ramri ah camp hmun khuarin a dangte in an rak cangvai a si….

Simfiangnak:

Pu Tial Khal pawl cu a hrante in India-Bangladesh – Kawlram ramri ah camp hmun khuarin a dangte in an rak cangvai.. timi hi a dik lo. Hilaiah Col. Tlung Lwe ih ho CNA lawngin India-Bangladesh – Kawlram ramri ah camp an tuah ih cu hman cu an tuah thawkpe fang a si. Pu Tial Khal ho Roenga le Lalsanga ih ho mi (13) cun Col. Tlung Lwe ih ho an va do tumnakah ramri an va thleng men mi a si, hmun khuar mi an nei man lo.

..# Pu No Than Kap le Pu Tial Khal homi CNF (origin) tiah CNF pawl hnih ah a rak then aw ta a si.

Simfiangnak:

ZORO le Pu Tial Khal komkhawm in CNF sungih buainak an tuah mi cu nasazet a si. Pu NTK le Pu Sang Hlun CNF hotupawl khal Mizoram ah um ngam nawn loin Manipur, Lamka lamah an tlanih umhmun an khuar. Pu Tial Khal hoin nehnak an ngah lo tikah Pu Tial Khal cun 1990 ah CLO party thar a din. Curuangah 1989 ah CNF party pahnih ah a phir lo, party a rak thenaw fawn lo, buainak lawng a um.

..# Pu Ro eng, Pu Lian No Thang le Aizawl um Chin miphun hrekkhat in Pu Tial Khal an tanpi.. Hi khal hi a dik thluh lo. Hitawk buai laiah Pu Lian No Thang cu CNF ah a um nawn lo ih zo lam hman tanpi mi a nei lo. August, 1989 ih India in CNF paisa a pek lai khalah Pu Lianno Thang cu CNF ah a um nawn lo. Himi paisa pek mi ruangih buainak khalah Pu Lianno Thang a tel ve lo.

  1. Pu Roenga thah tuarnak Thu

Simfiangnak:

Pu Roenga thihnak thu ah fiang zetin Pu NTK le CNF General Secretary Pu Val Thang in thusuah mi an neih zo ih simfiangbet ding a um lo. Roenga thihnak thu ah khalaiah Pu NTK cu mawhphurhnak neitubik a si, tiin an ti mi cu CNF lu bik Pu NTK a si ruangah, CNF sungih a cang mi zaten, amah ih order an si lo khalle, mawh a phur (moral responsibility) a nei, an tinak men a si.

 

A tlunih simfiangnak cu pakhat le pakhat hua aw thar sal le hmusual aw thar sal dingin ngan mi a si lo, a siartu mipi in “anmahten thudik hawl suak thei hai seh” tinak fang a si (The purpose of this paper is not to renew hatred or misunderstandings, its just to help the readers find the truth themselves).”

Source: Riahbuk

CNF ih 2007 November 28 ih an rak suahmi Statement:

No Than Kap (aka) John Khaw Kim Thanng thawn pehpar aw in Chin

National Front ih simfiang nak

November 28, 2007

Hramthawknak.

1992 kum December 9 ni ah Pu No Than Kap (aka) Jonh Khaw Kim Thang cu Chin National Front ih sung tel sinak in siseh, Chin National Front (CNF) President le Chin National Army (CNA) Commander in Chief sinak in siseh National Security Emergency Committee in an rak suah asi.

CNF ihsin an suah hnu India Politics ah a hnamhnuai ringring ruang ah India Security pawl in an kai ih SLORC kut sung an hlan hnu ah Bible tlawngInn pakhat ah Bible tlawng saya atuan rerotu asi. 2006 kum ah USA ah ava feh lai ah CNF thawn peh par aw in adik lomi thu hla pawl asim hnu ah Rev. Dr Val Thang thawn Statement pakhat hmun khat an rak suah zo nan kan mah lam in zianghmanh letnak kanrak tuah lo. Kan dung rei lo te ah Malasia ah afeh sal i Hruaitu thawn tawn aw thusuh nak antuah i CNF thawn pehpar aw in siseh, CNA thawn pehpar aw in siseh adik lomi thuhla pawl asim lala ruang ah Chin Miphun dothlennak le Chin Miphun Lungrualnak kha asiat suah theiding tin ruahnak a um ruangah Pu No Than Kap thawn pehpar awin himi simfiang nak kha Chin National Front, Publicity and Information department in ahnuailam vekin kan suah asi.

CNF Hram Thawk Lam Umtudan.

1.CNF a suahkeh dan.

1988 kum Marh thla 20 ni ah Pu Tial Khal ho in Federal, Democracy, Human Rights le Self – Determination hngahsalnak ding hrang ah Chin National Front cu an rak dingsuak asi.

  1. Pu No Than Kap CNF president sinak a hngah dan.

1988 kum cem lam ah Pu Tial Khal homi CNF pawl in Pu NoThanKap cu Mirang tong a thiam an ti i Ramdang lam dawrding in asawm ruang ah Pu No Than Kap cu CNF sung ah arak lut nak asi. 1988 kum ah Pu NoThanKap cu CNF palai in Manepalaw ah thu rel khawm Meeting ah avakai hnu arak thleng sal tikah amah nih “ A dang pawl hmuah hmuah khal President sinak in thu rel khawm nak Meeting ah an min an sign thluh ruangah keikhal CNF President kasi kati i CNF president sinak thawn karak sign asi, curuang ah President in kian lawlaw u ” tiin arak dil i CNF arak dinh hmasa tupawl sung in Pu Lian NoThang le Pu Ro Eng te nih anrak duh lo asi. Sihmanhsehla Pu Tial Khal amah rori in Pu No Than Kap cu katupa asi, Mino cathiam asi, Mirang tawng athiam ruangah Pu NoThan Kap nih   a dilmicu pawm sak ding in adang hotupawl hnen ah a dilsak hai i Pu NoThan Kap cu CNF president arak sitheinak asi. Party Conference ah khal siseh, Cabinet sung tel pawl ih lung kim nak vek in khal siseh, CNF President arak cangmi asilo.

  1. Pu No Than Kap cu CNF president sinak ihsin avei khat dawisuahnak

-President Pu Tial Khal homi CNF Headquarters in Pu No Than Kap kha ramdanglam tuanvo anpe ih Pawlkawm Meeting kai ding in anrak thlah nan President sinak arak lak mi par ah lungawilonak cu 1989 kum thawk lam ah asangbik ah a thleng asi.

– Cu hlei ah Pu No Than Kap cu India cozah Congress I hnen ih sin an bawmmi rupee Rs.

