Pumpek le Thuthlun

Home » Nitin Manna » Pumpek le Thuthlun

By vcth on July 25, 2016.

Nitin Manna

NITIN MANNA July 25, Tlawngkai Nikhat

Pumpek le Thuthlun

Bawipa ih hnenah na nunnak pe aw.
– 2 Sansiar. 30:8 [Johan 15:1-14]

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

Russia mi tlangval note pakhat cu England ram a thleng. Mirang ttong thiam lo mi asinan Pathian in a thluasuah ih rangzet in a thiam lohli ih a hmang thei mai. A nunnak ah mangbangza huham le thiltitheinak hmuh theih ih a um ruangah mipi pawl in a huham cahnak ih thuthup theih duh ah an sut. Sikhalsehla himi cu Pathian le amah karlak ih thuthup a si ti’n a ruah ruangah a sim duh hngai lo. Asinan sim lo theih loin an sut ruangah a netabik ahcun hiti’n a sim hngai: “A pakhatnak ah, Pathian in i ko, i umpinak cu a sunglawituk ruangah Pathian hnenah i kawh tinte’n na thu ka thlun ringring ding ka ti. Ka pum ka pek, ka pek deuhdeuh tikah Pathian in a huham thawn i thuam deuhdeuh ti ka thei. Cule ka theih fiangmi cu Pathian in a taa ah i laak zo; ttong thiamnak, khuaruah theinak, le thil ziangkim – ka nunnak hrimhrim hi keimai’ taa an si nawn lo, Khrih cu keimah ah a nung ih ka sung ihsin a cangvai timi hi a si” tiah a ti.

Duhdawtmi unau, Pathian in atu le atu a lo ko ringring, A kutcak na parah a suang ti na thei maw? Asinan nang cun na pum na pe duh cuang lo. A huham cahnak na sungih a lo thawtkhummi na thei maw? Thlacamnak thawn na tlamtlin lonak parah zaangfah dil ih a hnen pan dingah Pathian in a lo ko a si.

Nikhat cu sunhnu simneem ah thlacam ding in sawmtu innsang pakhat ah ka feh, sangka ah mi pakhat ka tong. Anih in, “Ka nupi cu thla riat sung ihkhun ihisn tho thei loin a ruanghrek thi in a um zo. Na rat ding hi a hngakhlapzet. Pathian in i thoter saal ding ti a zum” in ti. Ka vung lut ih khawsia dawi in thla ka cam sak. Cunu in, “Ka dam zo ti ka thei. Na tlun hnu ah ka rung tho leh ding” i ti. Ka tlunsan ih cuih hnu ah ziang a rung cang ti zianghman thu ka thei nawn lo.

Cuih zaan khawm dingih ka fehlai ah mi pakhat cu khir phah in ka hnen a ra ih “sim duhmi pakhat ka lo nei” in ti. Tlangleng khelh dingih feh ttul ka si nain thu ka lo sim duh hmaisa i ti. A simmi cu: “Hih khua ahhin zarh khat veikhat ka ra ih minaa ka veh ringring. Nu pakhat ruanghrek thimi paralyzed hrangah ka thinharzet. Hmanseh, tuni an inn ka feh tikah cumi nu cu hna a rak tuan rero” a ti. Hih thuanthu ka sim duhsan cu Jesuh na ton ding ka duh ruangah si. Jesuh hnenah na pum pe aw.

Na thinlung sungah “asinan” timi a um ringring ahcun
Thlarau ah na pum na pek famkim hrih lo tinak a si.

Na ruahnak