Ral ih Canter (Kawl Ralkap Thuanthu)

Home » Cahram » Theihkauhnak » Ral ih Canter (Kawl Ralkap Thuanthu)

By vcth on July 20, 2010.

B.A (Thang), Salai

Thuthangca a tuah tum rero tu Editor Salai Za Hmung in Politic thu thawn pehpar mi cahram ngan sak ding in sawmnak ca in kuat. Laimi sungah awareness tuah ding timi ruahnak thawn tuah tum mi thuthangca a siih a cang thei tawk in bawm ding in ka rak lungkim. Zaan ah ziang si ka ngan le a ṭha pei timi ka ruat, ka ruat ih Mary P. Callahan a rak ngan mi Making Enemies timi cahram kha let ding in ka ruat suak. Ziangah tile himi cabu hi a ṭha zet mi cabu pakhat a si. Himi cabu hi ṭhaten kan siar asile… kawlram Ralkap thuanthu hi tampi kan thei ngah ding. Himi ca bu ka ngan sal tikah third person vekin keimah in casiar tu hnen ah sim sal vekin ka ngan ding. Casiar tu unau pawl hnen ah ruahnak le theikauhnak pakhat khat ngah hram seh timi ruah san nak thawn…
Bung (1)
Kawlram Ralkap thuanthu thawn pehpar in ca bu suah mi pawl sungah Australia ram mi Andrew Selth le American rammi Mary P. Callahan pawl hi an hmin thang ih Kawlram thu thawn pehpar aw in cu ruahron tlak zetmi an si. Thuthup nei mi Ralkap pawl sungah harsatnak a phunphun pahtlang in Kawlram Ralkap thuanthu cabu rak suah theitu an si. A tu ka let mi Mary Callahan in cu “Ziangruangah Kawl ralkap pawl an nun a sau? Ziang ruangah tu tiang an uk thei rero timi thu lam hmuitin in a ngan.
Rakap le Mipi an kom awk daan pawl zohfelnak a tuah hnu ah “Making Enimies” timi hmin thawn Kawlram Ralkap thuanthu cabu cu 2003 ah a rak suah. Cahmai 270 a um ih “Kawlram Ralkap Thuanthu” timi hmin thawn zarh tin www.vcth.net ca siar tu u le nau pawl hrangah ka rak tarlang ding. 1991-92 sungah thla (6) sung ralkap cabu inn pi ah research a rak tuah mi pawl, ramsung ramleng ah thusut mi pawl, ralkap thawn pehpar mi cabu/magazines pawl le Universities pawl ih ralkap thawn pehpar mi Thesis pawl a siar ih a ngan mi cabu a si.
1988 People Uprising lai ah visa a ngah ih Rangon ah a um lai fang a si. Democracy hrangah demonstration tuah rero mi tlawngta pawl kham ding hrangah meithal ti ṭhepṭhep thawn ralkap pawl in ral operation tuah vekin an um rero mi cu mangbangza ngaingai a si tin a ti. Politicians ngaingai sisehla mah ram mi cu hitin an tuah lo ding nan ral do ti pakhat lawng a thei mi ralkap in cu hitin an tuah ko a ti. Ralkap timi hi “Ral thuam hruk mi Politicians” an si tiih a ṭong ṭheu tu pawl parah a lung kim pi lo. Ralkap timi cu Naing-Ngan-Yay thei lo in ral do lawng thei mi ralkap taktak an si tin Mary in a hmu. Himi thu ruangah kawlram ah Naing-Ngan-Zi a thi mi a si tin a ti.
Kum (40) luan lai thuneihnak le Uk tu pawl ih ṭhatlonak an tuah mi hi a thuhrampibik ah Mary in cu a ruat lo. Do awnak ruangih ram din mi thuanthu ruangah mipi in an duh lo nan ralkap tutiang a nung thei mi a si tin a ti. Atu kan ti rero mi Kawlram pi hi Mirang san ihsin a rak ding mi ram a si. British ram thangsonak ding hrangah British ralkap in meithal hmang in ram a rak din mi a si. Ram mi pawl ih ṭhansonak ding hrangah ih ram din sak mi a silo. Ral do ih ram ding mi hi mirang san ihsin a rak thok mi a si.
Ralpi II Japan a rak lut tikah mirang pawl cu India ram lamah an tlan. Japan san ah cun pawlkom tete pawl tampi a rak suak. Meithal nei mi pawlkom tampi a rak suak. Hihi hmailam ah a rak cang ding mi Ramsung Ral (Civil War) hrangah lamzin pakhat vekin a cang. Meithal kai in tungdingnak (revolution) tuah tu pawl kha cozah in a do. Revolutionists pawl hi mipi sung ihsin a rak suak mi a siih mipi hi buainak tuah thei mi pawl a si tin Cozah Ralkap pawl in an hmu suak.
Rampi tungding rero lai ah civil war a rak cang mi hi ralkap a ṭha cak sinsin ding hrangah a rak bawmtu pakhat a si. Mirang San, Japan San le Pha-Sa-Pa-La San himi san 3 ah meithal lawng kai in buainak pawl ṭheh thei ding an tum tuk ruangah Ralkap power a kai. Himi san pawl ah ralbawi a cang tu pawl cu meithal kai in ral do mi pawl an si. Curuangah meithal tel lo ih mah saduh a phorhtu (demonstrator)pawl hi meithal kai pawl thawn bang rep in an hmu thlang.
Asinan, hitin meithal kai in mi a namnuai mi hi mirang le Japan pawl hnen ihsin a ngah mi ro sia a si tin sim thei a silo. A dang mirang pawl uk mi ram ah tla kan mah vek a rak um ko. Asinan Zalenpar an ngah hnu ah namnuainak pawl kha an cem ter ih ram mi pawl thawn a milh aw mi uk-awknak an hmang. India, Malaysia le Philippines pawl ah mirang san uk-awk daan a um nawn lo. Ziangruangah kawlram ahcun mirang san ukawk daan timi namnuainak hi a um rero lai timi ruat ding a si tin Mary in a ngan.
Zalennak ngah zik ah civil war a cang mi tla kawlram pakhat lawng a silo. Ram dang ah tla a um ve ko. Asinan, a dang ram pawl ah dodaltu pawl parah namnauinak lam silo in negotiation timi lamzin sawn in Political buainak pawl hi an cem ter. Kawlram ahcun U Nu le acozah in opposition pawl hnen ah sizungzi an tuah thok lai ah KMT Taluk pawl Shan Ram an rak lut. Communist Shan Taluk a duh lo mi American cozah in KMT Taluk Rang pawl ṭha a pek. Himi thu hi U Nu in UN Meeting ah a sim nan UN le USA in zianghman an siar lo.
Civil war le KMT Taluk pawl ruangah cozah operation ah ralkap pawl an thu zet thlang. Buainak pawl parah ral donak thawn an feh pi rero tikah thleng awknak timi cozah in a duh nawn lo. Hitivek caan ah Ram din tu hi Ral Bawi a siih mipi timi cu buainak tuah tu pawl (lole) Ral tin an hmu thlang tin Mary in a ti.
Hmaizirh Bung (2) ah “Mipi hi ral tin a hmu mi Cozah” thu a si leh ding.
(Making Enemies by Mary P. Callahan)
Na ruahnak

One Response to Ral ih Canter (Kawl Ralkap Thuanthu)

  1. Anonymous   July 21, 2010 at 8:45 pm

    Thangpi, na ti tha nasa run ngan vivo aw.