(1) Million (rs. 1000000/-)cu president Pu Tial Khal umlolai ah Pu Tial Khal ih nupi hnen ihsin phaisa suah nak Check kha abum ih alak hnu ah amah thu tein a suah i dik lo in a hmang. Atlun i tarlangmi thuhla pahnih ruang ah Vice President Pu Tial Khal, Chief of Staff Pu Ro Eng le rualpidang pawl in 1989 kum October (6 )ni ah Pu NoThankap cu CNF ih sin aveikhat nak anrak dawisuah asi. Sihmanhsehla Pu Val Thang, Pu Tlungluai, Pu Sang Hlun, Pu Tluang Lian pawl in siseh, 88 tlawngta tlan mino pawl in siseh Pu No Than Kap lam ah ding in anrak tan pi ruang ah Pu No Than Kap cu President ah arak ding suak thei nak asi.

  1. CNF, pawlhnih thennak.

– Pu No Than Kap cu CNF party kha amah duh vek in ahruainak, phaisa duh tawk in a hman nak pawl ruang ah Pu Tial Khal le Pu No Than Kap kar lak ah buainak arak suak i 1989 kum October thla (6) ni ah Pu No Than Kap cu CNF ih sin avei khat nak dawi suak atuar hnuah Pu Tial Khal hopawlcu CNF (origin) tiah anti aw i India- Bang ladesh –

Kawlram ramri ah ralkap camp hmun khuar in adang tein an rak cangvai asi. Hi tihin Pu No Than Kap homi CNF le Pu Tial Khal homi CNF (origin) tiah CNF pawl hnih ah arak then aw ta asi. Pu Ro Eng , Pu Lian No Thang le Aizawl um Chin Miphun hrek khat in Pu Tial Khal kha an tanpi i Pu Val Thang, Pu Tlung Luai, Pu Sang Hlun, Pu Tluang Lian pawl le (88) Tlawngta tlan nau hak pawl in Pu No Than Kap lam ah anrak tanpi asi.

  1. Ro Eng thah tuarnak Thu.

– Pu Tial Khal homi CNF (origin) pawl sung ih Pu Ro Eng te group cu CNF then hnih then awknak thawn pehpar aw in thu rualremnak um theiding ah an thlahmi ZORO ih sin Pu Lal Sang te thawn an kawm aw i India- Bangladesh ramri ah Camp tuah in an rak um asi. Cu lai fang ah Pu No Than Kap homi CNF pawl cu Bangladesh ramri ah Camp sak in hmun anrak khuar hmasazo asi. Pu Ro Eng le Pu Lal Sang homi group cu Pu No Than Kap homi group kha sim ding in an rak thleng asi. Pu No Than Kap homi CNF group in 1989 kum December thla (18) ni zan ah Pu Ro Eng le Pu Lal Sang homi minung (14) le Meithal zun ( 3) thawn an kaingah i Sekenah Camp ah thong anrak thlak asi.

-Pu Ro Eng, Pu Tluang Hre le Pu Lal Sang te siar lo a dang thongtla pawl cu 1990 kum February thla (3 )ni ah an za tein thlah arak si. Pu Lal Sang cu May (11) ni ah Mizo ram tiang thlen pi asi i Indiaram Parva athlen ah May (12) ni ah athi ta asi. Pu Tluang Hre cu a thongtlak lai ah June (25) ni ah senten natnak thaw in athi ta asi.

– Pu Ro Eng tel in Mi pathumcu Thong Inn ih sin veihnih ciar an rak tlan ko nan an rak kai theisal asi. Pu Ro Eng cu July thla ne tabik zarh sung ah aveithumnak atlansal i tlun lam Order vek in 1990 kum August (5 )ni ah thahnak arak tuar asi.

– Pu Ro Eng thihnak an pek mithawn pehpar awin Pu No Than Kap cu ka khual tlawn sung asi i thihnak pehtucu Pu Sang Hlun asi tiah athicia zomi Vice President Pu Sang Hlun lawng nih mawhphurnak anei. Keimah nih Mawhphurnak kaneilo tiin Kum 2006 May (13) ni ah Internet ihsin Pu Val Thang thawn hmunkhat ah simfiang nak ca pakhat an rak suah asi. Thu ngaingai ti ah cun cuih thuthawn pehpar awin mawh phurnak neitubik cu culai ih CNF President asi mi Pu No Than Kap hi arak si.

Pu No Than Kap kaihhruailai CNF umtudan

Pu No Than Kap kaihhruailai kum (3 )sung ah CNF cu Dictatorship in hruainak, Paisa dik lo zetin hmannak, Mah le peng duhnak thinlung neiternak, ziaza siatnak, misuam hmang nak, mi kidnap nak le Phioh – Thuk – Tat lansin pawl hmannak aphunphun pawl kha arak hmang asi. Politics akaihhruai tik ah peng khat le pengkhat karlak, hnam khat le hnam khat kar lak ah hmuh awk thiam loding in atuah i amah i honak, thunei nak um thei ringring ding tactic arak hmang asi. Ralkap thawn pehpar aw in Meithal hriamnam pawl cu ram dang ihsin bawmnak kan ngahzo tiin abum hngai i ram dang ihsin Meithal hriamhreipawl a rak phur dingmi Helicopter cawlnak ding cawlhmunkha vei tampi arak hawl ter asi. Asim ring ring micu “Ralkap thazang nan kawm awthei asile Meithal cu mipakhat in zunhnih zunthum khal nan bei kei cu ” ti in bumnak thawn arak sim theu asi.

  1. Pu No Than Kap ih thil dik lo arak tuah mipawl par ah NSEC ih mawhpuhnak.

Pu No Than Kap par ih athukpi bik in puh micu atanglam pa (3) hi asi.

(a) Thuneih nak (power) dik lo in ahman nak.

– 1989 kum ihsin 1992 kumtiang CNF in anganmi danhrampicu Party Conference ih araktimi principle le Policy thawn nganmi arak silo i Pu No Than Kap in amah ih duh vek in anganmi CNF danhrampi lawng arak um. Cu ruang ah Party danhram, dunle dancu Party President pakhat lawngle Party Member pakhat lawng nih ngan cu a awm lo tiin mitampi in Pu No Than Kap par ah an rak suaisel nasa asi. -KaChin ram, Ka Chin Independent Organization ( KIO) Headquarter ah Alexandra Hrang Vung Thang cu Major sinak pek nak thir hri( mirang ca in ) thawimi ca pakhatcu General ZawMaing hnenah arak kuat. Cuih ca sung ahcun zohmanh theiter loding (Roger) tiin arak ngan. Cu lai ahcun Pu Roger F. Biak Liang Thang cu CNF i Foreign Secretary in KIO headquarters ah CNA ralkap pawl thawn hmun khat ah a um rero lai fang asi. Roger theihloding in thu pek i CNA ralkap pakhat kha Major rank tiang kaisang tercu Pu No Than Kap ih thil ti diklo le felfai lonak asi.

– Party in Ka Chin Independent Organization (KIO) hnen ah ralthiamnak zirding hrang ah Chin Mino (70) cu Taluk- Kawlram ramri KIO hnenah thlah anrak si. Kum hnih sung Training phunphun an kai theh hnu ah 1991 kum February thla ah Chin Land ah tlung hram an rak thawk. 1991 kum May (25) ni ah Naga National Council Headquarters an rak thleng i cu tawk ih sin June (3 )ni ah Naga National Socialist Council ( Nukpa) khua ah anrak thleng. Chindwin tivapi alian ruang ah le tivarek pawl anlian ruang ah fursungcu NSCN (K) headquarters ah an rak cawl sung. Cuih sin Pu No Than Kap in Indian MI pawl ih bawmnak thawn ralkap pawlkha Meithal zun 4- 5 thawn group tetein aphur hngai.Ahmaisabik ah Major. Alexendra Hrang Vung Thang le Department ciar ih Upa pawl kha ako hmasa. Hrek khatcu hriamnam telloin Civil thuam thawn India North East lam ih sin anrak lut asi. Major ZingCung homi Ralkap (11) le Meithal zun (12) cu 1992 kum July (22) ni tiang an tang ta asi.

– KIO hnen ihsin rak kenmi Meithal hmunthum then hmunhnih(2/3) cu India MI pawl in Chin State – India ramri- Kawlram, India le Bangladesh ramri tiang anret sak. Asinan atangmi Minung (11) le Meithal zun (12) anrak phurtheinawn lomi thuhlathawn pehpar awin Pu Val Thang in Major. Zing Cung hnen ah 26/ 12/ 91 akut thawih nganmi ca apek mi sungah Pu Val Thang le India MI officer pa an ton aw laiah aphur dingmi moto car ara theinawnlomi thuhla kha Pu Val Thang in India MI pa asut tik ah India MI Officer pa in “Nan John Khaw Kim Thang nih Civil Bus thawn kako theihai koding tiin i rak sim si ” tiin angan asi. Cu hlei ah Pu Val Thang kha Major Zing Cung te group phursuah nak hrang ah pu No Than Kap in veikhat te ah a tuan vo ih sin a cawlh ter nak thuhla le an mah group anrat nak hrang ah Major Zing Cung kha tuanvo apek nak thuhla pawl aum asi. Cumi ca sung i athu tawpnak ah “ Pathian in Lam tluan in an lo fing khawi ding i kan ChinLand ah nan rak thleng thei koding, thil acangmi thuhla thawn pehpar aw in kan president mawhphur nak thluh asi” tiin Pu Val Thang in a ngan asi. Cu ruang ah a fiangmicu Pu No Than Kap in Major. Zing Cung homi minung (11) group kha a koduh lo ruang ah an mah rawkralnak hrang ah ruatnak anei asi. Sikhalsehla North East India do thlennak tuahmi group pawl ih bawmnak thawin 1992 kum October thla ah Major Zing Cung le ralkap (11) cu Meithal zun (12) thawn ChinLand ah dam tein anrak thleng thei asi.

– Major. Zing Cung le ralkap pawl kha ral kar lak ah hriamnam thawn arak ra ternak thu hlakha 1992 kum November thla (6) ni CNF cabinet Meeting lawng ah fiang tein theih arak si. Cabinet Meeting tuah thei lo can kar lak ah Pu No Than Kap Commander in Chief ( C-in – C) , Pu Tlung Luai ( Defense Secretary ), Major Alexandra Hrang Vung Thang ( Chief of Staff) pawlcun Major Zing Cung kha an tawng i, Pu No Than Kap nih “Nang hi CNA ralkap nasiruang ah kan Order na thlun pei, kan duh duh in nangmahkha kan lo ti thei asi ” tiin asim mi hi kan zoh tik ah Major. Zing Cung kha Headquarters tiang thleng terding ah a duh lo tikha afiang asi. Headquarters ah thlengko hmanh sehla arak thlen hlan can kar lak ah ralkap kha amah i azumh mi pawl in Control terding ah tumtahnak aneiciazo tikha kanhmuh thei asi. Neh hnuah Pu No Than Kap amah hrimhrim Major. Zing Cung kha atawng i “ Nang cu uknak lam ah nathiam tiin adang upapawl inansim ruang ah General Secretary tuan aw ” tiin arak ti. Asinan Major Zing Cung in “Central Committee in dik tein tuanvo pek mi asilo ahcun katuan theilo ” tiin aletsal asi. – Cu hlei ah Pu No Than Kap cu thurelnak um lo in amah Order in Pawlsung ralkap pawl kha aduhtawk in Phio- thuk- tat atuahmipa asi. A mah i thil atuahmiruang ah ralkap pawl cu kan mah can ziang tik arak thlengpei tiin thinphang zet in an umtheu.Ralkap pawlcu athat tik ah Column asuak ter i thah duhmi ralkap pakha hmaisabik Point ah afehter i dung lam ih sin an kap that theuh ruang ah point ah zo hmanh in an feh ngam lo. Point an feh ter asi len keimah can athleng thlang ding tiin thin phang zetin feh dingmi dinhmun ah an rak thleng asi. Pu No Than Kap ih dik lozet in athah mi Mi hrekkhat list cu atang lam vek in kan tarlang asi.

No Min Kum Ahmun puhnak/ case

1 Lai Peng 1990 Thlatang.thingahlai,Sungtibawk khua Phaisa buainak

2 Vision 1990 Thlatang sung, Thing ahlai Nu nau thuhla

3 HrangBual 1990 Zimte khua kainak Phaisa khawn

4 Hmangaih 1990 zimte khua kainak Phaisa khawn

5 ZamAiSingh 1990 leilet khua kiang CNF dodalnak

Kauza 1992 Parva, Lunghring tlang Phaisa khawn

7 Chuan Kung 1992 Champhai Area Tio tivakiang Phaisakhawn,Nunau

8 M C 1992 Bangladesh HQs Thuaphuangdingtiahpuhnak

– Cu hlei ah KIO ih sin arami, NSCN Headquarters ih athlengmi CNA ralkap pawl le hriamnam pawl kha India MI pawl in an phur sak rero lai ah Pu No Than Kap cu “Give and Take Policy” kha a hmang. Cucu CNF/ CNA abawm tu NSCN (KhapLang) headquarters umnak hmunhma zate in zuk zuk i India MI pawl kut ah pekding kha asi. Hi hnatuan kha Major. Zing Cung tuan ding ah Pu No Than Kap in tuanvo arak pek tik ah Major Zing Cung in “ ziang hmuah hmuah in bawm tu pawl kha ka phatsan theilo ” tiin arak el. Asinain Pu Val Thang in Pu No Than Kap order asi atiruang ah NSCN camp meiro akhuh laifang ah zuk azuk sak. India ralkap in Major Zing Cung kha an sut tik ah “Meiro nih akhuh ringring i himi zuk lawng kazuk thei ” tiin alet sal hai. Indian MI pawl in “helicopter“ thawn kan kap thei pei maw? ” tiin ansut tik ah anhnen ah “Anti Aircraft AA gun a um hlei ah meironih akhuh ringring ruangah nan kap theiloding” tiin alet sal hai. Hiti hin CNF / CNA par ah abawm tupawl kha Siat ralding hrang ah Pu No Than Kap cu akut atawilo asi.

– Surgeon Nawl Iap in NSCN ( IM) ralkap (30)kha chinLand sung ih sin Naga land tiang athlah lai ah India ralkap kha Ambush a fial hai. Indian ralkap in Ambush kah nak ding lam ih sin fehding in Pu No Than Kap in Order apek mikha Surgeon Nawl Iap in alung a hring i afial mi lam vek in feh nawn lo in adang lam ih sin afeh pi hai ruang ah Naga Land ah dam te in an thleng thei asi. Hi Thil khal hi dothlennak tuah reromi pawl lawng siloin Mah ih ralkap rori hmanh phatsan ih that ngam tiang akut atawi lomi Pu No Than Kap ih thinlung alangfian nak asi. Hitihin Pu No Than Kap cu dun le dan, Mi tamdeuh lung kimpinak um loin amah ih duhnak vek in athu neinak kha dik lozet in ahmang i hna atuan tikha kan hmuh thei asi.

(b) Nu Nau lam Thuhla buainak

– Pu No Than Kap cu nunau lam ah a thlahthlam tuk mi asi tiah mi hmuah hmuah in an thei thluh mipa asi. CNF ih thit umnak thawn pehpar awmi daan ah Mipa ralkap asilen dothlen nak atuah kum (5), Nunau ralkap asilen Kum (3) kimcia lawngnih legally thit um thei asi tiah rak ti asi. Asinain Pu No Than Kap cu thup tein nupi pakhat aneihleiah party member nunau pakhat kha akeihhrem i fa araiter asi. CNF president atuan lai ah nunau pawl kha amah kilveng tu ah naih tein aret hai. Aizawl ih aum lai ah kilveng tu ah aret mi nunau pakhat kha fa arai ter. ( Security Reason ruang ah a min kan tarlang hrih lo) Afa pai micu Pu No Than Kap in a thlak ter ruangah athi suak atam tuk i thizik tiang atuar asi.

Cu nunau nu in Inquiry commission hmai ah thil dik sim ding in a ready zo ko nain Inquiry Commission hmai feh thei loding in Pu No Than Kap cun Commission kha a phunphun in akham asi.

– Cuhleiah a mah thu in Nunau pakhat kha fimthiamnak zirnak phaisa abawm i 1992 kumtiang mi pakhat hmanh nih an thei pilo i zo asi tikhal asimlo. cu nunaunu cu Naga land Makokcung ah Bible Tlawng akai ter i thuptein nupi vek in arak hmang. (Security ruang ah cunu ih hming kan tarlang hrih lo)

– Ramdang ah kafeh ding tiin ati i Manipur State Lamka khua ah athlathla in nunau pakhat thawn an umkhat theuh asi. Cuticun Pu No Than Kap cu ziazalam ah atlak sam i nunau lam ah khal athlahthlam zet asi.

(C)Paisa dik lo ih ahman nak

– CNF cu Democracy, Federal le Self Determination ngah salnak ding hrang ah a do rero mi pawlpi asi. CNA cu CNF ih tumtah mi thleng theinak ding hrangah Mipi sung ih sin arak suahmi mipi ralkap asi. CNF cu aneihmi paisa pawl kha alliance pawl hnen in siseh, ramri Gate pawl in siseh, home Tax pawl in siseh, angah mi asi. Pu No Than Kap cu amah ih thuneihnak kha dik lozet in ahmang I, amah i tupa Pu Thawm Hlei Mang (Finance Secretary) thawn a thup ten fund hawlnak hnatuan kha adang upapawl theipi lo in antuah asi. Cu hnatuan cu ramri sumdawng pawl hnen ihsin amah ih milai ralkap pawlkha hmai tuam in hruaikuai ( Kidnap), misuamhmang ter hnatuan pawl asi. Hi hnatuan cu Cabinet nih athei sal tik ah party sung buainak pi asuah ter i a hrekkhat cabinet pawlcu Cabinet ihsin an hnuhdawh awk tiang athleng. Party ih paisa pawl manage atuahnak ah adang upapawl nih an theihpi lo i amah pakhat lawng aduh vek in management atuah. – Mipi ralkap tiah pawmmi ralkap pawl cu No Than Kap Order vek in hmaituam in mipi paisa le thil neih pawl kha suamhmang in alawng ter. Milianpawl hruaikuaiding hrang ah Pu No Than Kap in ralkap pawl cu arak hmang. Tiddim lam i milianpawl kha champhai ah a hruaikuai hai i rupee 500000/- in atlan ter. Cuih paisa pawlcu Pu No Than Kap nih amah ih a duhnak vek in arak hmang asi.

-1989 kum ah India cozah Congress (I) in CNF kha Rs. one Million arak bawm. Kha paisa suahnak check kha Pu Tial Khal kut sung ah an peh nan kha check kha Pu TialKhal um lo lai ah Tial Khal nupi hnen ah hrawkhrawl in a dil i paisa arak suah thluh. Khaih thuhla ruang ah Pu Tial Khal le Pu No Than Kap karlak ah hmu aw thiam lo tiangin din hmun a suah ter asi.

– 1991 kum ah Pu No Than Kap, Pu Sang Hlun le Pu ValThang pawl cu CNA ralkap pawl ton ding ah NSCN (K) HQs ah an rak thleng. WT cet tuahhnih kha anrak keng i tuahkhat kha laksawng ah NSCN (K) anpek i tuahkhat kha rupee 120000/- in anzuar.

Cuih an zuar nak paisa kha Vice Chairman Pu Sang Hlun le Pu ValThang kha theihterlo in Pu No Than Kap nih NSCN (K) hnen ih sin a suah i arak hmang asi.

– Cu hlei ah General Secretary Pu Val Thang nih NSCN ( IM ) hnen ih sin Rs. 200000/- nalak tiah apuhmi par ah Pu No Than kap nih Rs. 100000/- lawng kalak tiin ati. Cu alak mi paisa thawn pehpar aw in Cabinet hnen ah khal arak thei terlo.

– Champhai refugee Camp i ralkap pawlkha Zote- Tlang Sang gate pawl ah sumdawng pawl hnen ih sin Tax alak ter i cumi paisa pawl cu atupa Thawm Hlei Mang in Champhai ih Bank account ah aret. Cumi paisa cu Pu No Than Kap paihthlak asi hnu Pu Thawm Hlei Mang in pawlpi hnen ah apek sal tik ah Rs. 19/- lawng apek i Bank account ih anret mi paisa hmuahhmuah cu an mahih paisa ah an hmang asi. Hitihin Pawlpi neimi paisa pawl cu anmahih duh vekin diklo zet in an hmang ruang ah pawl sung ah Pu No Than Kap par ah lungkim lonak le zumlonak cu atam vivonak asi.

  1. Pu No Than Kap cu CNF ihsin avei hnih nak dawisuahnak

– Pu No Than Kap cu thuneinak dik loin a hmannak, adang upapawl theih lo in adang Orgnization hnen ihsin paisa lak i ahmannak, asuamhmang ternak, hruaikawi ter i paisa thawn tlanternak le nunau thuhla buainak pawl ruang ah 1992 kum November thla (11) ni ah Cabinet Meeting nih mawhpuhnak anrak nei. Cumi Cabinet Meeting ah hi thuhla pawl zingzuai dingah Inquiry Commission kha Member (5) in anrak din. Commission in Inquiry hnatuan anthawk ve tein Commission chairman Pu SangHlun in Pu No Than Kap arak dinmi Intelligent Mu Van Lai ( MVL), Deputy Director Pu Andrew Ngun Cung Lian kha a ko mi thawn pehpar aw in thudik asuak pangding tiah athin phang ruang ah thil dik asuak theilo nak ding hrang ah Commission Member pawl asimi Pu Van Thawm Lian le Major Alexendra Hrang VungThang cu aphunphun in an hnainawk ruang ah Commission cu asiat i Pu No Than Kap ih lungkimnak thawin Chairman Pu Sang Hlun ai ah Pu Tlung Luai ho in Commission cu an dinsal asi. – Asinan 1992 kum December thla (3) ni ah hnatuan hram an thawk ve tein Major Alexendra Hrang Vung Thang le Pu Van Thawm Lian te cun ahlan vek thiamthiam in Commission par ah zumnak kannei lo tiin le hi Commission in thildik asuahpi theikoding nain ataangmi commission member (3) khal kanmah par ah inzum nawn lo ruang ah kan mah kan tel dingkha an duh lo ding tiin an ti lala. Cu hlei ah Commission i hnatuan thawn pehpar awin athawk i Case an suhdan par ah kan lungkim lo tiin anti i Maj alexendra Hrang Vung Thang le Pu Van Thawm Lian cu cumi Commission ih sin kan suak tiin anti i an suak ta asi. Commission khal asiat ta asi. Hitihin CNF upa pawl karlak ah rualrem thei nawnlo dinhmun ah an thleng ta asi.

– Hnetabik ah CNF cu atumtahmi lamzin par ah thlengthei salnak, Miphun hrang ih tuanvo tuan theinak le CNF ih dinhmun a siatsuah lonak ding ah National Security Emergency Committee ( NSEC) kha 1992 kum Decemver(9) ni ah Pu Roger F. Biak Liang Thang ho nak in Committee Member (10) tel in dinsuah arak si. Hi Committee in John KhawKim Thang (aka) Pu No Than kap cu Party ih Rule and Regulation kha apahtlang tiah fiang tein hmuh suah asiruang ah 1992 kum December (9) zing india standard time 08: 38: 08 A:M ah CNF President sinak le Member sinak in akum khua in dawisuah arak si.

  1. Pu No Than Kap Party ih sin suahterhnu thil umdan.

– 1992 December thla (9) ni ah Pu No Than Kap cu Party ih sin dawisuah hnu Pu Roger F. Biak Lian Thang le Pu Cang Peng tecu India- Bangladesh le Kawl ram ramri um CNF HQs ah vafeh in siseh, Maj. Zing Cung, Pu Benjamin Turing, Dr. Suikhar le Pu Andrew Ngun Cung Lian te cu Champhai refugee camp ah feh in siseh CNA ralkap pawl hnen ah Pu No Than Kap kha Party in duaisuah asinak thuhla simfiang nak anrak nei. Cupawl Champhai Camp ah an umlai fang ah Pu No Than Kap, Pu Tlung Luai le Maj Alexendra Hrang Vung Thang te cu an mah ih ralkap hrekkhat thawn champhai ah anrak thlengve.

Champhai ah Pu No Than Kap in Emergency hmanding ah thup te in aret tami KaChin ram ih sin rak ken mi hriamnam sung ih sin rifle zun (5) cu Maj Alexendra Hrang Vung Thang ho in Zote- TlangSang khua karlak ah Maj. Zing Cung le a rualpi pawl (4) cu ambush tuah ih rak that ding in Order arak pek. Asinain Maj. Zing Cung le a group pawl cu Zote- Tlang Sam lam ihsin feh loin leikuang an tan i ramri Tio tiva tiang an feh ruang ah ambush an rak tuah nak sung ih sin an rak luat thei asi.

– 2007 kum February thla (10) ni Lairawn Opinion Discussion ah Pu No Than Kap ca ngan nak ah “ National Security Emergency Committee ( NSEC) nih thu neihnak an lak lai ah Champhai refugee Camp ah retmi ( hmangmi) WT thawn HQs ah biak pawh ih atu arak thleng ding mi pawl kha an za tein rak kai hai ding in Order kasuah thei. Asinan an mah kha kazangfah hai ruang ah kakai ter hailomi asi tiin angan. Sihmanhsehla hi asim mihi thil dik mi asilo i hrawkhrawl ih asim angan mi lawng asi. Ziang ruang ah ti le culai ah Champhai Camp ah WT pakhat lawng arak um ko hmanhsehla Champhai refugee camp ah arak feh tupawl asimi Maj Zing Cung , Pu Benjamin Turing, Dr. SuiKhar, Pu Andrew Ngun Cung Lian te nih hmasa bik ah anrak lak sak micu WT cet pakhat le Pu Thawm Hlei Mang ih kaimi (.22 MM) Pistol pakhat kha asi. Cu hnu ah Finance Secretary asimi Pu Thawm Hlei Mang kut sungah CNF thawn pehpar awin Document pawl le Paisa pawl ap ding in ansim tik ah akut sung ih sin party paisa rs 19/- lawng aum tiin ati i a angki zalsung ih sin asuah sak i apek asi.

– Pu No Than Kap nih Lairawn Internet Opinion Discussion ihsin asimbetmicu “ 1992 kum amah kha president sinak ih sin in dawisuak tupawlcu Danhrampi vek in thihnak pek thei asi. Asinain kapek duh hai lo ” tiin arak sim ko na in Maj Zing Cung le adang upa hrek khat kha that ding in Ngun Uk Lian le adang mi pakhat arak fial asi. ( Note: No Than Kap nih Zing Cung le Group kha Thatding in afialmi Ngun Uk Lian amah rori nih Maj. Zing Cung hnen ah 1994 kum Central Command HQs ah an rak tuah mi Xmas puai ah asimsuaklawng ah theih arak si.) Curuang ah Pu No Than kap in “ thisuah kaduhlo ruang ah ” tiin asim theumi cu atlun lam ih kan tarlang mipawl kanzoh tik ah hrawkhrawl le a thuphanper lawng araksi.

– CNF ih sin dawisuah hnu Pu No Than Kap cu amah ih dungthluntu ahrekkhat kha a hmang sal i cangvaihnak arak tuah sal. Indian North East dothlen nak Organization pakhat asimi NSCN (K) hnen ah ralthiamnak zir ding in minung athlah sal nain cuih athlah salmi sung ih sin a upa ih fapa Kap Luai tel in ralkap (2) thah an tuarmi siarlo

ziang hmanh a pitling theilo. Cu hnu ramri ah amah dungthluntu hrekkhat cu mithmai tuam in misuamhmang in an rak vaksal. Hnetabik ah India Cozah nih a mah ih cangvaih dan kha azoh thei nawnlo ruang ah an kai i Mawre ih sin Tamu um SlORC thu neih tupawl kut sung ah an hlan ta asi. Amah ih asimvek in thisuak nak kaduhlo ruangah ka cangvaihlonak asi timi tawngkam cu amah ih tuahnak thawn akalh aw ti kha fiangtein hmuhthei asi. Indianih akairuang ah acangvaih theinawn lonak asisawn.

  1. Falam Hakha tiah hleihdannak khawi tawk ih sin athawk.

– Pu No Than Kap cu 1992 kum ah party ih sin dawisuah asiveleh tein “Hakha pawlinka nmah Falampawl kha party ih sin in dawisuah asi ”tiin asimmi tawngkam cu tunitiang asim ringring mi asi. Hi tawngkam hi Falam kan unau atamdeuh nih khal adik tiin an zum. Cu hlei ah athawk tein HaKha nih Falam Khualipi cu in long tiin adiklomi tawng kam khal arak um ciazo i Hakha le Falam kar lak ah hmuh awk thiam lonak atum vivo nak asi. Cu ticun CNF President cu Falam lam asi ruang ah adang lam pawl nih thuneinak an duh ruang ah kei Pu No Than Kap cu in hlawnnak asi tiin atimicu adiklo. Thil dik cu atang lam vek asi.

– 1992 kum November thla ah tuahmi Cabinet Meeting ah President Pu No Than Kap par ah mawhpuhnak an tuah tik ah kei “ Falam lam kasi ruang ah kasualnak in hawl ciamco asi. Hakhalam pawl nih thuneinak anduh ruang ah sual an hawl nak asi.” tiin arak sim dah. Himi thuhla an theiveleh tein Pu Roger F. BiakLianThang, Dr. Pu SuiKhar le Maj. Zing Cung tecu CNF hotupawl asimi Falam lam ih Maj Alexendra HrangVung Thang, Pu Thawm Hlei Mang, Pu Nililian te thawn Aizawl Albert Ceu Hlun inn ah November thla a hnetabik zarh sung ah ni (2) sung ton awkin thu relkhawmnak an rak nei. Cuti ih an ton awk nak ahcun atu thuhlacu Falam le Hakha thuhla ruang ah asilo i Pu No Than Kap khamawh puh nak kan nei milawng asi.“ Falam lam President asiruang ah kan mawhpuh asi tiin nan ruat asiahcun nanmah pathum sung ihsin pakhat khat nih president in tuan sak ula kanduh ” tiin ansim tik ah an mah lam ihsin “ Pu No Than Kap siarlo adang ho thei tuding kan um lo, Pu No Than Kap aumlo asile cu kannih khal kan suak ding , a mah a um asiahcun kan nih khal kan um ding ” tiin an rak let sal. Dothlennak cu Pu No Than Kap ruang ah antuah mi vek abang. Cu ruangah an mah thawn thu rualrem theinak anngah theilomi dinhmun ah arak thleng asi.

– Cu ruangah NSEC an rak dinthawk ah Maj Alexendra Hrang Vung Thang , Pu Thawm Hlei Mang le Pu Nililian tecu NSEC ah an tel ter nawnlo nak asi. Ziangah ti le an mah ih lungkim pinak tel lo in an thu thu in in tel ter asi tiin an tongkam asuak sal ding ruang ah, NSEC thazang acak ter loding hleiah India cozah le adang alliance group pawl thawn kan peh aw nak ah dawnkhantu pakhat asitheiding tiin ruatnak aum ruang ah siseh, Pu Tlung Luai le Pu Sang Hlun tekhal an tel ter lo ruang ah siseh, thla(6) sung ah an kohdingmi Party Conference ah an rak tel salding tiin ruahnak aumruang ah asi. Asinan dothlennak timi cu a awlmi lamzin siloin harsatnak lamzin asi ruangah khami harsatnak ihsin kan luat theinak ding hrangah arak suak mi buainak kha suanlam hmang in ralkap sung ihsin ralkap hrekkhat cu ansuak nak asi.

– Ziangtinkhal asile Pu No Than Kap in “ Falam lam cu Thuneinak duhtu, Adangpawlkha an iksik ruang ah” tiin ci avortak ruangah ralkap sung ihsin an suak nak asi. Kandung nai teah Aw Falam timi ca uk zoh asiahcun Chin Miphun zate thathnemnak hnakin Falam hnam thatnak lawng ah a thin lung a um i mahleh peng duhnak (Communal feeling) a na sat zia kha fiangten kan hmu thei si.

-1992 kum CC committee sungah meithal apuah i a hrosa aw ciamco. Cumi meeting sungah Pu Val Thang leh Pu No Than Kap karlakah hmuhawk thiamlonak a rak um.

CNF HQs sungah an pek mi ralkap training pakhat cu zinglam nazi panga hrawngah PT an tuah rero lai ah “Ziangsi nan tuah- kan practics rero, zianghrangah- ChinLand hrangah, ziang thinlung thawn- kahpathir thinlung” tiah an au rero mi kha “Ka hna aset” tiin a maih Pistol kha vanpar ah a kap ciamco. Amah kiang um party upa pawl kha “ nan nih pawl biak inn khawm letla Halkha, Pathian hla nan sak leh tla Halkha, Ralkap training nak ah tla Halkha, ziang si nan cang thluh ” tiin a au i ahrosa ciamco. A tak tak tiahcun CNF / CNA sung ah halkha tawng lawng siloin adang Chinhnam tawng tampi sim i hmang a rak siko. 1988- 92 kum kar lak CNF pawl sung ah nasazet in Miphun Politics harhsuak theihnak ding ah mahih hnamduhnak thinlung le mahih peng duhnak thinlung pawl a mal theinak ding kha nasazet in sim awk rero laifang arak si. Pawlsung ah hnam tin citin anrak telmi atambik can khal arak si. Asinan Pu No Than Kap cu pengtin hnam tin anrak tel mikha athupi ah ret lo in Official Language le ralkap Command Word pawlkha amah ih Falam tawng in arak hmang ter asi.

– Pu No Than Kap CNF akeihhruai lai ah Party sung ah peng thleidannak thawin tuanvo arak pek ruang ah pawl sung ah mah leh peng duhnak thinlung cu ahram arak fek ter asi.

“Chin aiah Falam, Halkha, Matu, Mara tiin thleidannak cu abulpi ah ret in tuanvo pawl arak phawt. Pengkhat le Pengkhat hmuhawk thiamlo dingin atuah hai i amaih thu neih nak a um thei ring ring nak ding ah arak zuam asi. General Secretary arak tuan dah tu Pu Val Thang kha ” Nangmah kha President ka loret duh konan Pu Sang Hlun le Dr,. Sui Khar tein anloduh lo ruang ah ka lo ret theilo” tiin Pu ValThang kha abum. Pu ValThang in adik tiin aruat i ” Halkha pawl in keimah president tuan ding ah an duh lo ruang ah kei CNF ih sin kasuak asi ” tiin 2005 kum February thla sung ah arak sim dah. Pu Val Thang General Secretary arak tuan lai ah Pu No thang Kap President le Commander in Chief ( C in C) tuanvo arak tuan. Vice President (II) le Defense Secretary cu Colonel Pu Tlung Luai arak si. Chief of Staff cu Maj HrangVung Thang araksi. Phun dang in kan sim asi le thuneinak zatein Pu No Than Kap ih milai pawl kutsung ah a um thluh kantithei. Pu Val Thang kha President heipek duh ngaingai sehla zohmanh in an el thei nak ding thuhla aumlo. Mah leh mah karlak ah remlonak cangter i amah pakhat lawng nih thuneinak angah duh ringring ruang ah Matupi lam asimi Pu Val Thang le Halkha lam asimi Pu Sang Hlun, Pu Dr.Suikhar teih karlak ah peng leh pumpak hmuh awk thiamlonak ding arak tuah mi kha asi.

(5). CNF dintu asimaw?

– Hruaitu thawn an ton aw lai ah CNF dintu pawlcu Pu Tial Khal, Pu Ro Eng, Pu Lian No Thang tepawl ansi i CNA dintu cu keimah kasi tiin asim mi thawn pehpar aw in thil dik tak tak cu-

– 1988 kum November thla sung ah Pu Andrew Ngun Cung lian le Pu Benjamin Turing te cu Rakhine Libaration party hnen ah ralkap thiamnak zirding in an rak feh. 1988 kum December thla, 1989 kum January, February thlasung ah KIA hnenah ralkap thiamnak zir ding in aburbur in anrak thlah. 1989 kum February thla sung ah KIA Battalion (6) ah ral kap thiamnak azirding Mino (66) cu an za tein antong aw hai. Cu tawk hmun ih sin KIA tactical (3) HQs le KIA Training HQs ah ke in anrak feh i 1989 kum March thla (21) ni ah mi (66)cu training ground ah an rak thleng theithluh. (22) ni ihsin trainingcu anrak kai thawk i 1989 kum May thla (8) ni ah training cu anrak kai theh thei. Chin Miphun lang tar kha kutsuam in thukamnak an lak hnu ah Chin Miphun ralkap ( CNA) cu arak suak theinak asi.

-1993 kum June thlasung ah rak tuah mi aveikhat nak Party Conference cem hnu ralkap private number Officially in pek ding arak si i KIO hnen ih sin ralkap thiamnak arak zir tupawl ihsiin thawk Private number cu pek ding ah an rak rel cat. Curuangah Chin mi phun ralkap ni cu 1989 kum May thla (8)ni asi tiah titheih asi. Asinan tu ni tiang Chin National Front ( CNF) nih Chin Miphun ralkap ni cu legally in arel hrihlo.

– Chin miphun ralkap din tu thawn pehpar awin Pu No Than Kap CNF ah arak lut hlan 1988 kum March thla (20) ni ah CNF din arak si in thawk Pu Ro Eng cu Chief of Staff ah ret arak sizo ruangah CNA cu CNF adin thawk veleh tein din arak sivezo.

– Pu No Than Kapcu NCF/ A anrak dinh hnu ah CNF sung ah arak lut i Foreign Secretary ah tuanvo an rak pek lai ah Pu Ro Eng cu Chief of Staff tuanvo ara lak zo ruang ah Pu No Than Kap cu Chin miphun ralkap din hmasatu arak sitheilo. (6) UNO ah Kan Chin thu le hla hmasabik a au suak tu asimaw?

– UNWGIP timicu UN (Structure an its hierarchal ) ah aniambik asi. Cuhlei ah ziangvek Indigenous pawlkhal kaitheinak hmun asi. 1993 kum ah NDF ih sin tlangpar mi hotupawl cu Europe an tlawn lai ah UNWGIP meeting ah an rak kai. Cuih NDF palai sung ahcun CNF aiawh in Dr. Vum Son Suan Tak ( L) arak tel. Curuang ah Chin Miphun ih sin UNWGIP ah a hmaisabik akai tucu Dr. Vumson SuanTak araksi.

– UN ah zokhal in ca ngan ih sim theih asi. Dun le dan 1503 vek in minung canvo pah tlang atuartu zovek nunau mipa tilo pumpak in khal simtheih asi. Asilole an mah ih aiawh pawl pakhatkhat nih tla simsak theih asi. Curuangah himi zung ah hin kumkhatsung ah ca arak lutmi 300000- 400000 tiang aum asi.UN Secretary hnen ah khal ca ngan thei asi.

ZORO khal in ca an kuat theu. High Commissioner for Human Righs hnen khal ah ca ngan theih asi. Asinan himi zung cu 1990 tiang arak um hrihlo. Athupi sawn micu UN ah ca kan ngan tik ah ziang tluk in in ruatsak timihi asideuh. Zo khal in ngantheih tuahtheih mi hnatuan pakhat kha a mah Pu No Than Kap lawng nih ngan theimile tuah theimi asilo.

( 7) Geneva in SLORC hnen ah an au suak pimaw?

– Geneva in SLORC kawl ralkap hnen ah amah zalennak ding hrang ah an dilsak ruang ah siseh, Kawl ralkap le tlangpar hriamnam kai pawl karlak ah daihnak um theinak ding an bia aw rero can a rak siruang ah siseh, amah kha zalennak in pek tiin asim micu athu phanpernak lawng asi. Geneva timi word hi afiang satsai lomi word asi. UN asilole Geneva ih um NGO pakhatkhat, asilole mimal pakhatkhat asithei.

– UN Machenism ah atuvek kaihtuar mipawl thawn pehpar awin UN Working group enforced and involuntary disappearances hnen ah report theih asi. Kha report kha hitawk ih Working group nih a saingmi cozah hnen ah ansimsal asi. 1996 kum sungah himi Working group hnen ih sin ngahmi report pawl cu Kazastan, Tunisia, Turkmenistan, Zimbabwe rampawl lawng ansi. 1997 kum sung ah Gambia, Saudi Arabia, Zambia rampawl lawng a umfawn. Kawl ram ih sin report ca pakhat hmanh a umlo. Adang pa khat hrihcu Special Repporteur on MyanMar hnen ah report pek theih asi. 1996 kum Special Repporteur on MyanMar report ca kha kan zoh tik ah detention tang ah Pu No Than Kap thu le hla pakhat hmanh aumlo. 1997 kum report ca sung khal ah aumlo. Cu ruang ah Pu No Than Kap ih Geneva atimihi UN asilo ticu afiang asi.

– NGO pakhatkhat asitheipeimaw timi thawn pehpar awin Pu No than Kap thu hla par ah Society for Threaten People tiah kawh mi NGO nih acangthei sung in a au suakpithei. Pu No Than Kap vek case phun pawlcu cumi NGO in athupi bik in ankhamsak theu. Asinan cumi NGO cun atuahsak khal asilen ziangtluk in pitlingnak angah pithei cuangding.

Organization pawl hrang siloin pumpak pakhat hrangah ausuak sak hicu pitlinnak hmuh theih ding asilo. Pu No Than Kap simlo tuni SPDC nih akaihaimi Kawlram Democracy hotu Daw Aung San Su Kyi le U Tin Oo, tlangpar hotu Khun Tun Oo tepawl suah zalen nakding hrangah Geneva lenglo International le Security Council nih andilsak rero hmanh ah SPDC nih ziang an siar lo i kum tampi thawngtlak in an tuar thotho asi ti hi mit hmuh asiko. (8) SLORC hnen ah a surrendermi asimaw silo?

– Ralkap cozah cu Politictian, dothlennak tuah tupawl cu an kaingah hai tikah an mah i politics dothlennak ruatnak le zumnak pawl kha an hlawnter hai i daitein ka um thlang ding tiin thu kamnak an tuahter hnu lawngah an thlah zalen theu asi. Chindothlennak thuanthuvek asiahcun Maj. Suan Khaw Pau, Pu Hrang Nawl le Pu Ro Thang tepawl cu India acozah nih ankai hai i Kawl ralkap Ditatorship NeWin hnen ah an pek lai ah anmah ih Politics ruahnak le zumnak pawlkha an hlawn theilo ruang ah kum tampi thawngtlak ter ansi. An thawngtlak ding kum acem hnu khalah an rak suaksal thei nan an mah kha cet lo in zoh rero an rak si.

– Pu No Than Kap khal cu India cozah nih akai i SLORC kut sung ah an hlan. Tahthim nakah Pu No Than Kap cu SPDC hnen ah a surrender , Politics aruahnak le apawmnakathlahlo asiahcun kum tampi sung thawngtlak ding kha asiko. Atuvek in zalen ten fehrat ih umtheih ding kha asilo. Pu No Than Kap nih SLORC hnen ah keimah ih Politics, dothlennak, karuah nak le kazumnak pawl kha kahlawnding, daitein biaknak lam hnatuanlawng katuan thlangding tiah a sung apek i Give and Take pakhat khat atuah ruang ah asi.

Cu silo le Chin miphun pawl karlak ah lungrualnak siatter ding ah SPDC ih kutkai pakhat ah ahmangduh sal ruang ah asithei.

-India cozah cu amah adodaltu Organization pawl thawn rualpi tuahtu pakhatkhatcu amah i security hrang ah Police pawl akilvengter timihi thilcangthei asilo. kan simzovek in NSCN (K) tepawl kha India hnen ah azuar hai i NSCN ( IM) tepawl le CNA pawl kha thatding ah ambush arak tuah termikha an thei ruangah Pu No Than Kap par ah an zumlo i atlanpangding tiin anthinphan ruangah Police pawl kha an kilveng termi men arak siko.

Thucemnak

CNF cu chin miphun zate duhmi Self Determination, Democracy le Federal System ding suak sal theihnak ding hrangah din mi asi. Mipakhatkhat, hnam pakhat men ih duhnak kha tuahding ah dinsuak mi asilo. Self Determination, Democracy le Federal System ding suak theinakding kha Pu No Than Kap pakhat lawng in athei i aduhmi thil lawng khal asilo vek in Falam Halkha pawl nih lawng anthei i anduh mi thil lawngtla asilo. Chin miphun zate in kan duhmi Chin miphun zate thawn pehpar awmi policy pawl arak si kha zapithei asi. 1988 kum march thla 20 ni ihsin thawk chin miphun tampi nih nunnak pek in kum (19) sung kan do reromi miphun dothlennak ah kaihruainak thleng rero hmanh sehla CNF Policy (3) cu a thleng awk hleilo.

Pu No Than Kap cu Pu Tial Khal le CNF dintu upapawl in CNF ih sin an dawisuak lai ah amah ih athinlung diktak anrak theilo ruang ah tusun ni CNF ah miphun hrang ah ado re rotu pawl nih amah ih dungthlun in anrak dingpinak kha asi. Asinan kum (4) lai areihnu ah amah ih asuakpimi ziaza, athinlung le athil tidan pawl kha CNF le chin miphun pawl hrang ah siatnak asuakter ruang ah CNF President sinak, C in C sinak le CNF member asinak ih sin kum khua in dawisuah arak si.Pu No Than Kap in CNF pawl kehdernak tiah asim theumi ” Halkha lam pawl ih peng duhnak thinlung, thuneiduhnak thinlung, Falampawl ih hohanak an duh lonak ” tiah asim reromihi amah ih ei le in, politics, sociallam dicnity kha akilveng duh ruang ah hrawk hrawl in asim i seal vek in ahmangduh ruangah asi. Chin Miphun dothlengnak thuanthu sung ah zomawiloin thil acangmicu Pu No Than Kap ih aziazathatlonak, akhuaruah siatnak, miphun duhdawtnak neilo, mahpumpakhrang lawng thatnak ruat, dictatorship system ahmannak le Phio- thuk – tat lansin ahmannak pawl kha arak si.

Cu ruangah Chin Mipi le Chin Miphun pawl in Pu No Than Kap thawn pehpar aw in hi simfiangnak hi raktheicio hnu ah CNF cu pumpak pakhat le peng pakhat hrang ah asilo i Self determination, Democracy le Federal system kha azumtu le apawm tu mizapi telmi Organization asi tikha thinlung ah ret in kutsih in tel cio dingin kan lo fawrhfial duh asi.

Publicity & Information Department

Chin National Front

Chin Land

Na ruahnak

One Response to Pu No Than Kap ih CNF Statement Thuletnak

  1. Benjamin   September 11, 2014 at 5:32 am

    Dr.Ttha Nei Fai in ‘Dotu tam le Domi a cak sinsin’, a ti ttheu mi cu Pu CAM NTK hnenah kim vivo seh.Pu Than ih nganmi, ‘Ram hrang Ruat in’, cu ka hngahnak a rei tuk zo ih, mipi tlangzarh a si zo maw? US,Malaysia, tvk pawlah in kuat hramhram uh,Bible sangtu Cabu ttha ah sor a theih ding ka zum.